«قازاق ەلى» ءفيلمى تۇرىك تىلىنە اۋدارىلادى

بولاشاقتا «قازاق ەلى» انيماتسيالىق ءفيلمى شەتەلدىك كورەرمەنگە جول تارتۋى مۇمكىن. ازىرگە, وتاندىق ءونىمدى 80 ميلليون اۋديتورياسى بار تۇرىك تىلىنە اۋدارۋ كوزدەلىپ وتىر.  يگى باستامانى شىمكەنتتەگى «ساق» كينوستۋدياسى مەن «وڭتۇستىك-فيلم» مەملەكەتتىك مەكەمەسى جۇزەگە اسىرادى. بۇل تۋرالى بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەباەۆ وتاندىق فيلمدەر جاساۋمەن اينالىساتىن ستۋديامەن تانىسۋ بارىسىندا ءمالىم بولدى, دەپ حابارلايدى قازاقپارات. قازاق ەلىنىڭ تاريحي تاعدىرىن بەينەلەيتىن مۋلتفيلم ەلىمىزدە العاش رەت قر مادەنيەت جانە سپورت مينيسترلىگىنىڭ تاپسىرىسى نەگىزىندە دايىندالعان. «بۇگىنگى باستامالارىڭىز تەرەڭ تالقىلاۋدى قاجەت ەتەدى. جوبالارىڭىزدى ءالى دە پىسىقتاي تۇسىڭىزدەر. ناقتى ستسەناريلەرىڭىزدى الداعى ۋاقىتتا بىرگە قاراپ, ءوز تاراپىمىزدان قولداۋ بىلدىرەتىن بولامىز. ال «قازاق ەلى» انيماتسيالىق تولىقمەتراجدى تۋىندىلارىڭىزدى تۇركيا مەملەكەتىندەگى ءتيىستى ورىندارمەن كەلىسىم جۇرگىزۋ ارقىلى وڭتايلى شەشەمىز»,-  دەدى وبلىس اكىمى ج.تۇيمەباەۆ. «ساق» كينوستۋدياسىنىڭ باس ديرەكتورى نۇريددين پاتتەەۆ وبلىس اكىمىنە «كونە جەتىگەننىڭ سىرى», «وتىراردى قورعاۋ», «قاجىمۇحان», سىندى تاريحي ورىندار مەن تۇلعالار تۋرالى تۇسىرىلەتىن انيماتسيالىق فيلمدەردىڭ جەلىسىن جان-جاقتى بايانداپ بەردى. سونداي-اق ول احمەت ياساۋي بابامىز بەن  كۇش اتاسى  قاجىمۇحاننىڭ تۇلعاسىن تانىتاتىن ءمۋلتفيلمىن ءتۇسىرۋ جوباسىمەن تانىستىرىپ, قولداۋ كورسەتۋىن سۇرادى. 15 جىلدىق تاريحى بار «ساق» كينوستۋدياسى بۇعان دەيىن «قازاق ەلى», «ساپا وليمپياداسى», «قوشقار مەن تەكە», «مومىن مەن قاراقشى»  سىندى 50-دەن استام انيماتسيالىق تۋىندىلار دايىنداعان. ال, 25 سەريالى «تومپاق» ءفيلمى كورەرمەننىڭ ايرىقشا ىقىلاسىنا بولەنگەن. ايماق باسشىسى جانسەيىت تۇيمەباەۆ  مۋلتيپليكاتسيالىق تاريحي فيلمدەر ارقىلى وڭىرىمىزگە كەلەتىن شەتەلدىك تۋريستەردىڭ قاتارىن ارتىرۋعا بولاتىنىن ايتتى.