كەلىسسوزدەرگە, بۇعان دەيىن حابارلاعانىمىزداي, سيريا ۇكىمەتىنىڭ, سيريا قارۋلى وپپوزيتسياسىنىڭ دەلەگاتسياسى, ۇرىس ءىس-قيمىلدارىن توقتاتۋ رەجىمىنىڭ كەپىل مەملەكەتتەرى – يران يسلام رەسپۋبليكاسى, رەسەي فەدەراتسياسى مەن تۇرىك رەسپۋبليكاسىنىڭ دەلەگاتسيالارى, بىرىككەن ۇلتتار ۇيىمى, يوردان حاشيميتتىك كورولدىگى مەن امەريكا قۇراما شتاتتارىنىڭ جوعارى دەڭگەيلى وكىلدەرى قاتىستى.
ەكى كۇنگە سوزىلعان كەزدەسۋ بارىسىندا قول جەتكىزىلگەن قورىتىندىلار بارلىق تاراپتاردىڭ قاتىسۋىمەن وتكەن پلەنارلىق وتىرىستا جاسالدى. پلەنارلىق وتىرىستا ءسوز العان ەلىمىزدىڭ سىرتقى ىستەر ءمينيسترى قايرات ءابدىراحمانوۆ قازاقستان پرەزيدەنتى نۇرسۇلتان نازارباەۆتىڭ تىكەلەي قاتىسۋىمەن جانە تولىق قولداۋىمەن باستالعان استانا پروتسەسى جەنەۆا كەلىسسوزدەرىن مازمۇندىق جاعىنان تولىقتىراتىن ماڭىزدى الاڭعا اينالعانىن اتاپ ءوتتى.
«3 ناۋرىزدا استانا پروتسەسىنىڭ ءۇشىنشى راۋندى وتكەننەن بەرگى ۋاقىت ىشىندە سيريادا بىرقاتار قايعىلى وقيعا ورىن الدى, سيرياداعى احۋالعا قىسىم كۇشەيدى. سونىمەن قاتار, استانا پروتسەسىنىڭ دە ءرولى ايتارلىقتاي ءوستى. سيرياداعى احۋالدىڭ ودان ءارى ۋشىعۋى تاراپتاردىڭ ەشقايسىسىنىڭ مۇددەسىنە ساي كەلمەيدى. قازىرگى تاڭدا, ەڭ ءبىرىنشى كەزەكتە اتىستى توقتاتۋ رەجىمىن ساقتاۋ, استانادا قول جەتكىزىلگەن كەلىسىمدەردى جۇزەگە اسىرۋ وتە ماڭىزدى دەپ سانايمىز. وسى جولى كەلىسسوزدەردىڭ ءتورتىنشى راۋندىنا بارلىق كەپىل مەملەكەتتەردىڭ جانە بارلىق مۇددەلى تاراپتاردىڭ جوعارى دەڭگەيدەگى جاۋاپتى تۇلعالارى قاتىسقانىن اتاپ وتكىم كەلەدى», – دەدى مينيستر.
قايرات ءابدىراحمانوۆ ايتىپ وتكەندەي, استانا پروتسەسىنىڭ باستى ءارى جالعىز ماقساتى – اتىس قيمىلدارىن توقتاتۋ رەجىمىن قولداۋ ءارى نىعايتۋ ارقىلى سيريادا قانتوگىستى توقتاتۋ بولىپ تابىلادى.
حالىقارالىق كەلىسسوزدەر بارىسىندا سيرياداعى زورلىق-زومبىلىقتى توقتاتۋ, بىرلىك پەن اۋماقتىق بىرتۇتاستىقتى ساقتاۋ, سونداي-اق, جانجالدى ساياسي رەتتەۋگە باعىتتالعان «سيرياداعى جانجالدى تەجەۋ ايماقتارىن قۇرۋ تۋرالى مەموراندۋمعا» كەپىلگەر-مەملەكەتتەردىڭ قول قويۋى كەزدەسۋدىڭ باستى ناتيجەسى بولدى.
قول قويىلعان قۇجاتتا يدليب پروۆينتسياسىن جانە لاتاكيا, حاما, الەپپو پروۆينتسيالارىنىڭ ءبىر بولىگىن, گۋتانىڭ شىعىسىن ءتورت قاۋىپسىزدىك ايماقتارى شەگىندە داۋلاس تاراپتار اراسىندا ۇرىس ءىس-قيمىلدارىن توقتاتۋ, اۆياتسيامەن قوسا, بارلىق قارۋ تۇرلەرىن پايدالانۋعا تىيىم سالۋ مىندەتتىلىگى, گۋمانيتارلىق كومەك پەن ءدارى-دارمەكتەر جەتكىزۋ قامتاماسىز ەتىلەتىندىگى, حالىق قاجەتتىلىكتەرى ءۇشىن نەگىزگى ينفراقۇرىلىمدى قالپىنا كەلتىرۋ مەن بوسقىنداردىڭ ەركىن جانە قاۋىپسىز قايتا ورالۋى, تاعى باسقا جۇمىستار ءۇشىن جاعداي جاسالاتىندىعى بەلگىلەنگەن.
استاناداعى كەزدەسۋدە قاتىسۋشىلار كۇشپەن ۇستالىپ وتىرعان ادامدارمەن الماسۋ جونىندەگى جۇمىس توبىن قۇرۋ ماسەلەلەرىن قاراستىرىپ, ءتيىستى قۇجاتتىڭ جوباسىن تالقىلادى. كەپىلگەر-مەملەكەتتەر سيريانىڭ ەگەمەندىگى, تاۋەلسىزدىگى, بىرلىگى مەن اۋماقتىق بىرتۇتاستىعىنا وزدەرىنىڭ بەيىل ەكەندىكتەرىن, سونىمەن قاتار, ماسەلەنى ساياسي جولمەن عانا شەشۋ مۇمكىن ەكەندىگىنە سەنىمدەرىن راستادى.
سونداي-اق, استانادا سيريا بويىنشا حالىقارالىق كەزدەسۋدىڭ ۇيىمداستىرىلۋىنا بايلانىستى كەلىسسوزدەرگە قاتىسۋشىلار قازاقستان پرەزيدەنتى ن.نازارباەۆقا جانە ەلىمىزدىڭ ۇكىمەتىنە ءوز ريزاشىلىقتارىن ءبىلدىردى. قايرات ءابدىراحمانوۆ اتاپ وتكەندەي, استانا مۇددەلى تاراپتاردىڭ بارشاسى وزدەرىنىڭ كوزقاراسىن, ۇستانىمىن كەڭ اۋديتورياعا جەتكىزە الاتىن پلاتفورما رەتىندەگى تيىمدىلىگى مەن وزەكتىلىگىن دالەلدەدى. ەلورداداعى ماڭىزدى فورۋمعا قاتىسقان كەپىل مەملەكەتتەردىڭ وكىلدەرى سيريا ماسەلەلەرىن رەتتەۋ جونىندەگى كەزەكتى كەزدەسۋ وتەتىن مەرزىمنىڭ مەجەسىن بەلگىلەگەنى دە وسىنىڭ ءبىر كورىنىسى دەۋگە بولادى.
كەزدەسۋ قورىتىندىسى بويىنشا, كەلىسسوزدەر جۇمىسىنا قاتىسقان بارلىق تاراپتار جوعارى دەڭگەيدەگى كەلەسى كەزدەسۋدى 2017 جىلعى شىلدە ايىنىڭ ورتاسىندا استانادا جانە وعان دەيىنگى ەكى اپتالىق مەرزىمدە ساراپشىلار دەڭگەيىندەگى الدىن الا كونسۋلتاتسيالاردى انكارادا وتكىزۋ تۋرالى شەشىم قابىلدادى.
سىرتقى ىستەر مينيسترلىگى حابارلاعانداي, قازاقستان تاراپى سيريا بويىنشا استانادا وتكەن ءتورتىنشى حالىقارالىق كەزدەسۋدىڭ قورىتىندىلارىن سيريادا بەيبىتشىلىك ورناتۋ جولىنداعى كەزەكتى ساپالى قادام رەتىندە باعالاپ, بارلىق تاراپتاردى بۇكىل كەلىسىمدى ورىنداۋعا شاقىردى جانە جانجالدى ساياسي رەتتەۋدىڭ ءارتۇرلى جولدارىن ىزدەستىرۋ باعىتىنداعى حالىقارالىق كۇش-جىگەرگە, ونىڭ ىشىندە, بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە, ءوز ۇلەسىن ودان ءارى قوسۋدى جالعاستىرۋعا ءازىر ەكەنىن اتاپ كورسەتتى.
ارنۇر اسقار,
«ەگەمەن قازاقستان»
