ۆيني ۆەلوسپورتتان كەتتى

تاياۋدا حح عاسىردىڭ سوڭعى جىلدارى قازاق سپورتىنىڭ تابالدىرىعىن يمەنە اتتاپ, ءتورى­نەن ورىن العان تالانتتى سپورتشى­لارىمىز­دىڭ ءبىرى الەكساندر ۆينوكۋروۆ ۇلكەن سپورتپەن قوشتاستى. پاريج گوسپيتالدارىنىڭ ءبىرىنىڭ الدىندا قاۋمالا­عان فرانتسۋز جۋرناليستەرى. ءبارىنىڭ ساعاتتار بويى كۇتىپ وتىر­عان ءبىر ادامى ەسىككە جاقىنداپ, ونى ايقارا اشا بەرگەندە پىسىقاي جۋرناليستەردىڭ ءبىرى قالىڭ توپتىڭ اراسى­نان سۋى­رىلىپ شىعىپ, امان-ساۋلىق سۇراسقان سوڭ, «ەندىگى جوس­پارىڭىز قانداي, ۇلكەن سپورتتا قالاسىڭ با؟» دەگەن سۇرا­عى­نا: «سپورتتان كەتەمىن», دەگەن ءبىر اۋىز ءسوز جاۋا­بىن ال­دى. «تۋر دە فرانس» كوپكۇندىگى جارىسىندا جارا­قات الىپ, بىرنەشە كۇن گوسپيتالدا ەمدەلىپ شىققان الەكساندر ۆينوكۋروۆتىڭ جۋرناليسكە بەرگەن جاۋابى سول كۇنى, سول ساعاتتا بۇكىل الەمدى شارلاپ, قازاق دالاسىنا دا كەلىپ جەتتى. ەندى ءبىزدىڭ ماڭدايىمىزعا ۆينوكۋروۆتاي ۆەلوشاباندوز جازىلا ما, ونى ءبىر جاراتقاننىڭ ءوزى بىلەتىنى ءسوزسىز. ال ول ءدال بۇگىنگىدەي ۇلكەن جارىستا جاراقات الىپ, ونى سوڭىنا دەيىن اياقتاماي كەتەمىن دەپ ويلاعان جوق, ارينە. ونىڭ بار ويى– «تۋر دە فرانستا» سوڭىنا دەيىن جارى­سىپ, ءساتى تۇسسە ەلىمىزدىڭ نامىسىن ءبىر قورعاپ, كوك بايراقتى ەليسەي الابىندا كوككە كوتەرۋ بولاتىن. تاع­دىر­دىڭ جازعانى سولاي بولدى ما, ەندى ساشا ۆەل­و­سپورت­شى ەمەس, ەندى ول «استانا» كومانداسىنىڭ باس تىزگىنشىسى, مەنەدجەرى. مۇنىڭ ءوزى دە, قا­زاق كومانداسىنا جارات­قان­نىڭ بەرگەن تاعى ءبىر جاقسى­لىعى, شاراپاتى شىعار. ەندى «استانانىڭ» بۇكىل تاكتيكاسى جىلدار بويى تالاي جارىستارعا قاتىسىپ, شىڭدالعان ۆينوكۋروۆقا بايلانىس­تى بولادى. ۆينوكۋروۆتىڭ ۇلكەن سپورتتاعى العاشقى جەڭىسى 1999 جىلى بولدى. www. wikipedia. org  سايتىنا قاراعاندا, وسى جى­لى ول «كريتەريۋم ديۋ دوفينە» جارىسىنىڭ جەڭىمپازى اتان­سا, كەلەسى جىلى سيدنەي وليمپياداسىنىڭ كۇمىس ءجۇل­دەگەرى بولدى. ودان كەيىن الەكساندر جىل سايىن ۇلكەن جارىستاردا جەتىستىكتەرىن قايتالاپ وتىردى. 2001 جىلى گەرمانيا تۋرىندا, 2002 جىلى پاريج – نيتستسا تۋرىندا مارەگە ءبىرىنشى كەلسە, 2003 جىلى تاعى دا پاريج – نيتستسا, شۆەيتساريا تۋرىندا, «ل’ امستەل گولد رەيس» بىركۇن­دىگىن­دە باس ءجۇل­دەگە يە بولدى. سول جىلى «تۋر دە فرانستا», 2004, 2006 جىل­دارى الەم چەمپيوناتىنىڭ قولا جۇلدەگەرى اتاندى. 2005, 2010 جىلدارى لەج – باستون – لەج بىركۇندىگىندە, ۆۋەلتا جارىسىندا مارەگە ءبىرىنشى كەلسە, بيىل رومانديا تۋرى مەن «كريتەريۋم ديۋ دوفينە» ۆەلوبايگەسىندە ءۇشىنشى ورىنعا تابان تىرەدى. ۆينوكۋروۆ ۇلكەن سپورتتا مىنا كوماندالاردا ونەر كورسەتتى. 1998 – 1999 جىلى «Casino», 2000 – 2003 جىل­دارى «Team Telekom», 2004 – 2005 جىلدارى  «T-Mobile», 2006 – 2011 جىلدارى «Astana». اتاقتى سپورتشىنىڭ ءومى­رىندە ءبىر عانا وكىنىش بولدى دەپ ويلايمىز. ول بۇگىنگىنىڭ «قوتىراشتارى» مەن «باتىراشتارىنىڭ» تۋ سىرتىنان ات­قان­داي جالا جاۋىپ, «قۇلاگەردەي» الىسقا شاپقان سپورت­شىنىڭ الدىن وراپ, اياعىنا تۇساۋ سالعانى دەپ بىلەمىز. بىراق ءومىردىڭ تالايىن كورگەن ۆينوكۋروۆتىڭ اتاعىنا بۇل نارسە كىر كەلتىرگەن جوق. قايتا وعان جالا جابىلىپ جاتسا, ونىڭ جولىن كەسكىسى كەلەتىن ادامداردىڭ بار ەكەنى, ال ۆينوكۋروۆ  سوعان شىداپ جۇرگەن شىن مىقتىنىڭ ءوزى ەكەنىن كورسەتىپ بەردى. داستان كەنجالين.