شيرەك فينالعا شىقتى

قازاقستاندىق تەننيسشى گالينا ۆوسكوبوەۆا كانادانىڭ تورونتو قالاسىندا ءوتىپ جاتقان سىيلىق قورى 2 ميلليون دول­لاردان اساتىن Rogers Cup 2011 حالىقارالىق سۋپەرتۋرنيرىنىڭ شيرەك فينالىنا شىقتى. كانادانىڭ اشىق چەمپيو­نا­تى سانالاتىن Canada Masters قازىرگى كەزدە Rogers Cup دەمەۋشىلىك اتاۋىنا يە جانە جىل سايىنعى حالىقارالىق تۋرنير قا­تارىنا ەنگىزىلگەن. 2009 جىل­دان بەرى وسى نەگىزدە ايەلدەر تەن­نيس قاۋىمداستىعىنىڭ (WTA) پرەمەر ءتۋرنيرى كاتە­گورياسىنا جاتادى. ءبىرىنشى اينالىمنىڭ مات­چىن­­دا گ.ۆوسكوبوەۆا ءتۋرنيردىڭ تو­عى­زىن­شى راكەتكاسى, اتاقتى فرانتسۋز ماريون ءبارتوليدى ەكى سەتتە (6:3, 6:3 ەسەبىمەن) جەڭىپ, ۇلكەن سەنساتسيا جاساسا, قازاق­ستاندىق سپورتشىنىڭ كەلەسى قارسىلاسى يتاليالىق فلاۆيا پەننەتتا بولاتىن. گ.ۆوسكوبوەۆا بۇل جولى دا ۇلكەن شەبەرلىك تانىتىپ, قارسىلاسىن ءۇش پارتيادا (2:6, 7:5, 6:2) تىزە بۇك­تىر­دى. ال بۇرناعى كۇنى تۇندە ول ءۇشىنشى اينالىمدا الەمنىڭ بۇ­رىنعى ءبىرىنشى را­كەت­كاسى, «ءۇل­كەن شلەم» ءتۋرنيرىنىڭ جە­ڭىم­پازى, اتاقتى رەسەيلىك تەننيسشى ماريا شاراپوۆادان ەكى سەتتە باسىم ءتۇستى. ءسويتىپ, قازاق­ستان­دىق سپورتشى ەكىنشى قاي­تا­را ۇلكەن سەنساتسيانىڭ يەگەرى اتان­دى. بۇگىندە م.شارا­پو­ۆا­نىڭ الەمدىك رەيتينگتە بەسىنشى سا­تى­دا  تۇرعانىن دا ايتا كەتەيىك. گالينا ۆوسكوبوەۆا شيرەك فينالدا بەلورۋسسيالىق تەننيسشى, ءتۋرنيردىڭ ءتورتىنشى را­كەتكاسى ۆيكتوريا ازارەنكامەن شەبەرلىك بايقاساتىن بولادى. ايتارلىقتاي بيىككە كوتەرىلگەن جەرلەسىمىزگە ساتتىلىك تىلەيمىز. «ەگەمەن-اقپارات».