باتىس قازاقستاندا پرەزيدەنت شىرشاسى ءوتتى

باتىس قازاقستان وبلىستىق قازاق دراما تەاترىندا ءداستۇرلى پرەزيدەنت شىرشاسى بولىپ, وعان اۋداندار مەن قالادان جەتىم, اتا-انا قامقورلىعىنسىز قالعان, الەۋمەتتىك جاعىنان از قامتىلعان جانە كوپ بالالى وتباسىلاردان شىققان, سونداي-اق ءار سالادا تابىسقا جەتكەن 180 وقۋشى قاتىستى, دەپ حابارلادى قازاقپارات. بالالاردىڭ 126-سى اۋدانداردان كەلسە, 6-ۋى بالالار ءۇيىنىڭ, 15-ءى دامۋ مۇمكىندىگى شەكتەۋلى بالالارعا ارنالعان ارناۋلى مەكتەپ-ينتەرنات تاربيەلەنۋشىلەرى, 9-ى - وبلىستىق مەكتەپتەردىڭ, 24-ءى - ورالداعى ءبىلىم وردالارىنىڭ وقۋشىلارى. شىرشانى اينالا, بي بيلەپ, ءان سالعان جاس جەتكىنشەكتەر ەلباسى نۇرسۇلتان نازارباەۆتىڭ بەينەقۇتتىقتاۋىن تىڭدادى. جاڭاجىلدىق شىرشا بارىسىندا وبلىس اكىمى التاي كولگىنوۆ جەتكىنشەكتەرگە ىزگى تىلەگىن ءبىلدىرىپ, ەلباسىنىڭ قۇتتىقتاۋ حاتىن وقىپ بەردى. ايتا كەتەيىك, بقو ءبىلىم باسقارماسىنان تۇسكەن مالىمەتكە قاراعاندا, جاڭاجىلدىق شىرشانى وتكىزۋگە 15,7 ملن تەڭگە بولىنگەن. ەلباسى اتىنان ءار بالاعا ىشىندە قىسقى كيىم, اياقكيىم, سپورتتىق كيىم, باسقا دا تارتۋ-تارالعىلار بار 80 مىڭ تەڭگەنىڭ سىيلىعى تابىس ەتىلدى.