ايگىلى بالۋاننىڭ ۇرپاقتارىنىڭ ۇيىمداستىرۋىمەن قولعا الىنعان جارىسقا تارباعاتاي, زايسان اۋداندارى مەن سەمەي جانە الماتى قالالارىنان ۇزىن سانى 115 بالۋان قاتىستى. وقۋشىلار 8 سالماقتا شەبەرلىك بايقاسسا, 16 جىگىت «تۇيە بالۋان» سايىسىنىڭ كورىگىن قىزدىردى. جيىرما ءتورت جىلدان كەيىن جاڭعىرعان بىرىنشىلىكتە اۋىل, اۋدان, وبلىس دەڭگەيىندە جۇلدە الىپ جۇرگەن بالۋانداردان بولەك ەكى بىردەي ازيا چەمپيونى كىلەمگە شىقتى. بارىنەن دە بالپ-بالپ باسقان تۇيە بالۋانداردىڭ اقتىق باسەكەلەرى تارتىستى بولدى. قازاق كۇرەسىنەن ازيا چەمپيونى, سالماعى 78 كيلو بەكزات ماناسپاەۆ فينالدا 130 كيلو تارتاتىن بيحا قىدىرمەن بەلدەسىپ, ايلاسىن اسىرىپ, تارباعاتاي اۋدانىنىڭ تۋماسى نۇرلان ماناقوۆ وسى تۋرنيرگە ارنايى تىكتىرگەن اۋىسپالى بەلدىكتى تاعىندى.
تارباعاتاي اۋدانىنداعى مارات يماشەۆ اتىنداعى سپورت مەكتەبى ديرەكتورىنىڭ ورىنباسارى, جارىستىڭ تورەشىسى حاميت ىدىرىشەۆ بۇل بىرىنشىلىكتىڭ العاش رەت ۇيىمداستىرىلسا دا, جوعارى دارەجەدە بولعانىن تىلگە تيەك ەتىپ, الداعى جىلدارى وبلىستىق دەڭگەيدە وتكىزۋدى جوسپارلاپ وتىرعاندارىن جەتكىزدى.
«1993 جىلى مولداباي بالۋاننىڭ قۇرمەتىنە تۋرنير وتكەن بولاتىن. سودان بەرى ارادا جىلجىپ 24 جىل ءوتىپتى. مولداباي بالۋاننىڭ داڭقى پەن داقپىرتىن جۇرتشىلىققا تانىستىرىپ جاتۋ ارتىق بولار. دەگەنمەن سوڭعى جىلدارى ەرەن كۇش يەسىنىڭ ەسىمى ۇمىتىلا باستاپ ەدى. ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسىنداعى ء«اربىر ولكەنىڭ حالقىنا سۋىقتا پانا, ىستىقتا سايا بولعان, ەسىمدەرى ەل ەسىندە ساقتالعان ءبىرتۋار پەرزەنتتەرى بار. وسىنىڭ ءبارىن جاس ۇرپاق ءبىلىپ وسۋگە ءتيىس» دەگەن سوزىندە ۇلكەن ءمان جاتىر. بۇل جارىسقا قاتىسقان اۋىلدىڭ قارا دومالاقتارى اراسىنان ەرتەڭ وليمپيادا چەمپيوندارى شىعىپ جاتسا, نۇر ۇستىنە نۇر ەمەس پە؟!», - دەيدى اتالعان جارىستى ۇيىمداستىرۋشى, مولداباي بالۋاننىڭ ۇرپاعى ارداق قاسەنوۆ.
سايىس كەزىندە ەكپىن اۋىلىندا تۇراتىن مولداباي بالۋاننىڭ نەمەرە ءىنىسى بولاتحان مۇقىشەۆتى جولىقتىردىق. اعامىز باتىر تۇلعالى اتاسىن بالا كەزىندە كورگەنىن ايتىپ, اناسىنان ەستىگەن ەستەلىكتەرمەن ءبولىستى.
«مولداباي اتامىز قازاق بالۋاندارىمەن عانا كۇرەسكەن جوق. 19 جاسىندا شىنجىرلى, نوقتالى قىتاي بالۋانىنىڭ قابىرعاسىن قاقىراتىپ, تىزەسىن بۇكتىرگەن. شەت, شيقۋ, ماناس, قىزايعا دەيىن بارىپ, اتاقتى بالۋانداردىڭ ءبارىن جىقتى. وسكەمەن, سەمەي وڭىرىندە بۇل كىسى قارسىلاس شاق كەلتىرمەگەن. ايگىلى بورانقۇل بالۋان البىرت شاعىندا مولداكەڭمەن كۇرەسپەكشى بولعاندا, ەكى رەت يىعىنان باسىپ, تىزەسىن بۇكتىرىپ, ء«ۇشىنشى رەت باسپايىن, تاۋىڭ شاعىلىپ, باعىڭ قايتار» دەپ ءوزىنىڭ اق باتاسىن بەرگەن ەكەن. 1924 جىلى مولداباي بالۋان زايسان قالاسىندا قاجىمۇقانمەن كەزدەسكەن. بىراق كۇرەسپەگەن. قاجەكەڭ مولداكەڭنىڭ جاسىن سىيلاپ, تەزەك قيسىقوۆتىڭ وزىنە سىيلاعان شۇبار اتىن سىيعا تارتىپتى. وسى ات بالۋان دۇنيەدەن وتكەندە جانازاسىنا سويىلدى», – دەدى بالۋاننىڭ نەمەرە ءىنىسى.
ازامات قاسىم,
«ەگەمەن قازاقستان»
شىعىس قازاقستان وبلىسى,
تارباعاتاي اۋدانى
