ينۆەستور سىيلاعان ستاديون

استراحان اۋدانىنداعى جالتىر اۋىلىندا جان جادىراتار سپورتتىق سپارتاكيادا بولىپ ءوتتى. ول كوپتەن كۇتكەن ستاديوننىڭ اشىلۋ سالتاناتىنا ارنالىپ, جەرگىلىكتى تۇرعىندار ەسىل, كاپيتونوۆكا جانە جۋراۆلەۆكا اۋىلدىق وكرۋگتەرىنەن كەلگەن سپورتشىلارمەن باق سىناستى. بىردەن ايتايىق, جالتىرلىقتار نامىسقا تىرىسىپ, جەڭىستى قولدان بەرمەدى. ال, جاڭا سپورت كەشەندى اۋىل شارۋاشىلىعى عىلىمدارىنىڭ دوكتورى عالىم قۇدايبەرگەنوۆ باسقاراتىن «لوگوس-ترەيد» جشس سىيعا تارتىپ وتىر. – ەلباسى نۇرسۇلتان نازارباەۆ «بولاشاقتىڭ ىرگەسىن بىرگە قالاي­مىز» اتتى جولداۋىندا بيزنەس وكىلدەرىنە ۇلكەن جاۋاپكەرشىلىك جۇك­تەدى, – دەدى سالتاناتتا ءسوز سويلەگەن ع.قۇدايبەرگەنوۆ. وندا سالا­مات­تى ءومىر سالتىن قالىپتاستىرۋ مەملەكەتتىك ماسەلە رەتىندە كوتەرىلدى. جالتىر اۋىلىنداعى سەرگەي كولوموەتس باسقاراتىن ءبىزدىڭ قاناتتاس كاسىپورنىمىز – «بەتەگە-ۋ» جاۋاپكەرشىلىگى شەكتەۋلى سەرىكتەستىگىنىڭ كەڭسە قىزمەتكەرلەرى تامىز ايىنان جۇمىستى تاڭەرتەڭگى دەنەشى­نىق­تىرۋمەن باستاۋدا. «دەنى ساۋدىڭ – ءىسى ساي» دەيدى حالقىمىز. بۇل – قوعامنىڭ ساۋلىعى مەن بايلىعى. قازاقستاندى قۋاتتاندىرۋ بارشا­مىز­دىڭ قولىمىزدا ەكەندىگىن ۇمىتپايىق. جاڭا ستاديوننىڭ اۋماعى قورشالىپ, اسەم بەزەندىرىلگەن. مۇندا سپورت­تىڭ كەز-كەلگەن تۇرىنەن جارىستار وتكىزۋگە مۇمكىندىك بار. جان­كۇيەرلەر ءۇشىن ورىندىقتار قويىلىپ, جابىق تريبۋنا جاساق­تال­عان. ياعني, اۋداندىق دەڭگەيدەگى باسەكەلەردى وتكىزۋگە دە ابدەن جارايدى. اۋىل قۋانىشىنا سوتسياليستىك ەڭبەك ەرى ە.زولوتارەۆ, قر ۇعا اكادەميگى ە.گوسسەن, گەرمانيا كاسىپكەرى ر.كرەمەر, استراحان اۋدانى­نىڭ اكىمى ر.اكىموۆ ورتاقتاستى. باقبەرگەن امالبەك,     اقمولا وبلىسى.