دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى ءۇندىستاندا الاپەس اۋرۋىنىڭ اسا جىلدام جايىلىپ وتىرعاندىعىنا الاڭداۋلى. بۇدان التى جىل بۇرىن دەرتكە نۇكتە قويىلدى دەلىنگەن بولاتىن. الايدا جاعداي كەرىسىنشە ۋشىعىپ تۇر.
وسى ەلدە جىل سايىن 120 مىڭ ادام الاپەسپەن اۋىرسا, سونىڭ 10 پايىزى بالالار. ددۇ ۇندىلىك ۇكىمەتتەن اۋرۋدىڭ الدىن الۋ جونىندەگى شارالاردى جىلدام قابىلداۋى قاجەتتىگىن ەسكەرتىپ وتىر. بىرنەشە ايدان باستاپ جىلدارعا سوزىلاتىن اۋرۋ ورگانداردىڭ وزگەرۋىنە الىپ كەلىپ, مۇگەدەكتىككە جەتكىزەدى.
تۇركيادا اسكەري شەندىلەر تۇتقىندالدى
تۇرىك سوتى ۇكىمەتكە قارسى ارەكەتتەرى ءۇشىن ەل قارۋلى كۇشتەرىنىڭ جەتى ادميرالى مەن گەنەرالىن تۇتقىنداۋ جونىندە شەشىم قابىلدادى. ولاردىڭ اراسىندا تۇرىك اسكەرى وقىتۋ كورپۋسىنىڭ قولباسشىسى گەنەرال نۋسرەت تاشدەلەر مەن اسكەري بارلاۋ قولباسشىسى گەنەرال يسمايل پەكين دە بار.
اسكەريلەردىڭ زاڭسىز ارەكەتى 2003 جىلى ورتاشا يسلامدىق ادىلەتتىلىك جانە دامۋ پارتياسى بيلىككە كەلگەن تۇستا ويلاستىرىلعان ەكەن. قازىرگى تاڭدا تۇتقىندالعان اسكەريلەر تەرگەلۋ ۇستىندە. تۇركيا پرەزيدەنتى باس شتاب باسشىسى ەتىپ نەدجدەت وزەلدى تاعايىندادى. وسىلايشا ازاماتتىق ۇكىمەت اسكەري كۇشتەردى كىم باسقاراتىنىن شەشۋگە كوشتى.
ماسكەۋدە ءىرى ءورت ورىن الدى
ماسكەۋدىڭ ميكويان ەت كومبيناتى اۋماعىندا ورنالاسقان «تسۆەتماش» زاۋىتى عيماراتىندا تۇتانعان الاۋ ءتورتىنشى دەڭگەيدەگى ءورت اتانىپ وتىر.
ەكى ساعات ىشىندە ءتىلسىز جاۋ ون ەسەگە دەيىن ءورشىپ, ەكى مىڭ شارشى مەتردى جالماعان. ونى وشىرۋگە ەلۋگە تارتا تەحنيكا مەن ءتورت تىكۇشاق جۇمىلدىرىلىپتى. ءورتتىڭ شىعۋ سەبەبى دانەكەرلەۋ جۇمىستارىمەن بايلانىستىرىلۋدا, الايدا ونى ماماندار انىقتايتىن بولادى.
رەسەي باسقىنشىلىعى ايىپتالدى
گرۋزيا پارلامەنتىنىڭ سپيكەرى بوسقىندارعا قاراتىپ ايتقان سوزىندە «رەسەيگە جاۋلاپ الۋىن توقتاتۋىنا تۋرا كەلەدى» دەگەندى باسا ايتتى. ونىڭ سوزىنە قاراعاندا, رەسەي ەل اۋماعىن جاۋلاۋ ارقىلى حالىقارالىق قۇقىقتى بۇزىپ وتىر. سوندىقتان دا ءوز اسكەرىن گرۋزيادان الىپ كەتۋى ءتيىس.
مۇنداي مالىمدەمەسىن داۆيد باكرادزە 2008 جىلعى وقيعاعا ءۇش جىل تولۋىنا وراي جاسادى. رەسەي پارلامەنتىنىڭ وڭتۇستىك وسەتيا اۋماعىندا اسكەري بازا ورنالاستىرۋ جونىندەگى زاڭدىق قۇجاتتى راتيفيكاتسيالاۋ تۋرالى شەشىمىنە شۇيلىككەن سپيكەر اقش سەناتىنىڭ ابحازيا مەن وڭتۇستىك وسەتيا جەرى جاۋلاپ الىنعانى تۋرالى قارارى ماڭىزدى قۇجات ەكەندىگىن جەتكىزدى.
بەنگازيدە ۇكىمەت اۋىستى
وتپەلى ۇلتتىق كەڭەس كاددافيمەن بايلانىسى بار دەپ ايىپتالعان كوتەرىلىسشىلەر قولباسشىسى ابدەل فاتتاح يۋنەستىڭ ولىمىنەن ەكى اپتا وتىسىمەن بەنگازيدە ءوزى قۇرعان ۇكىمەتتى كوپتەگەن كەمشىلىكتەرگە بايلانىستى تاراتتى.
اتقارۋ كوميتەتىنىڭ كەيبىر مۇشەلەرى جۇمىسىندا كەمشىلىكتەر بايقالعاندىقتان, كەڭەس جاڭا ۇكىمەتتى جاساقتاۋعا كىرىسىپ تە كەتكەن. يۋنەس شىلدەنىڭ اياعىنا تامان بەلگىسىز بىرەۋلەردىڭ قولىنان قازا تاپقان بولاتىن. كەيبىر باق ونى كوتەرىلىسشىلەردىڭ ءوزى ءولتىرۋى مۇمكىن دەگەن-ءدى. وتپەلى ۇلتتىق كەڭەس باسشىلىعى مۇنداي داقپىرتتى كاددافي جاقتاستارى ادەيى تاراتۋدا دەيدى.
انالىق جاسۋشا ساقتاۋعا الىندى
ءيزرايلدىڭ وتباسىلىق ىستەر جونىندەگى سوتى جاقىندا قازا بولعان 17 جاسار قىزدىڭ وتباسىنا ونىڭ انالىق جاسۋشاسىن مەديتسينالىق بانكتە ساقتاپ قويۋعا, ارتىنان ونى دونورلىق ماقساتتا پايدالانۋعا رۇقسات بەردى.
شارون ايماعىنىڭ تۇرعىنى حەن ايدا ايش وسىدان ءبىر جارىم اپتا بۇرىن اۆتوكولىك اپاتىنان زارداپ شەككەن-ءدى. ونى جەدەل اۋرۋحاناعا جەتكىزگەنىمەن, دارىگەرلەر ميدىڭ ءولى ەكەندىگىن انىقتاعان. وتباسى قىزدىڭ ورگاندارىن دونورلىق ماقساتقا پايدالانۋعا ءوز رۇقساتتارىن بەرىپ, ءتورت ادام اجال اۋزىنان قۇتقارىلىپتى. وسى رەتتە قىز وتباسى انالىق جاسۋشانى ولگەن ەركەك سپەرماسىمەن ۇرىقتاندىرۋدى وتىنگەن. الايدا سوت تەك ساقتاۋعا عانا رۇقسات بەرىپ وتىر.
قىسقا قايىرىپ ايتقاندا:
* داعىستاندا ورىن العان جاپپاي توبەلەستەن التى ادام قازا تاۋىپ, تاعى ءبىر پوليتسەي قىزمەتكەرى اتىپ ولتىرىلگەن. وقيعا ءتۇنگى 01:00 شاماسىندا قارۋ قولدانۋ جاعدايىندا ورىن العان. ءبىر اپتا بۇرىن ۋنتسۋكۋل اۋدانىندا اۆتوكولىك جارىلىپ, ءۇش ادام قازا تاپقان-دى. * بەلورۋسسيادا نەگىزگى ازىق-ت ۇلىك – نان, ءسۇت, ەت جانە ءسۇت ونىمدەرىنە دەگەن باعا تاعى 5 پايىزعا كوتەرىلدى. ەلدەگى بۇل جىل باسىنان بەرگى جەتىنشى رەت باعانىڭ ءوسۋى. ەگەر جاعداي ۋشىعىپ جاتسا, وندا باعانى رەتتەۋ قولعا الىنادى. ازىرگە بۇل رەسەي مەن قازاقستان اراسىنداعى باعالىق الشاقتىقتاردى جاقىنداتۋ ماقساتىندا جۇزەگە اسىپ وتىر. * اقش قور بيرجالارىنداعى ساۋدا 5,40-6,80 پايىزدىق تومەن كورسەتكىشپەن جابىلدى. مىسالى, NASDAQ جوعارى تەحنولوگيالىق كومپانياسى 6,83 پايىزعا تومەن سىرعىسا, S&P 500 6,66 پايىزدىق تومەن كورسەتكىشكە يە بولدى. * سيريا پرەزيدەنتى باشار اساد الي حابيبانى قورعانىس ءمينيسترى قىزمەتىنەن بوساتىپ, ورنىنا داۋد رادجحانى تاعايىندادى. بۇعان دەيىن سيريا بيلىگى تاراپىنان كوتەرىلىسشىلەردى اياۋسىز جانشۋمەن كەلىسپەگەن باحرەين, ساۋد ارابياسى مەن كۋۆەيت ءوز ەلشىلەرىن شاقىرتىپ العان بولاتىن.ينتەرنەت ماتەريالدارى نەگىزىندە ازىرلەندى.
