«كانەلوعا» قارسى جەكپە-جەكتە ول گەننادي گولوۆكين بولىپ قالۋى كەرەك. دجەيكوبسقا قارسى كەزدەسۋدە ول بىرنارسەنى دۇرىس ىستەمەدى دەپ ايتا المايمىن. مەن قايتا دەنيەلدى كەرەمەت قارسىلاس بولا ءبىلدى دەپ ايتار ەدىم. سوندىقتان بۇل جولى GGG ءوز وزىمەن بولىپ «كانەلونى» سوققىعا جىعۋى ءتيىس. وسىنىڭ ارقاسىندا بوكس تا جاڭا ءبىر كەزەڭگە كوتەرىلەدى دەگەن ويدامىن», دەدى ابەل سانچەس.
ساۋل «كانەلو» الۆارەستىڭ پروموۋتەرى وسكار دە لا حويانىڭ ايتۋىنشا, مەكسيكالىق بوكسشى كىشى فلويد مەيۋەزەردەن جەڭىلگەننەن كەيىن تاجريبەسى تولىسقان ۇزدىك بوكسشىلاردىڭ ءبىرى بولدى.
«جانكۇيەرلەر ۇلكەن بوكس كەشىنە كۋا بولارى انىق. مۇنداي ايقاستىڭ وتپەگەنىنە كوپ بولدى. شارشى الاڭدا ەشقاشان جەڭىلىپ كورمەگەن گەننادي گولوۆكين مەن كىشى فلويد مەيۋەزەرگە عانا ەسە جىبەرگەن نوكاۋتشى ساۋل الۆارەس كەزدەسەدى. كىشى فلويدتان ۇتىلعاننان كەيىن «كانەلو» كوپ نارسەنى ۇيرەندى. رينگكە شىققان سايىن تاجىريبەسى مولايا ءتۇستى. مۇنداي كەزدەسۋ كۇندە وتە بەرمەيدى», دەپ جاريالادى Boxingscene.com.
وسكار دە لا حويا سونداي-اق, قوس بوكسشىنىڭ جەكپە-جەگى وتكىزۋ ءۇشىن بىرىككەن اراب امىرلىگىنەن ۇسىنىس تۇسكەنىن دە اتاپ ءوتتى.
«ماعان بوكس كەشىن ۇيىمداستىرۋ ءۇشىن دۋبايدان, ارتىنشا ۇلىبريتانيادان حابارلاسقاندار بولدى. بۇل ايقاس بۇكىل الەمگە قىزىق بولىپ وتىر. ءىستىڭ انىق-قانىعى كەلىسسوزدەر باستالعاننان كەيىن, ياعني الداعى اپتالاردا بەلگىلى بولادى», دەپ حابارلادى ESPN باسىلىمى.
قازىرگى ۋاقىتتا گولوۆكين-الۆارەس كەشىن ۇيىمداستىرۋ ءۇشىن نەگىزىنەن ءۇش ارەنا قاراستىرىلىپ وتىر. ولار لاس ۆەگاستاعى T-Mobile (جاقىندا عانا كىشى حۋليو سەزار چاۆەس پەن ساۋل الۆارەس كەزدەسۋى وتكەن ورىن) كەشەنى, نيۋ-يوركتەگى Madison Square Garden (گولوۆكين-دجەيكوبس كەزدەسۋى وتكەن ورىن) ارەناسى جانە داللاستاعى AT&T Stadium ستاديونى.
سونىمەن قاتار, وسى كەشتى ۇيىمداستىرۋعا لاس-ۆەگاستاعى MGM Grand جانە لوس-اندجەلەستەگى Staples Center ارەنالارى دا قىزىعۋشىلىق تانىتىپ وتىر. جەكپە-جەك اقش-تان وزگە ەلدەردە دە ءوتۋى مۇمكىن. ولار: لوندونداعى «ۋەمبلي» جانە مەحيكوداعى «اتستەكا» ستاديوندارى.
ال «كانەلونىڭ» كومانداسى لاس-ۆەگاستاعى «T-Mobile» ارەناسىندا وتكىزۋگە نيەت ءبىلدىرىپ وتىر. وسى ماقساتتا ولار نەۆادا شتاتىنىڭ اتلەتيكالىق كوميسسياسىنا سۇرانىس جىبەردى.
ەستەرىڭىزگە سالا كەتەيىك, بوكس كەشى 16 قىركۇيەككە جوسپارلانىپ وتىر. بۇل ايقاسقا گەننادي گولوۆكين WBC, WBA (Super), IBF جانە IBO بەلبەۋلەرىن, ال ساۋل الۆارەس The Ring جۋرنالىنىڭ بەلبەۋىن ساراپقا سالماق. ايتا كەتەرلىگى, مەكسيكالىق بوكسشى دۇنيەجۇزىلىك بوكس كەڭەسىمەن (WBC) بولعان جانجالدان كەيىن وسى ۇيىمنىڭ تيتۋلىنان باس تارتىپ وتىر.
دايىنداعان: ايان ءابدۋالي, «ەگەمەن قازاقستان»
