− 50-ءشى جىلداردىڭ ىشىندە مەنىڭ تۋعان اۋىلىمدا قۇيىنداتقان قارا داۋىل سوعىپ, اۋىلدى ەسىنەن تاندىرعان ەكەن. مەن وندا بەستاۋ دەگەن جەردە مەكتەپتە وقيتىنمىن. بولەگەن بالاسىمەن بىرگە بەسىكتى, كۇبىنى دومالاتىپ كەتىپتى, − دەپ اڭگىمە تيەگىن اعىتقان سەرىكباي اعا.
قۇيىننىڭ كۇشتىلىگى سونداي, الامان-تاسىردان اۋىلداعىلار نە بولىپ, نە قويعانىن بىلمەي قالسا كەرەك. ول كەزدە قاي اۋىلدا دا كوبىنە كيىز ءۇي, قوس تىگىپ وتىراتىن. قۇيىن كيىز ۇيلەردى جىعىپ, ناشارلاۋ قوستاردى ۇشىرىپ, سۇيرەتىپ تاستاعان. داۋىل باسىلعان سوڭ, بەكبولات دەگەن كىسىنىڭ ۇيىندەگىلەر «بەسىك قايدا؟» دەپ ءبىر-بىرىنەن سۇرايدى عوي. قۇيىن كوتەرىپ اۋدەم جەرگە اپارىپ تاستاعان بەسىككە جانۇشىرا جۇگىرىپ بارسا, بالا ساپ-ساۋ, ىشىندە ۋىلدەپ ويناپ جاتىر دەيدى. سول بالا –جەتپىسباي بەكبولات ۇلى − قازىر ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ كافەدرا مەڭگەرۋشىسى, پروفەسسور.
وسى اڭگىمەنى ەستىسىمەن ءبىز الماتىداعى جەتپىسباي اعامىزعا حابارلاستىق.
− ءيا, ءبىزدىڭ شيلىدە قۇيىنداتقان قارا داۋىل 1956 جىلى بولىپتى. مەنىڭ ءبىر جاس شاماسىنداعى كەزىم ەكەن, بەسىككە بولەپ تاستاعان عوي. ءوزىمنىڭ ءشاريپا اجەم سول اپاتتان «پەرىشتە قاعىپ» امان قالعانىمدى ايتىپ وتىراتىن, – دەيدى جەتپىسباي بەكبولات ۇلى. ءبىز سول قۇيىندى داۋىل تۋرالى بىلەتىندەردى ودان ءارى ىزدەستىردىك. ول كەزدە ويىنعا تويماي جۇرەتىن بالالاردىڭ ءوزى بۇگىندە جەتپىس پەن سەكسەننىڭ اراسىنداعى كىسىلەر.
− مەن سىرتتا وقۋدا بولاتىنمىن. سونداي داۋىل, قۇيىن قىركۇيەك, قازان ايىنىڭ شاماسىندا بولعانىن اۋىلداستاردىڭ ايتقانى ەسىمدە. بەسىكتەگى ءىنىم جەتپىسبايدىڭ دەنەسىنە سىزات تۇسپەي امان قالعانى دا, كۇبىدەگى قىمىزدىڭ توگىلمەگەنى دە راس. ول كەزدە ءشيلىنىڭ بوگەتىنەن سۋ جىبەرىپ, شارۋاشىلىق دالاعا قاۋىن, قاربىز ەگەتىن. قۇيىن ولاردى پالەگىمەن, تامىرىمەن قوسىپ ج ۇلىپ اكەتكەن. ءبىزدىڭ ءۇيدىڭ شاڭىراعى دا, ۋىعى دا مىقتى بولاتىن. ادەتتە داۋىل, قاتتى جەل باستالىپ كەلە جاتقاندا ءۇيدى ءتورت جاعىنان قازىق قاعىپ بايلاپ تاستايتىن. بۇل جولى بىردەن كوتەرىلگەن داۋىل سول مىقتى ءۇيدى دە جىعىپتى عوي, − دەيدى بۇگىندە سەكسەننەن اسىپ وتىرعان كارىمجان بەكبولات ۇلى اقساقال.
جەتپىسباي بەكبولات ۇلى بالانىڭ قانداي اپاتتان دا امان قالۋىن تورعايدىڭ قاسيەتتى جەرىنىڭ, بابالار ارۋاعىنىڭ جەبەگەنىنەن دەپ بىلەدى.
− وسىدان ونشاقتى جىل بۇرىن ءشاريپا اجەمنىڭ ءادىلجان دەگەن شوبەرەسى 2-3 جاسىندا اۋىر كولىك اپاتىنان امان قالدى. بالا كولىكتەر بەتپە-بەت سوعىسقاندا ۇشىپ كەتىپ, تاس جولعا ءدىن امان تۇسكەن, ءتىپتى قولىنداعى شەمىشكەسىنىڭ ءوزى توگىلمەپتى. تورعايدىڭ رۋحاني ۇستازدارى سوناۋ ىقىلىم زاماننان ۇرپاقتى يماندىلىققا تاربيەلەگەن, مەنىڭ ءشاريپا اجەم دە سولاردىڭ الدىن كورگەن تاقۋا جان بولاتىن. مەنىڭ ءوز باسىمدى, ءۇرىم-بۇتاعىن اسىل ارۋاعى ءالى كۇنگە جەلەپ-جەبەپ كەلە جاتقانداي سەزىنەمىن, − دەيدى جەتپىسباي اعا.
تابيعاتتىڭ بىزگە اشىلماعان تىلسىم سىرى جەتەرلىك.
ءنازيرا جارىمبەتوۆا,
«ەگەمەن قازاقستان».
قوستاناي
