مەديتسينالىق تۋريزم مەملەكەتىنە اينالدىق

ەلباسى نۇرسۇلتان نازارباەۆ 25 جىلدىڭ بەدەرىندەگى باستى جەتىستىك­تەرى­مىزدى سارالاي كەلىپ: «ءبىزدىڭ حالقىمىز ەشقاشان بۇگىنگىدەي باقۋاتتى تۇرمىس كەشىپ كورگەن جوق. تاۋەلسىزدىك العاننان بەرى 1300-دەن استام دەنساۋلىق ساقتاۋ نىسانى مەن 1700-دەن استام ءبىلىم بەرۋ وشاعىن سالدىق. ولاردىڭ بارلىعىن ەڭ سوڭعى ۇلگىدەگى قۇرالدارمەن جاب­دىقتادىق. اسا كۇردەلى وپەراتسيالاردى ءوز ەلىمىزدە ءوز دارىگەرلەرىمىز جاساي­تىن جاعدايعا جەتتىك. جالپى, حالىق­تىڭ تۇرمىسى, دەنساۋلىعى تۇزەلۋى­نىڭ, سانىنىڭ ءوسۋىنىڭ ناتيجەسىندە قازاق­ستاندىقتاردىڭ ورتاشا ءومىر ۇزاقتىعى 72 جاسقا جۋىقتادى», – دەگەن ەدى. شىنىندا دا ءبىزدىڭ ەلىمىز دەنساۋلىق ساقتاۋ سالاسىندا كوپتەگەن تابىستارعا قول جەتكىزدى. ەڭ باستىسى, جۇرتتىڭ ءوز دەنساۋلىعىنا دەگەن جاۋاپكەرشىلىگى كۇشەيىپ كەلەدى. بۇل باعىتتا ۇلتتىق سكرينينگتىك باعدارلاماسىنىڭ ءرولى ەرەكشە ەكەنى انىق. جۋالى اۋدانىندا وسى باعدارلامانى ىسكە اسىرۋ بارىسىندا 18 051 ادام سكرينينگ­تىك تەكسەرۋدەن ءوتتى. تۇرعىن­داردىڭ اراسىنان 294 اۋرۋ جاعدايلارى انىق­تالدى, ونىӊ ىشىندە 162 قان اينالىمى جۇيەسى اۋرۋلارى, 112 جاتىر موي­نى وبىرى, 28 ءسۇت بەزى وبىرى, 10 قانت ديابەتى جانە 2 كولورەكتالدى وبىر تەكسە­رىلىپ, انىقتالدى. مىنە, وسىدان-اق, سوڭعى جىلدارى اۋىل تۇرعىندارىنىڭ دەن­ساۋ­لىعىن باقىلاۋ ماسەلەسى ەرەكشە نازارعا الىنعانىن بايقاۋعا بولادى. كەشە عانا مەملەكەت باسشىسى نۇرسۇلتان نازارباەۆ قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان سالتاناتتى جينالىستا توقسانىنشى جىلداردىڭ باسىنداعى جانە بۇگىنگى مەديتسينانىڭ اراسى جەر مەن كوكتەي ەكەنىن ايتا كەلىپ: «جاڭا ەمدەۋ ورتالىقتارىنان وزگە, ەلىمىزدە 49 جىلجىمالى مەديتسينالىق كەشەن جۇمىس ىستەيدى. قازاقستان – مەديتسينالىق تۋريزم ەلىنە اينالدى, بىزگە الىس-جاقىن شەتەلدەردەن ناۋقاستار ەمدەلۋگە كەلەدى», دەپ اق حالاتتى جانداردى ءبىر قاناتتاندىرىپ تاستاعانى انىق. شىنىندا حالىقتىڭ دەنساۋلىعى – ەلىمىزدىڭ باستى بايلىعى. سوندىقتان, اۋداننىڭ دەنساۋلىق ساقتاۋ سالاسىنىڭ قىزمەتكەرلەرى الداعى ۋاقىتتا دا ناۋقاستاردىڭ ءومىرىن قۇتقارۋعا بار كۇش-جىگەرى مەن كاسىبي بىلىكتىلىگىن جۇمسايتىن بولادى دەپ سەندىرە الامىز. باتيحان الپىسباي, جۋالى اۋداندىق ورتالىق اۋرۋحاناسىنىڭ باس دارىگەرى جامبىل وبلىسى