تۇعىرىمىز – توردە!

قازاقتا «ءوزى جاقسى كىسىگە ءبىر ادامدىق ورىن بار» دەگەن اتالى ءسوز بار. قازاقستانىمىز بىرىككەن ۇلتتار ۇيىمىنىڭ قاۋىپسىزدىك كەڭەسىنە 2017-2018 جىلدارعا تۇراقتى ەمەس مۇشە بولىپ سايلانعانىن ەستىگەندە وسى ەستى ءسوز ەسكە تۇسكەن ەدى. البەتتە, ابىروي-بەدەل دەگەن – قاسىقتاپ جينالاتىن دۇنيە. وسى تۇرعىدان العاندا, قازاقستان جىلدار بويى دوستىق پەن بىرلىكتى دارىپتەپ, بەيبىتشىلىك سۇيگىش ساياسات جۇرگىزىپ, الەمدىك قوعامداستىق الدىندا زور بەدەلگە يە بولدى. ءبىزدىڭ ەلدەگى ىنتىماق ۇيا سالعان بەرەكە-بىرلىكتى, شاڭىراعى شاي­قالماعان تۇراقتىلىقتى كورىپ-ءبىلىپ وتىرعان الپاۋىت مەم­لەكەتتەردىڭ قازاقستانعا دەگەن كوز­قاراسى دۇرىس قالىپتاسىپ ۇلگەردى. قازاقستان وزگە تۇگىلى ءوزىنىڭ ماسەلەسىن شەشە الماي وتىرعان ەل بولسا, الەمنىڭ 138 ەلى ءبىر كىسىدەي داۋىس بەرىپ, قاۋىپسىزدىك كەڭەسى سىندى ساياسي ماڭىزى زور ۇيىمعا مۇشە ەتىپ سايلار ما ەدى؟! تاۋەلسىزدىگىن العانىنا نەبارى شيرەك عاسىر عانا وتكەن جاس مەملەكەتتىڭ وسىنشا دەڭگەيگە جەتىپ, الەمنىڭ وزىق ەلدەرى اراسىندا ءوز ورنىن ويىپ العانىن ءوز باسىم تۇڭعىش پرەزيدەنتىمىز نۇرسۇلتان نازارباەۆتىڭ ەسىمىمەن تىكەلەي بايلانىستىرار ەدىم. مۇنى ءبىز عانا ەمەس, كۇللى الەم ايتىپ, مويىنداپ وتىر. ساياساتى سان قىرلى, ۇستانىمى ايقىن ەلدىڭ ەندى جاھاندىق ماسەلەلەردى شەشۋ ىستەرىنە ارالاسۋى – قازاقستان ءۇشىن عانا ەمەس, بۇكىل ازيا, تۇركى دۇنيەسى ءۇشىن دە زور مارتەبە. مۇنىڭ ءوزى بىزدەردىڭ وتانسۇيگىش رۋحىمىزدى اسقاقتاتىپ, مەرەيىمىزدى تاسىتاتىنى ءسوزسىز. ءيا, الەمدىك قوعامداستىق قازاق­ستانعا زور سەنىم ارتتى. مۇ­نىڭ جاۋاپكەرشىلىگىن سەزىنۋدىڭ ءوزى بولاشاققا دەگەن قادامنىڭ نىق بولۋىنا يگى اسەرىن تيگىزەدى دەپ ەسەپتەيمىن. ويتكەنى, ءوزىنىڭ ىشكى شارۋاسىن تاپ-تۇيناقتاي تۇگەن­دەپ وتىرعان ەل تورتكۇل دۇنيەنىڭ نەبىر كۇردەلى ماسەلەلەرى الدىندا دا توسىرقامايدى دەپ سەنەمىن. ءبىز, جاستار ەلباسى, «نۇر وتان» پارتياسىنىڭ ءتورا­عاسى نۇرسۇلتان ءابىش ۇلى نازارباەۆ­تاي كوشباسشىنىڭ ونەگەسىن كورىپ, الەم تانىعان قازاق­ستان سىندى ەلدە ءومىر ءسۇرىپ جاتقا­نىمىزدى ماقتان ەتەمىز! نۇرجان جەتپىسباەۆ, «نۇر وتان» پارتياسى «جاس وتان» جاستار قاناتى قاراعاندى وبلىستىق فيليالىنىڭ توراعاسى