الماتىدا ىشكى ىستەر دەپارتامەنتىنە اۆتوكولىكتەر كىلتىن تابىس ەتۋ ءراسىمى ءوتتى, دەپ حابارلايدى قازاقپارات.
«وتكەن جىلمەن سالىستىرعاندا بيىل قۇقىق قورعاۋ ورگاندارىنىڭ ماتەريالدىق-تەحنيكالىق جابدىقتاۋىنا قاراجات ەكى ەسە كوپ جۇمسالدى. كەلەسى جىلى ءىىد بيۋدجەتى تاعى 25% ءوسىپ, 17 ملرد تەڭگەنى قۇرايدى. وتكەن جىلى 97 دانا جاڭا قىزمەتتىك اۆتوكولىك ساتىپ الىنسا, بيىل ۋنيۆەرسياداعا دايىندىق اياسىندا قالا بيۋدجەتى ەسەبىنەن تاعى 118 دانا اۆتوكولىك, گازبەن جۇرەتىن ورتا كلاستىق اۆتوبۋس الىندى», – دەدى الماتى اكىمى باۋىرجان بايبەك.
ونىڭ ايتۋىنشا, 2017 جىلى 2 ملرد تەڭگەگە گازبەن جۇرەتىن قوسىمشا 250 كولىك الىنادى. وسىلايشا, ءىىد اۆتوپاركى تولىق جاساقتالادى, بۇل مەكەمە جۇمىسىنىڭ شاپشاڭدىعىنا ىقپال ەتەدى.
بۇگىن مەكەمە وكىلدەرىنە 118 اۆتوكولىكتىڭ كىلتى تابىس ەتىلدى: 107 Kia Cerato جەڭىل كولىگى, 5 پاز-32053 اۆتوبۋسى جانە 6 دانا گاز-2705 ارنايى تەحنيكاسى. اتالعان كولىكتەر جەرگىلىكتى بيۋدجەت ەسەبىنەن الىندى. كولىكتەردىڭ قازاقستاندا قۇراستىرىلعانىن دا اتاپ وتكەن ءجون.
«سىبايلاس جەمقورلىق قاۋپىن ازايتۋ ءۇشىن جەرگىلى پوليتسيا قىزمەتكەرلەرىنىڭ تەڭ جارتىسى بەينەتىركەۋىشپەن قامتاماسىز ەتىلەدى. سونىمەن بىرگە, كەلەسى جىلى پاركتەر, ساياباقتار, الاڭدارعا بەينەكامەرالار ورناتۋ جانە ءىىد جەدەل باسقارۋ ورتالىعىن جاڭارتۋ جوباسى باستالادى», – دەپ تۇيىندەدى اكىم.
