كۋبالىق بوكسشى گولوۆكينمەن جەكپە-جەككە شىققىسى كەلەدى

كۋبالىق بوكسشى ەريسلاندي لارانىڭ (23-2-2, 13 كو) مەنەدجەرى كىشى لۋيس دە كۋباس قازاقستاندىق گەننادي گولوۆكينمەن (36-0, 33 كو) جەكپە-جەك ۇيىمداستىرۋعا قاتىستى پىكىرىمەن ءبولىستى. بۇل تۋرالى sports.kz حابارلادى. «بۇعان دەيىن ەريسلاندي تالاي مىقتى بوكسشىلارمەن جۇدىرىقتاسقان, سايكەسىنشە ءبىرىنشى ورتا سالماقتاعى ۇزدىكتەردىڭ ءبىرى رەتىندەگى مارتەبەسىن ساقتاپ تۇر. قازىرگى ۋاقىتتا ءوز ديۆيزيونىنداعى ۇزدىكتەردىڭ ءبىرى. بۇگىندە يۋري فورمانمەن كەزدەسۋگە دايىندىق جۇرگىزىپ جاتىرمىز. ال ارى قاراي نە بولارى ۋاقىت وتە كەلە بەلگىلى بولادى. تاڭداۋ ەركى بىزدە بولسا بۇعان دەيىن جەڭىلىپ كورمەگەن دەمەتريۋس اندرادەمەن كەزدەسۋ ۇيىمداستىرعىمىز كەلەدى. ال رەتى كەلىپ جاتسا گەننادي گولوۆكينمەن دە كەلىسسوزدەر جۇرگىزىپ كورەمىز. جۇرت ونىمەن ەشكىم جەكپە-جەككە شىققىسى كەلمەيدى دەيدى. ال ءبىز قارجى ماسەلەسىن رەتتەي الساق, كۇش سىناسۋعا قارسى ەمەسپىز. لارا الەمدەگى ۇزدىك P4P بوكسشىلارىنىڭ ءبىرى. گولوۆكيندى جەڭۋگە شاماسى جەتەدى دەگەن سەنىمدەمىن», – دەدى لارانىڭ مەنەدجەرى.