استانادا ماڭىزدى ساياسي قۇجاتتار كورمەگە قويىلدى

استانا قالاسىنىڭ مەملەكەتتىك مۇراعاتىندا ەل تاۋەلسىزدىگىنىڭ 25 جىلدىعىنا ارنالعان «تاۋەلسىزدىك جىلدارىنداعى 25 يگى ءىس» كورمەسى اشىلدى, دەپ حابارلايدى قازاقپارات. ەكسپوزيتسيانى قازاقستان رەسپۋبليكاسى پرەزيدەنتىنىڭ مۇراعاتى مەن استانانىڭ مەملەكەتتىك مۇراعاتى بىرلەسىپ دايىندادى. كورمە اياسىندا تاۋەلسىزدىك جىلدارى ەكونوميكا مەن قوعامعا ەلەۋلى وزگەرىستەر اكەلگەن, حالىقتىڭ ءال-اۋقاتىن جاقسارتقان مەملەكەتتىڭ 25 نەگىزگى سالالىق باعدارلامالارى جايلى اقپارات كەلتىرىلگەن. استانا قالاسىنىڭ مادەنيەت, مۇراعاتتار جانە قۇجاتتاما باسقارماسىنىڭ حابارلاۋىنشا, كورمە 200-دەن استام ماتەريالدى قامتيدى. ولاردىڭ باسىم بولىگىن 1991 جىلعى 10 جەلتوقسانداعى ن.ءا. نازارباەۆتىڭ پرەزيدەنت قىزمەتىنە كىرىسۋىنە ارنالعان قر جوعارعى كەڭەسى سالتاناتتى وتىرىسىنىڭ ستەنوگرامماسى, 1991 جىلعى 16 جەلتوقسانداعى «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» قر كونستيتۋتسيالىق زاڭى, 1991 جىلى 21 جەلتوقساندا بەكىتىلگەن تمد قۇرىلۋى تۋرالى الماتى دەكلاراتسياسى, 1996 جىلى 16 مامىردا تىزىلگەن قر ديپلوماتيالىق قارىم-قاتىناس ورناتقان مەملەكەتتەر ءتىزىمى, «اقمولا قالاسىن قازاقستان رەسپۋبليكاسىنىڭ استاناسى دەپ جاريالاۋ تۋرالى» قازاقستان رەسپۋبليكاسى پرەزيدەنتىنىڭ جارلىعى, «سەمەي يادرولىق سىناق پوليگونىن جابۋ تۋرالى» جارلىق جانە وزگە دە ماڭىزدى ساياسي قۇجاتتار قۇرايدى. سونىمەن بىرگە, كەلۋشىلەر نازارىنا سەمەي پوليگونىنداعى العاشقى يادرولىق سىناق, قازاقستانعا تۇڭعىش ورالمانداردىڭ كەلۋى سىندى سيرەك فوتوسۋرەتتەر, مەملەكەتتىك باعدارلامالاردىڭ جۇزەگە اسۋى تۋرالى ينفوگرافيكالار ۇسىنىلدى. استانا مەملەكەتتىك مۇراعاتىنداعى (اۋەزوۆ كوشەسى, 3) كورمە جەلتوقسان ايىنىڭ اياعىنا دەيىن جالعاسادى.