نامىستى ۇلدارىمىز مول بولعاي!

كوپشىلىك ءبىزدىڭ جاڭاجولدى  «بالۋاندار اۋىلى» رەتىندە جاقسى بىلەدى. بۇل ءداستۇر ءالى كۇنگە دەيىن ۇزىلگەن ەمەس. ۇلتتىق سپورت تۇرلەرى بويىنشا  بالالار مەن جاسوسپىرىمدەر مەكتەبىنىڭ /ۇسبجم/ فيليالى اشىلعالى  ۇلتتىق ونەرىمىزدى سەرىك ەتۋشىلەر قاتارى  وسە ءتۇستى. قازىر وندا  40-قا تارتا بالعىن  جاتتىعادى.  بۇ­رىندارى اۋىلداعى جيىن-تويلار ويىن-ساۋىقسىز وتپەيتىن. كۇرەس دەسە, ەكى بىلەگىن سىبانىپ, ىشكەن اسىن جەرگە قوياتىن قارا­دومالاق بالالار كوك مايسانى  كۇرەس الا­ڭى­نا اينالدىراتىن. «كۇش اتاسىن تانى­ماس» دەمەكشى,  ءادىس-ءتاسىلى اسقاندار قار­سى­لاستارىن الىپ تا, شالىپ تا جىعاتىن. ءزاۋزات, جاناتاي شوتكيندەر, سارسەنبەك وجىقاەۆ, يگىلىك ءابدىراحانوۆ, ايدار قاليجانوۆ سەكىلدى  جاڭاجولدىق بالالار وسىلاي شىنىعىپ ءوسىپ, كەيىن ۇلكەندەر ساپىندا دا نامىس­تى تۋىن جوعارى ۇستادى.  مەنىڭ قاينىم ەرىك تە  كۇرەسپەن اينالى­سىپ, بالام باتىرحان وعان ەلىكتەپ ءوستى. بۇل كۇنى شالاقىندىقتار بالامدى وقۋشىلار اراسىندا قىزىلجار وڭىرىنەن توپ جارعان تۇڭعىش ەل چەمپيونى رەتىندە ماقتان تۇتادى. بۇل ورايدا, باتىرحاندى  قازاق كۇرەسىنىڭ قىر-سىرىنا تالماي ۇيرەت­كەن  جاتتىقتىرۋشى بولات نۇرتا­زينگە دەگەن العىسىم شەكسىز. 5 جىلدىڭ ىشىندە  تالاي  بيىك اسۋلاردى باعىندى­رۋى­نا زور ۇلەس قوستى. مەكتەپ وقۋشى­لارى اراسىندا اي­ماق­تىق جارىستاردا بىرنەشە رەت جەڭىمپاز اتانىپ, وبلىستىق قۇراماعا قابىلداندى. 2009 جىلى رەس­پۋبليكالىق دودادا العاش رەت تۇساۋى كەسىلدى. پەتروپاۆل قالاسىندا وتكەن ەل چەمپيوناتىنا 300-گە جۋىق بال­عىن بالۋان قاتىسىپ,  بالام 57 كيلو سال­ماق دارە­جەسى بويىنشا جۇلدەلى ەكىنشى ورىن­­عا كوتەرىلدى. كەلەسى جىلى  دودا قىزىل­وردا قالاسىندا كوك بايراعىن جەلبىرەتىپ, وندا ءۇشىنشى ورىندى جەڭىپ الدى. بيىل كوكشەتاۋ قالاسىندا وتە تارتىستى وتكەن باسەكەدە  بارلىق قارسىلاستارىن ۇتىپ, جەڭىستىڭ ەڭ بيىك تۇعىرىنا كوتەرىلدى. باتىرحان بيىل الماتىداعى  دەنە تاربيەسى اكادەمياسىنا وقۋعا ءتۇسىپ, بۇدان دا بيىك اسۋلارعا جەتۋدى اسىل ماقسات ەتىپ وتىر. ءسوز اراسىندا ونىڭ  كۇ­رەس­پەن تۇبە­گەيلى اينالىسىپ, بايراق­تى جارىستارعا قاتىسۋىنا مۇمكىندىك تۋ­دىرعان, قارجىلاي كومەكتەسكەن ازامات­تارعا دەگەن ريزا­شى­لىعىمدى بىلدىرە كەتكىم كەلەدى.  ۇسبجم ديرەكتورى ەسلام­بەك بەكمۇرزين, وبلىستىق كۇرەس قاۋىم­داستىعىنىڭ توراعاسى باۋىر­جان قۇل­جانوۆ سەكىلدى ازاماتتاردىڭ شا­راپاتى مول ءتيدى. اۋداندىق اكىمدىك, سپورت جانە تۋريزم باسقارماسى دا تالاي رەت دەمەۋشىلىك كورسەتتى. قاينىم ەرىك قولىنان جەتەلەپ, ۇلكەندى-كىشىلى بايگەلەردىڭ بىردە-بىرەۋىنەن قالدىرعان جوق. جىل وتكەن سايىن ەلىمىزدە  سپورتپەن شۇعىلدانىپ, سالاماتتى ءومىر سالتىنا ۇمتىلۋشىلار قا­تا­رى ءوسىپ كەلەدى. وعان ەلباسىنىڭ جولداۋى ەرەكشە سەرپىن بەردى. وسىدان 37 جىل بۇرىن  باۋىرجان اعاسى  قازاق كۇرەسىنەن ەل جەڭىمپازى بولسا,  وسىنشا ۋاقىتتان كەيىن مۇنداي باقىت مەنىڭ بالاما بۇيىردى.  اۋىلدان شىققان قازاقتىڭ ۇل-قىزدارى الەمدىك دەڭگەيدە قازاق ەلىنىڭ مارتەبەسىن تاسىتىپ, نامىسىن قورعاپ جاتسا, بۇدان اسقان قۋانىش جوق. انالىق تىلەگىم بۇل! بالعىن جاعىپاروۆا. سولتۇستىك قازاقستان وبلىسى, شال اقىن اۋدانى, جاڭاجول اۋىلى.