وڭىرىمىزدە بيلەتتەردىڭ ساتىلۋى جونىنەن جارقايىڭ جانە ەرەيمەنتاۋ اۋداندارى الدا كەلەدى. ال ستەپنوگور قالاسىندا جالپى باعاسى 13,2 ملن تەڭگە بولاتىن ءۇش مىڭ بيلەت ساتىلىپتى. قازىرگى تاڭدا اقمولا وبلىسىنىڭ بۇلاندى, اتباسار, ساندىقتاۋ جانە ەگىندىكول اۋداندارىندا بيلەت الۋشىلار قاتارى كوبەيدى. جەرگىلىكتى تۇرعىندارعا اۋقىمدى شارانىڭ ماڭىزىن ءتۇسىندىرۋ ءۇشىن اكىمدەرگە دە قۇلاققاعىس ەتىلدى.
«وزدەرىڭىزدىڭ شارۋاشىلىق سۋبەكتىلەرىڭىزدە بەلسەندى ۇندەۋ جۇرگىزىڭىزدەر, ەكسپو-2017 مامانداندىرىلعان كورمەسىنىڭ ماڭىزىن تۇرعىندارعا جەتكىزىڭىزدەر. بۇل – بيىلعى جىلعى ەلىمىز, ياعني ءوزىمىز ءۇشىن دە ۇلكەن وقيعا. قازاقستاننىڭ ءاربىر تۇرعىنى ءۇشىن مۇنشالىقتى اۋقىمدى شاراعا قىزىعۋشىلىعى جانە بارۋعا ىنتاسى بولۋى ءتيىس», دەيدى وبلىستىق تۋريزم باسقارماسىنىڭ باسشىسى شىناربەك باتىرحانوۆ. ال بۋراباي اۋدانىنىڭ اكىمى تولەگەن تاشماعانبەتوۆ كۋرورت ايماعىنا شامامەن 1 ملن 800 مىڭ ءتۋريستىڭ كەلەتىنىن بولجاپ وتىر. ونىڭ مالىمەتىنە قاراعاندا, قوناقتاردى قارسى الاتىن 154 نىسان بار. مەيمانحانالار, مەيمانحانالىق ۇيلەر, تۋريستىك بازالار جانە ساناتوري-كۋرورتتىق جايلار تۋريستەردى بارىنشا جاقسى كۇتىپ الۋعا دايىن تۇر ەكەن.
اسقار تۇراپباي ۇلى,
«ەگەمەن قازاقستان»
اقمولا وبلىسى
