وقيعا بىلاي بولعان ەدى. سەمەي قالاسىنداعى بەرەگوۆايا-72 مەكەنجايى بويىنشا سۋ قۇبىرلارىن قوساتىن كامەرانىڭ ىشىندە ەكى ەر ادام قوندىرعىلاردى گازبەن دانەكەرلەپ وتىرادى. كەنەت الدەبىر اقاۋ ورىن الىپ, اۋا تارىلىپ, گازبەن ۋلانعان, ولاردىڭ تىنىس الۋى قيىنداي باستايدى. قۇدىق ىشىندە جۇمىس ىستەپ وتىرعان, ولار شامالارى كەلگەنشە كومەككە شاقىرىپ, جان داۋىستارىمەن ايقايلايدى. ءدال وسى ساتتە سول قۇبىردىڭ قاسىنان ەرجان سادىقوۆ ءوتىپ بارا جاتقان ەدى. كوپ ويلانىپ, تولعانباستان ەرجان بىردەن كومەككە ۇمتىلادى. دەرەۋ ەكى جىگىتكە كومەك كورسەتىپ, ولاردى قۇبىردان الىپ شىعادى. ءسويتىپ, الگى ەكى ازاماتقا دەرەۋ العاشقى مەديتسينالىق جاردەم دە كورسەتەدى. ونىڭ بەيبىت كۇندەگى وسى ەرلىگى تۋرالى حاباردار بولعان ءبولىم كومانديرلەرى اسكەري قىزمەتكەردى ماراپاتقا ۇسىندى. ەرجان سادىقوۆقا «ەرلىگى ءۇشىن» مەدالى تابىستالىپ, توتەنشە جاعدايدى كورسەتكەن كومەگى ءۇشىن العىس حاتپەن دە ماراپاتتادى.
– قازاقستاندا تۋىپ-ءوستىم. وسىنداي ەلىم بولعانىن مەن ماقتان تۇتامىن, – دەيدى ەرجان سادىقوۆ. – «وتان – وتتان دا ىستىق» دەگەن, تۋىپ وسكەن, كىندىك قانىڭ تامعان جەرىڭ, اتامەكەنىڭە جەتەر نە بار؟! سول اتامەكەنىڭدە ءومىر ءسۇرىپ جاتقان وتانداستارىڭا قاجەت كەزىندە كومەك قولىن سوزۋ, ارينە, باستى پارىز دەپ ەسەپتەيمىن. ادام ءومىرى قاشان دا قىمبات. ومىرگە عاشىقتىق – بۇل ادامنىڭ رۋحاني دەڭگەيىنىڭ بيىكتىگىن كورسەتەدى. ەرجان سادىقوۆ شىن مانىندە وتانىنا ادال قىزمەت ەتۋشى, حالىقتىڭ قالاۋلى ازاماتتارىنىڭ ءبىرى. ارينە, وسىنداي ۇلدارى بار ەلدىڭ ەڭسەسى بيىك.
راۋشان نۇعمانبەكوۆا
سەمەي
سۋرەتتى تۇسىرگەن اۆتور
