اسپانداعى ايشىقتار

جەكسەنبى كۇنى ەلوردانىڭ «جولامان» اەرودرو­مىندا كولىك جانە كوممۋنيكاتسيا مي­نيسترلىگىنىڭ «مەملەكەتتىك اۆياتسيالىق ورتا­لىق» رمك-نىڭ 5 جىلدىعىنا ارنالعان مەرەكەلىك اۆياشوۋ ءوتتى. اۆياتورلار مەرەكەسىنە تۇڭعىش عارىشكەر توقتار اۋباكىروۆ, ازامات­تىق اۆياتسيا كوميتەتىنىڭ توراعاسى رادىلبەك ءاديمولدا ارنايى قاتىستى. اتالمىش ورتالىق قازاقستان رەسپۋب­ليكا­سىنىڭ ازاماتتىق اۆياتسياسى مەن اۋە قورعانىسى كۇشتەرىنە مامانداردى ازىرلەۋمەن شۇعىل­دا­ناتىن ۇيىمدار ءۇشىن ۇشقىشتاردى ال­عاش­قى دايىن­دىق­تان ءوت­­­كىزۋدىڭ بازا­سىن قا­لىپ­­تاس­تىرۋ ماق­سا­تىن­دا قۇرىلعان ەدى. 5 جىل ىشىندە ءدارى­گەر­لىك-ۇش­قىشتىق ساراپ­تا­ما­لىق كو­ميسسيانىڭ قورى­تىن­دىسى بويىن­شا دەن­ساۋلىعى جاعى­نان ۇشۋعا جارامدى دەپ تانىلعان 16-18 جاس ارالىعىنداعى 275 كۋرسانت وقىپ شىق­قان. ولاردىڭ ءىشىن­دە 55-ءى اۋەسقوي-ۇش­قىش بولسا, 50 كۋرسانت اۆياتسيالىق تەحنيك-مەحانيك ماماندىعىنا بەيىمدەلگەن. مۇندا ءبىلىم بەرۋ تەگىن بولعاندىقتان قىزىعۋشىلىق تانىتىپ كەلگەن جاستاردىڭ سانى دا جىل سايىن ءوسىپ كەلەدى. كۋرسانتتاردىڭ اۆياشوۋ باعدارلاماسى ايا­سىن­دا پاراشيۋتشىلەر مەن پلانەردىڭ ۇشۋ ونەرى, قونۋ دالدىگىنە جانە قونۋ ساپاسىنا كۋرسانت-ۇش­قىشتار, نۇسقاۋشى-ۇشقىشتار اراسىندا ىرىكتەۋ جارىستارى وتكىزىلدى. سونىمەن قاتار, 14-18 جاس­تاعى كۋرسانتتار اراسىندا وتكىزىلگەن اۆياتسيانى دامىتۋ تاريحى بويىنشا سۇراق-جاۋاپ سايىسى دا وتە قىزىقتى بولدى. جەڭىمپازدارعا ۇشاقتاردا ۇشۋعا مۇمكىندىك بەرىلدى. ورتالىقتىڭ وقىتۋشىلىق, ۇشقىشتىق جانە ينجەنەرلىك-تەحنيكالىق قۇرامى نەگىزىنەن وفيتسەرلەردەن تۇرادى. وفيتسەرلەردىڭ نۇسقاۋشىلىق جانە وقىتۋشىلىق جۇمىستارىنداعى كاسىبيلىك­تەرى جوعارى. ورتالىق باسشىلارىنىڭ پىكىرلەرىنە قارا­عاندا, بۇل جەردە وقۋ ءۇردىسى ەكى كەزەڭنەن تۇرادى – تەوريالىق كۋرس جانە ۇشقىشتىق پەن ءون­دىرىستىك پراكتيكا. تەوريالىق جانە پراكتيكالىق وقۋ ءۇشىن ورتالىقتىڭ قاجەتتى وندىرىستىك بازاسى, ونىڭ ىشىندە, ترەناجەرلىك دايىندىق سىنىبى بار وقىتۋ كۋرسى, «جولامان» اۆياتسيالىق الاڭى بار. «جولامان» ۇشۋ-قونۋ الاڭى اۆياتسيانىڭ اسا جەڭىل ۇشاقتارىندا وقۋ-جاتتىعۋ ۇشۋلارىن ورىنداۋعا ارنالعان. اۆياشوۋ بارىسىندا كۋرسانتتار ۇشاقتارمەن اس­پاندا ءتۇرلى اۋە قي­مىل­دارىن جاساپ قا­نا قوي­ماي, پاراشيۋتشىلەر مەن Robinson R44 تىك­ۇشاعىن مەڭ­گەرگەن­دەر اۋەدەن اسا شەبەرلىكپەن سەكىرىپ جينال­عان قاۋىمدى ءتانتى ەتتى. جاس كۋرسانت­تار­دىڭ شەبەرلىكتەرىن كور­گەن حالقىمىزدان شىققان تۇڭعىش عا­رىش­كەر, كە­ڭەس وداعىنىڭ باتىرى, حا­لىق قاھارمانى توقتار اۋباكىروۆ جاستاردىڭ وتە تاماشا ونەر كورسەتكەنىن تىلگە تيەك ەتە كەلە: «مەن كوپتى كورگەن اداممىن. جاستاردىڭ مۇنداي تالانتتارى شىنىمەن دە ادامدى جىگەرلەندىرەدى. ماعان وتە ۇنادى. مەن وسى جىگىتتەرگە راحمەت ايتقىم كەلەدى. قاراپ وتىرساڭ, سونداي قيىن تەمىردى ءبىزدىڭ كىشكەنتاي عانا ۇل-قىزدارىمىز يگەرىپ وتىر عوي. تالابى مول جاستاردى كورگەندە ەلىڭ ءۇشىن, وتانىڭ ءۇشىن كادىمگىدەي قۋانىپ قالاسىڭ. ەلىمىزدىڭ ەرتەڭى وسى جاستار. سولاردىڭ قانات­تارى قاتايىپ وسە بەرسە ەكەن دەيمىن», دەپ جاستارعا ءوزىنىڭ اق تىلەگىن ارنادى. مەملەكەتتىك اۆياتسيالىق ورتالىقتىڭ قىز­مەت­كەر­لەرى قازاقستاننىڭ قىز-جىگىتتەرىن ۇشقىش­تار وقۋى­نا شاقىرادى. وقۋ تەگىن, تەك مىقتى دەنساۋلىق قاجەت. اراي ۇيرەنىشبەكقىزى.