يزرايلدە پرەمەر-مينيستر بينيامين نەتانياحۋدىڭ قازاقستانعا ساپارى قورىتىندىلاندى, دەپ جازادى ۆۆس.
"يزرايل پرەمەر-ءمينيسترى ەكى ەلدىڭ اراسىنداعى ديپلوماتيالىق قارىم-قاتىناس ورناعان 25 جىلدىڭ ىشىندە العاش رەت قازاقستانعا باردى. ەكىجاقتى كەلىسىمدەردەن باسقا استاناداعى كەزدەسۋدە يزرايلگە يران يسلام رەسپۋبليكاسىنىڭ قارىم-قاتىناسى تالقىلانعان بولاتىن", - دەپ جازادى باسىلىم.
"مەن يران پرەزيدەنتىنە سۇراق قويعىم كەلەدى: نەگە سىزدەر ءبىزدىڭ مەملەكەتكە قوقان-لوقى جاسايسىزدار؟ ەگەر يران ءيزرايلدى كىشكەنتاي جانە قورعانسىز مەملەكەت دەپ ويلاسا, ولار قاتتى قاتەلەسەدى. سوندىقتان, يران تاراپىنا قارىم-قاتىناسىمىزدى ۋشىقتىرماۋعا كەڭەس بەرەمىن", دەگەن بولاتىن نەتانياحۋ استاناداعى ءباسپاسوز كونفەرەنتسياسىندا. نەتانياحۋ نۇرسۇلتان نازارباەۆتىڭ "يراننىڭ قوقان-لوقىسىنا سەنەسىزدەر مە؟" دەگەن سۇراعىنا تەگەراننىڭ كوزقاراسى وزگەرىپ جاتسا, تەك قانا قۋاناتىنىن جەتكىزگەن بولاتىن. سونىمەن قاتار ول اتالعان جيىندا قازاقستان پرەزيدەنتىنە بۇۇ قاۋىپسىزدىك كەڭەسىنە مۇشەلىك ەتۋ ءۇشىن ءيزرايلدىڭ كانديداتۋراسىن قولداۋدى سۇرادى. ۆۆس-ءدىڭ جازۋىنشا, نەتانياحۋدىڭ اقوردادا نۇرسۇلتان نازارباەۆپەن كەزدەسۋىندە كوتەرگەن باستى تاقىرىپتار اراسىندا ەكونوميكالىق قارىم-قاتىناس ورناتۋ مەن قازاقستاننىڭ ءىرى ەنەرگەتيكالىق كومپانيالارىن يزرايل نارىعىنا جانە گاز الۋ ىسىنە تارتۋ بولدى. سونىمەن قاتار يزرايل قازاقستانمەن قارىم-قاتىناس ورناتۋعا تارتىمدى سالالار قاتارىندا اۋىل شارۋاشىلىعى, عىلىم مەن لاڭكەستىككە قارسى كۇرەس بار ەكەنىن ايتتى. ساپاردى قورىتىندىلاۋ بارىسىندا ساراپشىلار نەتانياحۋدىڭ ورتالىق ازياعا ساپارى تەك ەكونوميكالىق ەمەس, ديپلوماتيلىق ماقساتتا دا بولعان دەپ وتىر. ياعني, يزرايل پرەمەر-ءمينيسترى تەك ەكىجاقتى كەلىسىمشارتتارعا قول قويۋدى عانا ەمەس, حالىقارالىق ارەنادا قازاقستان جانە ازەربايجاننىڭ قولداۋىنا يە بولۋدى ماقسات تۇتقان. ەستەرىڭىزگە سالا كەتسەك, نەتانياحۋ استاناداعى جيىندا ء"بىز جۇزەگە اسىرماق تاعى ءبىر جوبا - قازاقستان مەن يزرايل اراسىندا تىكەلەي اۋە رەيستەرىن اشۋ. ادامدار ەكى ەل اراسىندا ەركىن قاتىناۋعا مۇمكىندىك الۋى كەرەك", دەگەن بولاتىن.
