ءداۋىر تاعىلىمدارى

ەل تاۋەلسىزدىگىنىڭ 25 جىلدىعىن مەرەكەلەۋ قارساڭىندا بەلگىلى ساياساتكەر, سەناتور, ساياسي عىلىمدار دوكتورى اقان بيجانوۆتىڭ «ۋروكي ەپوحي» اتتى كىتابى جارىق كوردى. بۇل ەڭبەككە قازاقستان رەسپۋبليكاسىنىڭ تۇڭعىش پرەزيدەنتى, ەلباسى ن.ءا.نازارباەۆتىڭ شيرەك عاسىر ىشىندە مەملەكەتتىلىكتى قالىپتاستىرۋداعى تاريحي ءرولى, مەملەكەتتىك جانە الەۋمەتتىك-ساياسي قۇرىلىس ماسەلەلەرى ارقاۋ بولعان. كىتاپتىڭ ءبىرىنشى تاراۋىندا توپتاستىرىلعان ماتەريالداردا بۇكىل الەمگە «قازاقستاندىق دامۋ جولى» دەگەن اتپەن تانىلعان مەملەكەتتىلىك ورناتۋ ۇدەرىستەرى جايىندا ەگجەي-تەگجەيلى بايان­دالادى. اۆتور ءوز ەڭبەگىندە بيىك بەلەستەرگە باستاعان دامۋ­دىڭ وسى ۇلگىسى ەلباسىنىڭ سترا­تە­گيالىق كورەگەندىگىنىڭ جانە ساياسي كوشباسشىلىعىنىڭ جەمىسى ەكەندىگىن اتاپ وتەدى. قازاقستانداعى پارلامەنتاريزم ينستيتۋتىنا ارنالعان ەكىنشى تاراۋ تەوريالىق جانە تانىمدىق تۇرعىدان وتە تارتىمدى. اقان قۇسايىن ۇلى قازىرگى وتاندىق پارلامەنتاريزمنىڭ تاريحي تامىرلارىن اشىپ كور­سەتەدى, ونىڭ بۇگىنگى جاي-كۇيىنە, دامۋ پەرسپەكتيۆالارىنا, پارلامەنتاريزمنىڭ قوعام ومىرىندەگى رولىنە تالداۋ جاسايدى, پارلامەنتتىك ديپلوماتيانىڭ نەگىزگى باعىتتارى تۋرالى باياندايدى. ءۇشىنشى تاراۋدا اۆتوردىڭ ءىس ۇستىندەگى ساياساتكەر ءارى زاڭ شى­عارۋعا تىكەلەي قاتىسى بار دەپۋتات رەتىندە ءوزى ەتەنە ارالاسىپ كەلە جاتقان الەۋمەتتىك-ەكونوميكالىق ساياساتتىڭ وزەكتى ماسەلەلەرىنە بايلانىستى ۇستانىمدارى كورىنىس تاپقان. بۇل رەتتە رەفورمالاردىڭ الەۋمەتتىك-ساياسي قىرلارى, مەملەكەتتىڭ, بيزنەستىڭ جانە ازا­ماتتىق قوعامنىڭ ءوزارا باي­لانىسىنىڭ ماسەلەلەرى, ءما­دەني ساياسات تۇجىرىمداماسى, ازاماتتاردىڭ رۋحاني تاربيەسى سياقتى پروبلەمالار تىلگە تيەك ەتىلگەن. وسى ىرگەلى تاقىرىپتار اۆتور ءوزى ەرەكشە سەزىممەن قا­رايتىن الماتى قالاسىنىڭ تاريحى مەن دامۋ جولدارىمەن ۇيلەستىرىلگەن. تۇتاستاي العاندا, كىتاپ تال­دامالىق-تاعىلىمدىق, قول­دانبالى جانە عىلىمي سيپاتتا جازىلعان. ماقالالاردا ءتاۋ­ەلسىز قازاقستاننىڭ جاڭا تا­ريحىنداعى بارلىق كەزەڭدەر, سان قىرلى, كۇردەلى الەۋمەتتىك-ساياسي, عىلىمي-مادەني جانە قۇقىقتىق ۇدەرىستەر قام­تىلعان. اۆتور پرەزيدەنت ن.ءا.نازارباەۆتىڭ سالماقتى دا سالي­قالى باسشىلىعىمەن تابىستى جۇزەگە اسىپ وتىرعان الەۋ­مەتتىك جانە مەملەكەتتىك قۇ­رىلىستىڭ ەرەكشەلىكتەرىن اشىپ كورسەتىپ, قازاقستاننىڭ وزىندىك كەلبەتىن ايقىندايتىن پرەزيدەنتتىك باعدار تۇرعىسىنان بۇدان بىلايعى دامۋ باعىتتارىنا توقتالادى. جالپى العاندا, كىتاپ قالىڭ وقىرمانعا, ساراپشى-عىلى­مي جۇرتشىلىققا جانە مەم­لەكەتتىك قىزمەتشىلەرگە, تاۋەلسىز قازاقستاننىڭ ساياسي تاريحى قىزىقتىراتىن بارشا قاۋىمعا ارنالعان. جاقسىباي سامرات, «ەگەمەن قازاقستان»