استانا اكىمدىگىندە قالا تۇرعىندارى ءۇشىن جۇمىس باستالار ۋاقىتتىڭ جاڭا كەستەسى جاريا ەتىلدى. «جۇمىس ۋاقىتىنىڭ جىلجىمالى كەستەسى – كەپتەلەكتەردى بولدىرماۋدىڭ ۇتىمدى تاسىلدەرىنىڭ ءبىرى. ەگەر استانا قالاسىنىڭ اكىمدىگى كەيبىر مەكەمەلەردىڭ جۇمىس ۋاقىتىن 10-15 مينۋت ارالىعىندا وزگەرتسە, بۇل ءبىزدىڭ كەپتەلەكتەردە تۇرۋ ۋاقىتىمىزدى ايتارلىقتاي ازايتۋعا مۇمكىندىك بەرەدى. ياعني, بۇدان تيىمدىلىك ايتارلىقتاي ارتادى», – دەدى مينيستر تەلەباعدارلامادا.
سونداي-اق, د.اباەۆ قالالىقتاردى استانا اكىمدىگىنىڭ باستاماسىن قولداۋعا شاقىردى. «مەن پرەزيدەنتتىڭ ءباسپاسوز حاتشىسى بولعان تۇستا ءبىز الەمنىڭ كوپتەگەن ەلىندە بولدىق. بارلىق جەردە بۇل تاجىريبە بار: توكيودا دا, بەرليندە دە. مەن گوللانديا جۇمىسشىلارى تاڭعى 6-دان كۇندىزگى 3-كە دەيىن جۇمىس ىستەيتىنىن ناقتى بىلەمىن. ءسويتىپ, ولار ساعات 3-تە جۇمىستارىنان بوساپ, كۇنى بويعى ەركىندىككە شىعادى», – دەپ قورىتتى ءسوزىن ۆەدومستۆو باسشىسى.
الداعى 1 ماۋسىمنان باستاپ ەلوردانىڭ كوپتەگەن تۇرعىندارى ءۇشىن جۇمىس كەستەسى وزگەرۋى مۇمكىن ەكەنىن اتاپ وتكەن ءجون. بۇل جاڭالىق ەكسپو-2017 قارساڭىندا ەلوردا جولدارىنداعى جۇكتەمەنى ازايتۋ ءۇشىن دە ەنگىزىلگەلى وتىر.
ماسەلەن, قۇرىلىس ۇيىمدارى جۇمىسىنىڭ باستالۋىن قازىرگى 09.00-دەن 07.00-گە, قالا كوممۋنالدىق قىزمەتىن ونەركاسىپ جانە كاسىپورىن سەكتورلارى ۇيىمدارىمەن بىرگە 09.00-دەن 07.30-عا, حالىققا قىزمەت كورسەتۋ ورتالىقتارىن قارجى ينستيتۋتتارىمەن بىرگە 09.00-دەن 10.00-گە, ساۋدا, ويىن-ساۋىق ۇيىمدارىن 10.00-دەن 10.30-عا, سونداي-اق, ۇلتتىق كومپانيالاردى 09.00-دەن 09.30-عا اۋىستىرۋ ۇسىنىلىپ وتىر.
سونىمەن قاتار, جۇمىس كەستەسىن مىندەتتى تۇردە وزگەرتۋگە رەسپۋبليكالىق باسقارۋ ورگاندارى, جەرگىلىكتى باسقارۋ ورگاندارى, ءبىلىم بەرۋ مەكەمەلەرى (كوللەدجدەر مەن جوو-لار) جاتادى. ماسەلەن, الدىڭعىلارى جۇمىستارىنىڭ باستالۋ ۋاقىتىن 09.00-دەن 09.30-عا اۋىستىرسا, كەيىنگىلەرى 09.00-دەن 08.30-عا ىلگەرى جىلجىتادى.
كەلىسسوزدەر قورىتىندىسىنا تۇسىنىك بەردى
د.اباەۆ سيرياداعى احۋالدى رەتتەۋ بويىنشا جۇزەگە اسىرىلىپ كەلە جاتقان استانا پروتسەسى جانجالداسۋشى تاراپتاردى ءبىر-ءبىرىن ەستۋگە يتەرمەلەيدى دەگەن ءۇمىت ءبىلدىردى. ء«بىز سيريادا تولىق اۋقىمدى سوعىس ءجۇرىپ جاتقانىن كوز الدىمىزعا ەلەستەتىپ كورۋگە ءتيىسپىز. ال استانا پروتسەسىنىڭ جۇزەگە اسىرىلۋى, وعان دالا كومانديرلەرىنىڭ قاتىسۋى العا قاراي ىلگەرىلەۋشىلىكتىڭ بار ەكەنىن بىلدىرەدى. باستىسى, ولاردىڭ (پروتسەسكە قاتىسۋشىلار – رەد.) ءبىر-ءبىرىن كورىپ, ءبىر-بىرىمەن ۇنقاتىسا باستاۋى ماڭىزدى. ەكى جانجالداسۋشى تاراپ قانا بار باسقا كوپتەگەن ەلدەرگە قاراعاندا, سيريادا ءبىر-بىرىنە قارسى تۇرۋشى جاقتار كوپ, سوندىقتان بۇل پروتسەسس تە وڭاي شەشىلمەيدى. حيميالىق شابۋىل دەلىنگەننەن كەيىن استانا پروتسەسى جالعاسادى دەگەنگە ەشكىم دە سەنگەن جوق. بۇل جەردە مەملەكەت باسشىسىنىڭ بەدەلىنىڭ ارقاسىندا دا بۇل پروتسەسس جالعاسىپ جاتىر», – دەدى «وتكرىتىي ديالوگ» جوباسى شەڭبەرىندە سويلەگەن سوزىندە د.اباەۆ.
ۆەدومستۆو باسشىسى پروتسەسكە اقش مەملەكەتتىك حاتشىنىڭ كومەكشىسى دەڭگەيىندە ءوز وكىلىن جىبەرىپ, وكىلىنىڭ مارتەبەسىن جوعارىلاتىپ وتىرعانىن اتاپ ءوتتى. «مەن استانا پروتسەسىنىڭ يران جونىندەگى الماتى كەلىسسوزدەرى سەكىلدى جانە دە مەملەكەت باسشىسىنىڭ بارلىق بىتىمگەرشىلىك يدەيالارى تاريحتا قالاتىنىنا تولىقتاي سەنىمدىمىن», – دەدى ءوزىنىڭ سوزىندە مينيستر.
«ۇركەر» سىيلىعىنا قاتىسۋعا شاقىردى
د.اباەۆ جۋرناليستەردى باسپا, راديو جانە ينتەرنەت-جۋرناليستەرىنىڭ العاش جاريالانعان «ۇركەر» ۇلتتىق سىيلىعىنا قاتىسۋعا شاقىردى. «مەن جۋرناليستەرگە وسى سىيلىق اسا قاجەت قوي دەپ ويلايمىن. ويتكەنى, قالام ۇستاعان قاۋىمنىڭ ەڭبەگىن لايىقتى باعالاۋ اسا ماڭىزدى. وسى سىيلىقتىڭ ارقاسىندا جۋرناليستيكانىڭ ساپاسى ارتاتىن بولادى. جيۋري شەشىمدەرىنە ەشقانداي قاتىسىمىز بولمايدى. كىم لايىقتى سول جەڭەدى», – دەدى «حابار» ارناسىنداعى جوبا شەڭبەرىندە ۆەدومستۆو باسشىسى.
سونداي-اق, ول العاشقى ۇلتتىق تەلەۆيزيالىق «تۇمار» سىيلىعى جۋرناليستەر اراسىندا لايىقتى باعالانعانىن اتاپ ءوتتى. «وندا لايىقتىلار جەڭگەن بولاتىن, «تۇمار» سىيلىعىن بەرۋ قالاي وتكەنىن كورگەن سوڭ ودان قانداي دا ءبىر ساباق الدىق. ەندى ول «ۇركەر» سىيلىعىندا مىندەتتى تۇردە ەسكەرىلەتىن بولادى», دەدى مينيستر.
ءسوزىنىڭ سوڭىندا د.اباەۆ جۋرناليستەردى كونكۋرسقا قاتىسۋدا بەلسەندىلىك تانىتۋعا شاقىردى.
سەنات كونسەرۆاتيۆتى كۇش بولىپ تابىلادى
وتكەن اپتادا پرەزيدەنت نۇرسۇلتان نازارباەۆ سەنات دەپۋتاتتارىنىڭ سايلاۋىن 2017 جىلدىڭ 28 ماۋسىمىنا بەلگىلەگەن جارلىققا قول قويدى. اقپارات جانە كوممۋنيكاتسيالار ءمينيسترى د.اباەۆتىڭ پىكىرىنشە, ەلىمىز ءۇشىن پارلامەنتتىڭ جوعارعى پالاتاسى اسا ماڭىزدى ءرول اتقارادى. «سەنات مەملەكەتتىك باسقارۋ جۇيەسىندە اسا زور تۇراقتاندىرۋشى رولگە يە. سەنات – ءبىر ساتتىك ترەندتەرگە وڭايلىقپەن بەرىلە قويمايتىن كونسەرۆاتيۆتى كۇش. ويتكەنى, سەنات دەپۋتاتتارىن جاناما داۋىس بەرۋ ادىسىمەن ءماسليحاتتار دەپۋتاتتارى سايلايدى. وسىنىڭ ناتيجەسىندە جوعارعى پالاتاعا كۇشتى ساياسي ەرىك-جىگەرى بار, ايتارلىقتاي باسقارۋ تاجىريبەسىنە يە ادامدار سايلانادى. سوندىقتان, سەنات ەلىمىزدىڭ قازىرگى دامۋ ۇدەرىستەرىندە ۇلكەن ءرول اتقارىپ وتىر», – دەدى مينيستر.
