شىعىس قازاقستاننىڭ ۇشبۇلاق اۋىلىندا مەكتەپ اشىلدى

ەل تاۋەلسىزدىگىنىڭ 25 جىلدىق مەرەيتويى قارساڭىندا كۇرشىم اۋدانىنىڭ ۇشبۇلاق اۋىلىندا جاڭا مەكتەپ اشىلدى. ەلىمىزدىڭ شالعاي شەكارالىق شەبىندە جاتقان ەلدى مەكەندەگى جاڭا نىساننىڭ اشىلۋ سالتاناتىنا وبلىس اكىمىنىڭ ءبىرىنشى ورىنباسارى نۇرىمبەت ساقتاعانوۆ قاتىسىپ, تۇرعىنداردى تاۋەلسىزدىك مەرەكەسىمەن قۇتتىقتادى. "25 جۇلدىزدى كۇن" شاراسى اياسىندا اشىلعان 80 ورىندىق جاڭا مەكتەپتىڭ بيولوگيا, حيميا, فيزيكا پاندەرىنە ارنالعان سىنىپتارى مەن زەرتحانالارى سوڭعى ۇلگىدەگى تەحنيكالىق قۇرالدارمەن جابدىقتالعان جانە ينتەراكتيۆتى تاقتامەن, كومپيۋتەر سىنىبىمەن قامتاماسىز ەتىلگەن. مەكتەپ قۇرىلىسىنا 240 ميلليون تەڭگەگە جۋىق قاراجات جۇمسالدى. كۇرشىم اۋدانىنىڭ اكىمى سەيسەنعازى چۋكاەۆتىڭ ايتۋىنشا, تاۋەلسىزدىكتىڭ شيرەك عاسىرى ىشىندە كۇرشىم-مارقا وڭىرىندە 16 جاڭا مەكتەپ بوي كوتەردى. «ەلباسى نۇرسۇلتان نازارباەۆتىڭ: ء«بىز ءبىلىم-عىلىم سالاسىندا باسەكەگە قابىلەتتى بولماساق, ءوز ماقساتىمىزعا جەتە المايمىز. بارلىعى مەكتەپتەن, ال قازاقستان ءۇشىن اۋىل مەكتەبىنەن باستالادى» دەگەن ءسوزى بار. ياعني, مەملەكەت باسشىسى اتاپ وتكەندەي, بولاشاعىمىزدىڭ جارقىن بولۋى كەلەشەك ەل تىزگىنىن ۇستايتىن بۇگىنگى ۇرپاقتىڭ ەنشىسىندە. سوندىقتان, ەلىمىزدە جاس بۋىننىڭ ءبىلىم الۋىنا بارلىق جاعداي جاسالىپ وتىر», – دەدى اۋدان باسشىسى. ۇشبۇلاق اۋىلىنىڭ بايىرعى تۇرعىنى, تىل ارداگەرى مۇحتارحان اقپىشەۆ كەشەگى زاماننان بۇگىنگى كۇننىڭ وزعانىن, تاۋەلسىزدىكتىڭ ەل باعىنا بەرىلگەن ەرەكشە قاستەرلى قۇندىلىق ەكەنىن جەتكىزدى. سونىڭ ءبىر جارقىن كورىنىسى – ۇشبۇلاقتىق بالالارعا ءبىلىم بەرەتىن زاماناۋي مەكتەپتىڭ پايدالانۋعا بەرىلگەنى ەكەنىن ايتىپ ءوتتى اۋىل اقساقالى. 1998 جىلى قۇرىلعان مارالدى اۋىلدىق وكرۋگىندە مارالدى,ۇشبۇلاق, قىستاۋ-كۇرشىم اتتى ءۇش ەلدى-مەكەن بار. 1 جارىم مىڭنان استام ادام تۇراتىن وكرۋگتە 9 سەرىكتەستىك پەن 45 شارۋا قوجالىعى جۇمىس ىستەيدى. دۋمان اناش, "ەگەمەن قازاقستان"