ۋنيۆەرسياداعا قوسىمشا بيلەتتەر ساتىلىمعا شىقتى

الماتىدا ءوتىپ جاتقان ۋنيۆەرسيادا-2017 سايىستارىنا قوسىمشا بيلەتتەر ساتىلىمعا شىقتى, - دەپ حابارلايدى Vesti.kz. بۇعان كورەرەمەندەر قىزىعۋشىلىعىنىڭ ارتۋى سەبەپ بولىپتى. FISU جەتەكشىلىگى ۇيىم اتىنا تىركەلگەن ورىنداردىڭ كوبىن كورەرەمەندەرگە بەرەتىن بولىپ شەشتى. مۇنىڭ الدىندا حاتتاما بويىنشا تريبۋنالارداعى ورىنداردىڭ ءبىر بولىگى FISU مەن رەسمي دەلەگاتسيالار  وكىلدەرىنە, سونداي-اق سپورتشىلار مەن باق وكىلدەرىنە بولىنگەن بولاتىن. بۇل ساتىلىمعا جاتپايتىن كۆوتالار جالپى ورىنداردىڭ 30 پايىزىن قۇرايدى. قازىرگى كەزدە FISU ۇيىمى وسى كۆوتالىق ورىنداردىڭ 90 پايىزىن ەركىن ساتىلىمعا شىعارۋ تۋرالى كەلىسىم بەردى. مانەرلەپ سىرعاناۋ مەن حوككەي سياقتى قىزىقتى سپورت تۇرلەرىنە بيلەت ساتۋ بۇگىننەن باستالادى. بيلەتتەردى ونلاين جانە وفلاين ساتىپ الۋعا بولادى. بيلەتتەر الىپساتارلاردىڭ قولىنا تۇسپەس ءۇشىن ءبىر ادامعا 5-8 بيلەتكە دەيىن عانا ساتىلادى. بۇگىننەن باستاپ كەز كەلگەن جارىس تۇرىنە بيلەتتەر تۋرالى اقپارات ۋنيۆەرسيادا سايتىنىڭ باستى بەتىندە جاريالاناتىن بولادى. قازىرگى كەزدە ۋنيۆەرسياداعا 184 مىڭ بيلەت ساتىلعان (جالپى مولشەردىڭ 80 پايىزى) - بۇل قازاقستاندا وتكەن قاندايدا ءبىر شاراعا ساتىلعان بيلەتتەر بويىنشا رەكورد كورسەتكىش. ونىڭ ۇستىنە جارىس باستالار الدىندا سۇرانىس تىپتەن ارتىپ كەتەدى. مىسالى, ۋنيۆەرسيادانىڭ اشىلۋ سالتاناتىنان كەيىن بىردەن 30 مىڭ بيلەت ساتىلعان.