25 مەدال يەسى

بۇگىندە ەلىمىزدىڭ بالالارى مەملەكەتتىڭ قولداۋى ارقاسىندا كوپتەگەن جەتىستىكتەرگە جەتىپ, كەلەشەكتە وزدەرىنىڭ ەل ءۇمىتىن اقتايتىندارىن اڭعارتىپ ءجۇر. قوعامىمىزدا قالىپتاسقان ىزگىلىكتى ورتادا ەمىن-ەركىن ءوسىپ كەلە جاتقان تالاپتى, العىر ميلليونداعان جاس ۇرپاقتىڭ الداعى ۋاقىتتا ۋاقىت تالابىنا ساي ءوز قام-قارەكەتى, ءوز ءۇنى بولاتىنى ءسوزسىز. قازىرگى تاڭدا تالايعا ۇلگى بولۋعا لايىقتى, كەلەشەگىنەن ءۇمىت كۇتتىرگەن جەتكىنشەكتەر وتە كوپ. ولاردىڭ بارلىعىن قالاي ماقتاساق تا جاراسادى. سولاردىڭ اراسىندا استانانىڭ جاس تۇرعىنى, قازاقتىڭ قاراپايىم بالاسى, ءتۇرلى دودالاردا توپ جارىپ جۇرگەن الماس مۇباراكوۆتىڭ دە بار ەكەنىن ايتقىمىز كەلەدى. بۇگىندە ەلورداداعى جامبىل جاباەۆ اتىنداعى №4 مەكتەپ گيم­نازياسىنىڭ 5 «گ» سىنىبىندا وقيتىن, 6 جاسىنان باستاپ كاراتە سپورتىمەن شۇعىلدانىپ, دومبىرا تارتىپ, ءان شىرقاۋدا دا ەلدىڭ ىقىلاسىنا بولەنە بىلگەن الماس مۇباراكوۆتىڭ سپورتتاعى, ونەردەگى تابىستارى ءبىر باسىنا جەتەرلىك. قارشاداي بالانىڭ ۇلكەندەرشە ەركىن سويلەۋىنەن, ويىن ىرىكپەي جەتكىزە الاتىنىنان ونىڭ تالاي دوداعا قاتىسىپ, شىڭدالىپ, اشىلا تۇسكەنى انىق اڭعارىلادى. «كاراتەدەن قازاقستاننىڭ چەمپيونىمىن, سونداي-اق, استا­نانىڭ 4 دۇركىن جەڭىمپازى اتاندىم. حالىقارالىق تۋرنيرلەردىڭ 2 مارتە كۇمىس جۇلدەگەرى بولدىم. 2016 جىلى ءساۋىر ايىندا پولشانىڭ بىدگوشش قالاسىندا كاراتە-دودان وتكەن VII الەم چەمپيوناتىنىڭ قولا جۇلدەگەرىمىن. قازىرگى تاڭدا بارلىعىن ەسەپتەگەندە 25 مەدال يەگەرىمىن. بۇل مەنىڭ ەل تاۋەل­سىزدىگىنىڭ 25 جىلدىعىنا قوسقان وزىندىك ۇلەسىم دەپ بىلەمىن!» – دەيدى جاس وسكىن. الماسپەن سويلەسە كەلىپ, ونىڭ ونەرگە دە قارا جاياۋ ەمەستىگىن بىلدىك. ول «سالەم, استانا» رەسپۋب­ليكالىق كونكۋرسىنىڭ, «ابىز دومبىرا» استانا قالالىق بايقاۋى­نىڭ, قازاقستان تاۋەلسىزدىگىنىڭ 25 جىلدىعى اياسىندا « ۇلى دالا ۇرپاعى» تاقىرىبىندا ۇيىم­داس­تىرىلعان, ماحامبەتتىڭ جاس ۇر­پاقتارىنا ارنالعان ءى رەسپۋب­ليكالىق بايقاۋىنىڭ جۇلدەگەرى اتانىپتى. قازىر استاناداعى №1 ونەر مەكتەبىنىڭ دومبىرامەن ءان ايتۋ بولىمىندە ءوز تالابىن ۇشتاپ جۇرگەن الماس بيىل «مەن قازاقتىڭ بالاسى» اتتى شىعارماشىلىق ءان كەشىن دە ۇيىمداستىرىپ ۇلگەرىپتى. ول ءوزىنىڭ بۇل كەشىن ەل تاۋەلسىزدىگىنىڭ 25 جىلدىعىنا ارناعان ەكەن. مىنە, قار­شاداي الماستىڭ جەتىستىگى وسىنداي. جولدىباي بازار, «ەگەمەن قازاقستان»