جۋىردا عانا ەلوردا تورىندە ەلباسىنىڭ توراعالىعىمەن وتكەن قازاقستان حالقى اسسامبلەياسىنىڭ XXV سەسسياسىندا ەلدىڭ ساياسي-ەكونوميكالىق, مادەني-رۋحاني ومىرىندە اسسامبلەيانىڭ الاتىن ورنى اۋقىمدى ەكەنى كەڭىنەن ايتىلدى. ەلباسى ءوز سوزىندە: ء«بىرىنشى. تۋعان جەر جوباسى اسسامبلەيا ءۇشىن زور مۇمكىندىكتەرگە جول اشىپ بەرەدى. ەكىنشى. «قازاقستاننىڭ 100 جاڭا ەسىمى» جوباسىنا اسسامبلەيا تىكەلەي قاتىسىپ, باسى-قاسىندا ءجۇرۋى كەرەك. ءبىزدىڭ قانشاما زامانداستارىمىز, قانشاما اسسامبلەيا بەلسەندىلەرى ەل يگىلىگى ءۇشىن رياسىز قىزمەت ەتىپ ءجۇر. ۇلتىنا, قاي وڭىردەن ەكەنىنە, جىنىسىنا قاراماستان, ءبىز ولاردىڭ بارلىعىن ەلگە تانىتا ءبىلۋىمىز كەرەك», – دەگەن بولاتىن. بۇگىنگى باسقوسۋدىڭ نەگىزگى ماقساتى – سوندا ايتىلعان ويلار مەن جۇكتەلگەن مىندەتتەردى جۇيەلى تۇردە جۇزەگە اسىرۋدىڭ جولدارىن ىزدەۋگە ارنالدى.
– ەلباسى قازاقستان حالقى اسسامبلەياسىنا زور سەنىم ارتىپ كەلەدى. سول سەنىمنىڭ مەجەسىنەن شىعۋ ءۇشىن ەل يگىلىگى جولىندا ادال قىزمەت اتقارىپ, تاۋەلسىز وتانىمىزدىڭ گۇلدەنۋىنە ءبارىمىز قالتقىسىز قىزمەت ەتۋىمىز قاجەت. تۇراقتىلىق پەن دامۋ, تاتۋلىق پەن دوستىق – بارىمىزگە ورتاق قاستەرلى قۇندىلىقتار. پرەزيدەنتىمىز اسسامبلەيانىڭ الەۋەتىن ارتتىرۋدا قالالار مەن وبلىستار باسشىلارىنا بىرقاتار تاپسىرمالار بەرىپ, بىرنەشە ماڭىزدى جوبانى بىرلەسە ىسكە اسىرۋدى تاپسىردى. 2018 جىلى قازاقستان حالقى اسسامبلەياسىنىڭ كوپ فۋنكتسيالى مۋلتيمەديالىق پورتالىن اشۋدى, «قازاقستان حالقى» ينتەراكتيۆتى تاريحي كارتاسىن جاساۋدى قولعا الۋ كەرەكتىگىن ايتتى. كاسىپكەرلەر مەن بيزنەس, شىعارماشىلىق جانە عىلىمي زيالى قاۋىم وكىلدەرىن «تۋعان جەر» جوباسىنا قاتىسۋعا جانە ءوز اۋىلداستارىن قولداۋ ماقساتىندا كۇش جۇمىلدىرۋعا شاقىردى. ءاربىر اسسامبلەيا مۇشەسىنىڭ كوكەيىندە جۇرگەن ارمان-تىلەكتىڭ تامىرىن تاپ باستى. سوندىقتان, العا قويعان ماقسات-مىندەتتەردى, ەلباسىنىڭ تاپسىرمالارىن ورىنداۋدا تاباندىلىق تانىتا بىلەيىك. سونداي-اق, جاڭا ورىنباسارلار تاعايىندالىپ, ولارعا زور جاۋاپكەرشىلىك جۇكتەلدى. سول سەنىم جۇگىن تالماي كوتەرەيىك, – دەدى قازاقستان حالقى اسسامبلەياسى توراعاسىنىڭ ورىنباسارى – قحا حاتشىلىعىنىڭ مەڭگەرۋشىسى دارحان مىڭباي.
شارا بارىسىندا قحا-عا قاراستى ەتنومادەني بىرلەستىكتەردىڭ باسشىلارى دا ءسوز الىپ, الداعى ۋاقىتتا اتقارىلاتىن شارۋالاردىڭ جوسپارىن ورتاعا سالدى. «تاتۋلىق پەن بىرلىك ءبىزدىڭ باستى ۇرانىمىز», دەگەن اسسامبلەيا مۇشەلەرى ورتاق ماقسات جولىندا كۇش بىرىكتىرۋ كەرەكتىگىن ايتىپ, دوستىق ۇيىنەن جوعارى كوڭىل كۇيمەن تاراستى.
ارمان وكتيابر,
«ەگەمەن قازاقستان»
الماتى
