كوشپەلى وتىرىستىڭ مودەراتورى, پارلامەنت ءماجىلىسىنىڭ دەپۋتاتى, «يندۋستريالىق دامۋ» باعىتى بويىنشا پارتيالىق كۋراتور امانجان جامالوۆ باستاعان كوميسسيا مۇشەلەرى ەڭ اۋەلى شاھارداعى ءىرى كاسىپورىن «وسكەمەن تيتان-ماگني كومبيناتىن» ارالاپ كوردى. حالىق قالاۋلىسى ءوندىرىس ورنىنىڭ جۇمىسىمەن تانىسۋ بارىسىندا مەملەكەت باسشىسىنىڭ بيىلعى جولداۋىندا ءسوز ەتىلگەن قازاقستاننىڭ ءۇشىنشى جاڭعىرۋىنىڭ ناقتى مىسالدارى كاسىپورىندا كورىنىس تاۋىپ وتىرعانىنا كۋا بولعانىن ايتتى.
«زاۋىت قانشا جەردەن جاڭعىرتىلسا دا, ادام فاكتورى بولماسا, دامۋ مۇمكىن ەمەس. بۇل ماسەلە كاسىپورىندا ۇتىمدى ۇيىمداستىرىلعان ەكەن. وعان بۇگىن كوز جەتكىزدىك. «وتمك» اق الەمدىك ستاندارتتارعا ساي ءونىم شىعارۋدا. مۇنداعى تيتان ءونىمىن اقش باستاعان ءىرى مەملەكەتتەر تۇتىنۋدا. ۇشاق وندىرىسىندە, عارىش, مۇناي-گاز سالاسىندا كەڭىنەن قولدانىسقا يە. زاۋىت الەمدە وندىرىلەتىن تيتاننىڭ 11 پايىزىن قامتاماسىز ەتەدى. سوندىقتان مۇندا قولعا الىنعان ءىرى جوبالارعا ەلباسى ۇنەمى قولداۋ كورسەتىپ, كوڭىل ءبولىپ وتىرادى», − دەدى امانجان جامالوۆ.
كوشپەلى ءماجىلىستىڭ ەكىنشى وتىرىسى وبلىستىق اكىمدىكتە ءوتىپ, وندا وڭىردەگى جاردەمگە مۇقتاج, جۇمىسى تۇرالاپ تۇرعان كاسىپورىنداردىڭ تۇيتكىلدى ماسەلەلەرىن شەشۋ جولدارى تالقىلاندى. ىستەرى ىلگەرى باسپاي جۇرگەن كاسىپورىن باسشىلارى وزدەرىن تولعاندىرعان ماسەلەلەرىن تىلگە تيەك ەتتى. «ازيا اۆتو قازاقستان» اق-تىڭ باس ديرەكتورى ەرجان مانديەۆ قازىرگى ۋاقىتتا وتاندىق كولىكتەرگە ەل ىشىندە سۇرانىس تومەندەگەنىن ايتىپ, ماسەلەنى شەشۋ ءۇشىن مەملەكەت تاراپىنان اۆتونەسيەلەندىرۋ باعدارلاماسى ازىرلەنىپ, اۆتوموبيل يمپورتىنا شەكتەۋ قويىلسا, وزگە دە قارجىلاي كومەكتەر كورسەتىلسە دەگەن ءوتىنىشىن ءبىلدىردى. ماكارون ءونىمىن شىعارۋمەن شۇعىلداناتىن «تاماشا» جشس باسشىسى 2013 جىلى قۇرىلعاننان بەرى ۇندى تۇراقتاندىرۋ قورىنان تومەن باعامەن الىپ كەلگەنىن, قازىر ولاردىڭ ۇندى ساۋداعا شىعارمايتىنىنا توقتالىپ, كاسىپورىندى وڭالتۋعا سۋبسيديا سۇرادى.
جيىن سوڭىندا «يندۋستريالىق دامۋ» باعىتى بويىنشا وڭىرلىك كوميسسيانىڭ مۇشەسى وكسانا جەلياكوۆا وبلىستاعى كاسىپورىنداردى وڭالتۋ بويىنشا اتقارىلعان جۇمىستاردى جىپكە تىزگەنىمەن, ءماجىلىس دەپۋتاتى قولعا الىنعان شارالاردى جەتكىلىكسىز دەپ تانىپ, اتالعان كوميسسيانىڭ جۇمىسىن جانداندىرىپ, كوميسسيا مۇشەلەرىنىڭ قۇرامىن وزگەرتۋ قاجەتتىگىن جەتكىزدى.
ء«وز قۋاتىندا جۇمىس ىستەمەي تۇرعان كاسىپورىنداردى وڭالتۋ قاجەت. شىعىس قازاقستان – ەل ەكونوميكاسىنىڭ درايۆەرى, مۇندا ىرگەلى ءوندىرىس ورىندارى شوعىرلانعان. سوندىقتان شىعىستاعى ونەركاسىپ ىركىلمەۋى ءتيىس, ول ءۇشىن ءتۇرلى مەملەكەتتىك قولداۋ شارالارىن قاراستىرۋ كەرەك», – دەدى امانجان جامالوۆ.
ازامات قاسىم,
«ەگەمەن قازاقستان»
وسكەمەن
سۋرەتتى تۇسىرگەن
ەسىمحان ورىنباەۆ
