2016 جىل ەلىمىزدىڭ اۋىل شارۋاشىلىعى ءۇشىن ۇلكەن وزگەرىستەرگە تولى بولدى.
ەڭ اۋەلى ايتاتىن نارسە, 2013-2020 جىلدارعا ارنالعان «اگروبيزنەس-2020» باعدارلاماسىنىڭ ءبىرىنشى كەزەڭىنىڭ ورىندالۋ ناتيجەلەرى جاريالانىپ, باعدارلامانىڭ ەكىنشى كەزەڭىن ىسكە اسىرۋ باستالدى. رەسپۋبليكانىڭ بىرقاتار وڭىرلەرىندە اۋىل شارۋاشىلىق كووپەراتيۆتەرى قۇرىلا باستادى, قىتاي ۇكىمەتى قازاقستاندىق ەت ونىمدەرىنە شەكتەۋدى الىپ تاستاپ, وتاندىق كاسىپكەرلەرگە قىتايدىڭ نارىعى اشىلدى.
«اگروبيزنەس-2020» باعدارلاماسىنىڭ ءبىرىنشى كەزەڭى اياقتالدى
باعدارلامانىڭ ءبىرىنشى كەزەڭىنە ەسەپ كوميتەتىنىڭ جاساعان مەملەكەتتىك اۋديت قورىتىندىسى جاريالاندى. قۇجاتقا ساي, باعدارلامانىڭ العاشقى 3 جىلىنا رەسپۋبليكالىق بيۋدجەتتەن 1 ترلن 181,9 ملرد تەڭگە بولىنگەن ەكەن. ەسەپ كوميتەتى ونىڭ 53 ملرد تەڭگەسى يگەرىلمەگەنىن ايتادى. جالپى, باعدارلامانىڭ ماقساتى – وتاندىق شارۋالاردىڭ باسەكەلەستىك قابىلەتىن ارتتىرا وتىرىپ, يمپورت ۇلەسىن ازايتۋ, ەسەسىنە وتاندىق ءونىمنىڭ ەكسپورتىن ۇلعايتۋعا جاعداي جاساۋ. وسى ورايدا, جوعارىدا كورسەتىلگەن 1 ترلن 181,9 ملرد تەڭگەنىڭ 80 پايىزعا جۋىعى شاعىن جانە ورتا كاسىپكەرلەرگە جەڭىلدەتىلگەن نەسيە بەرۋ ءۇشىن ەكىنشى دەڭگەيلى بانكتەرگە بەرىلدى. تاعى 880 ملن تەڭگەگە ەلدىڭ ءار وڭىرىندە اۋىل شارۋاشىلىق سالاسىن جەتىلدىرۋ ماقساتىندا ءتۇرلى زەرتحانالار سالىندى.كووپەراتيۆتەردىڭ قۇرىلۋى
اۋىل شارۋاشىلىعى مينيسترلىگى كەلەر جىلدان باستاپ وسى سالاداعى باعدارلامانى سالالىق ەمەس, مەملەكەتتىك ەتىپ قايتا ۇيىمداستىرىپ, 2017-2021 جىلدارعا دەيىنگى اۋىل شارۋاشىلىعىن دامىتۋ باعدارلاماسىن قابىلدادى. باعدارلاماعا ساي, بيىلدان باستاپ رەسپۋبليكانىڭ ءار وڭىرىندە اۋىل شارۋاشىلىعى كووپەراتيۆتەرى قۇرىلىپ, ءوز جۇمىستارىن باستاپ كەتتى. كووپەراتيۆ قۇرۋداعى ماقسات - اۋىلدىق جەردە ءبىردى-ەكىلى مال ۇستاپ وتىرعان شارۋالاردىڭ باسىن بىرىكتىرىپ, ولاردى ءىرى شارۋاشىلىق ەتىپ ۇيىمداستىرۋ. ءبىر ايتا كەتەرلىگى, كووپەراتيۆكە بىرىككەن شارۋالار وزدەرىنىڭ مەنشىك قۇقىعىنان ايىرىلمايدى. تەك كووپەراتيۆكە مۇشە بولا وتىرىپ, مەملەكەتتەن جەڭىلدەتىلگەن نەسيە الۋعا جانە ونىمدەرىن الىپساتارسىز تىكەلەي ساۋدالاۋعا مۇمكىندىك الادى. كووپەراتيۆتەردىڭ قۇرىلۋى اۋىل شارۋالارىمەن قاتار ءىرى كومپانيالارعا دا ءتيىمدى بولىپ وتىر. ماسەلەن, سولتۇستىك قازاقستان وبلىسىنداعى ءسۇت ونىمدەرىن شىعاراتىن وتاندىق كومپانيا قاراعاندى وبلىسى نۇرا اۋدانىندا ەلىمىزدە العاش بولىپ قۇرىلعان كووپەراتيۆتىڭ جانىنا ءسۇت وڭدەيتىن زاۋىت سالعالى جاتىر.قىتاي قازاقستان ەتىنە تىيىمدى الىپ تاستادى
اۋىل شارۋاشىلىعى ۆيتسە-ءمينيسترى گۇلميرا يساەۆا قىركۇيەك ايىنىڭ سوڭىندا قىتاي ۇكىمەتىنىڭ ساپانى قاداعالاۋ, ينسپەكتسيا جانە كارانتين جونىندەگى باس باسقارماسى توراعاسىنىڭ ورىنباسارى مەي كەباومەن ارادا وتكەن كەلىسسوزدىڭ قورىتىندىلارىن جاريالاپ, اتالعان باسقارما قازاقستاننىڭ توعىز وبلىسىن (اقمولا, اقتوبە, باتىس قازاقستان, قاراعاندى, قوستاناي, ماڭعىستاۋ, پاۆلودار, سولتۇستىك قازاقستان وبلىستارى) اۋسىل اۋرۋىنا قارسى يممۋنيزاتسيا جاسالمايتىن تازا ايماق رەتىندە مويىنداعانىن ايتتى. 2013 جىلدان بەرى قازاقستاننىڭ بارلىق وڭىرىنەن قىتايعاا ەت پەن ەت ونىمدەرىن تاسىمالداۋعا تىيىم سالىنعان بولاتىن. بيىل جىل سوڭىنان باستاپ اتالعان توعىز ءوڭىر شارۋالارى قىتاي نارىعىنا ەمىن-ەركىن شىعا الاتىن بولدى.2017-2021 جىلدارعا ارنالعان جاڭا باعدارلاما دايىندالدى
2017-2021 جىلدارعا ارنالعان اۋىل شارۋاشىلىعى باعدارلاماسىنىڭ ماقساتى – مال شارۋاشىلىعىنىڭ تيىمدىلىگى مەن ونىمدىلىگىن 58%-عا دەيىن ارتتىرۋ, اۋىل شارۋاشىلىق ونىمدەرىنىڭ ەكسپورتتىق الەۋەتىن ارتتىرۋ جانە قازاق برەندىن قالىپتاستىرۋ.
وسى ورايدا, مينيسترلىك ازىرلەپ جاتقان باعدارلامادا قۇراما جەم وندىرىسىنە جەكە سەكتور رەتىندە ماڭىز بەرىلگەن. سونىمەن قاتار مال باسىن اسىلداندىرۋ جۇمىستارى دا كۇن تارتىبىنە قويىلعان. ال باسەكەلەستىك قابىلەتىن ارتتىرۋ ءۇشىن اۋىل شارۋاشىلىق ونىمدەرىنىڭ اۋديتورلىق قىزمەتى ىسكە قوسىلماق.
باۋىرجان مۇقانوۆ, "ەگەمەن قازاقستان"
