ۇرىلار جاندارىندا ءجۇر ەكەن

شىمكەنتتىڭ ءبىر توپ تۇرعىنى ورىستەگى مالدارىنىڭ ۇشتى-كۇيلى جوعالىپ كەتە بەرەتىندىگىنەن پولي­تسياعا شاعىمدانعان. وسىن­داي وقيعالار جيىلەپ كەتكەننەن كەيىن قاراتاۋ اۋداندىق ىشكى ىستەر ءبولىمىنىڭ تاجىريبەلى پوليتسەي­لەرىنەن جاساقتالعان جەدەل-تەرگەۋ توبى قۇرىلىپ, شۇعىل ىسكە كىرىسەدى. مۇنداي شۇعىل توپ قۇرىل­عانىنان ونشالىقتى حابارى جوق ۇرىلار قىلمىس ۇستىندە قولعا ءتۇسىپ قالادى. سويتسە, قانشاما وتباسىنىڭ ىرىزدىعىن جەپ, داندايسىپ كەتكەن ۇرىلار الىستان كەلمەپتى, مال ۇرلانعان اۋىلدىڭ ەكى تۇرعىنى بولىپ شىققان. بىرەۋى 1982 جىلى, ەكىنشىسى 1998 جىلى تۋعان كۇدىكتىلەر ەش جەردە جۇمىس ىستەمەيدى ەكەن. جۇمىس ىستەمەيدى ەكەن دەپ بىرەۋ بالا-شاعاسىن باعىپ بەرمەيدى. ال ەڭبەك ەتىپ نان تابۋعا ەكەۋىنىڭ دە ونشالىقتى قۇلقى جوق. سوندىقتان قاۋىپتىلەۋ بولسا دا ۇرلىق جولدى تاڭداپتى. پوليتسەيلەر تەكسەرە كەلگەندە ۇرلىق قۇرىلىمى ءبىر-اق ىزگە قۇرىلعانىن انىقتاعان. تاڭەر­تەڭگىلىك مالدارىن ورىسكە ايداپ سالاتىن تۇرعىندار ونىڭ سوڭىنان سابىلىپ جۇرەتىن قاراۋىل قويمايدى. سوندىقتان ساۋىن سيىرلار بۇزاۋى ءۇشىن كەلگەنىمەن, سۋى, وتى مول جەردەن تورپاق-تانا, ۇساق مال كەتە قويمايدى. وسىنىڭ ءبارىن وي ەلە­گىنەن وتكىزگەن ەكەۋ قۇرىعىن قىلتىڭداتىپ, جۇگەنىن سىلدىرلاتىپ دەگەندەي, كوز بايلانعان شاقتا ورىسكە كەلە قالادى. كىشىگىرىم مالدى قاۋمالاپ ۇستاپ الىپ, ۋاقىت كەڭ بولسا بورشالاپ سويىپ الادى دا ماشيناعا تيەپ تايىپ تۇرادى. قازىر نە كوپ, ارزان ەتكە الارمان كوپ. قايدان الدىڭ دەپ تەرگەپ جات­قان ولار جوق. بازاردا ەت ساتاتىن قاساپ­شىلار وڭاي ولجادان ولسە ايىرىلا ما, تاعى اكەل دەپ جالاڭداپ تۇرادى. «دانىككەن قارساق قۇلاعىمەن ءىن قازادى» دەگەندەي, مالى ۇرلانعان ادامداردىڭ بەيقامدىعى مەن پوليتسەيلەردىڭ جايباراقاتتىعىن پايدالانعان ەكەۋ, ءتىپتى تاپا تال تۇستە دە ورىسكە بارىپ, مال اكە­تەتىندى شىعارعان. كەيىن ولاردىڭ 18 مال ۇرلىعىنا قاتىسى بارلىعى انىقتالعان. بۇگىندە ولاردىڭ ۇستىنەن قىل­­مىستىق كودەكستىڭ 188-بابى (ۇرلىق) بويىنشا قىلمىستىق ءىس قوزعالىپ, قاماۋعا الىندى. ولاردان ۇرلانعان مالدان ءتۇس­كەن اقشانىڭ ءبىر بولىگى قاي­تا­رىلدى. پوليتسەيلەر مال يە­لە­رىنە قىراعى بولۋلارىن تاپسى­رىپ جاتىر. باقتيار تايجان, «ەگەمەن قازاقستان» وڭتۇستىك قازاقستان وبلىسى