وكيناۆا پرەفەكتۋراسىنداعى مينامي دايتو ارالىنان جاپونيانىڭ نەگىزگى ارالدارىنا قاراي كۇشتى تروپيكالىق تايفۋن ءتونىپ كەلەدى.
تابيعي اپات سوققىسى سەيسەنبىدەن سارسەنبىگە قاراعان ءتۇنى 20 ءشىلدەدە جاپونيانىڭ ورتالىق, شىعىس جانە وڭتۇستىك-شىعىس ءبولىكتەرىنە كەلىپ جەتەدى دەپ كۇتىلۋدە. ۇلتتىق مەتەورولوگيا اگەنتتىگىنىڭ مالىمەتتەرى بويىنشا, ما-ون تايفۋنى ساعاتىنا 20 شاقىرىم جىلدامدىقپەن جىلجىپ كەلەدى. تسيكلوننىڭ ورتاسىندا جەل ساعاتىنا 126 شاقىرىمعا جەتسە, شەت جاقتارىندا جىلدامدىق ساعاتىنا 90 شاقىرىم بولىپ وتىرعان كورىنەدى. كيۋسيۋ, سيكوكۋ جانە امامي ارالدارى جاعالاۋىندا كوتەرىلگەن تولقىننىڭ بيىكتىگى 9-12 مەترگە دەيىن جەتكەن. بىرقاتار پرەفەكتۋرالارداعى بيلىك وزدەرىنە قاراستى اۋماقتاردى جاڭا تابيعات اپاتىن قارسى الۋعا دايىنداۋدا. مۇنداي ساقتىق شارالارىنان 11 ناۋرىزداعى تابيعات اپاتىنا ۇرىنعان «فۋكۋسيما-1» ستانساسى دا بەيتاراپ قالعان جوق. ماماندار اەس نىساندارىن الداعى نوسەر جاڭبىرعا دايىنداۋدا.
«تاليبان» جاۋاپكەرشىلىكتى وزدەرىنە الدى
«تاليبان» قوزعالىسىنىڭ وكىلى پرەزيدەنت حاميد كارزايدىڭ كەڭەسشىسى دجان موحامماد حاننىڭ ولىمىنە قاتىستى جاۋاپكەرشىلىكتى وزدەرىنە الاتىندىقتارىن حابارلاعان.
شابۋىل 17 شىلدە كۇنى كەشكىلىك اۋعانستاننىڭ كاپيسا پروۆينتسياسىندا ورىن العان بولاتىن. بەس ادام ەل پرەزيدەنتى حاميد كارزايدىڭ كەڭەسشىسىنىڭ ۇيىنە باسا-كوكتەپ كىرىپ, دجان موحاممەد حاندى, كۇزەتشىنى جانە اۋعان پارلامەنتىنىڭ تومەنگى پالاتاسىنىڭ دەپۋتاتى موحاممەد حاشەم ۆاتانۆالدى اتىپ كەتكەن. سوڭعى مالىمەتتەر بويىنشا, قازا بولعان ساياساتكەردىڭ ءۇيىنىڭ جانىندا قارۋلى قاقتىعىس ورىن العان كورىنەدى. كەلىپ جەتكەن پوليتسەيلەر قىلمىسكەرلەردى عيمارات ىشىنەن شىعارماي قورشاۋعا الىپ, ونىڭ سوڭى اتىسقا ۇلاسقان. سوڭعى كەزدەرى اۋعانستاندا مەملەكەتتىك قىزمەتشىلەرگە قارسى شابۋىلدار مەن جارىلىستار كۇشەيىپ تۇر.
مۋباراكتىڭ دەنساۋلىعى قالاي؟
ەگيپەتتە ەلدىڭ ەكس-پرەزيدەنتى حوسني مۋباراكتىڭ دەنساۋلىعى تۋرالى اڭگىمە تاعى دا قوزعالا باستادى.
جاقىندا ونىڭ اۆدوكاتى فرەد اد-ديب ەلدىڭ بۇرىنعى باسشىسىنىڭ جاعدايى اياق استىنان ناشارلاپ, ونىڭ ەس-ءتۇسسىز كۇيگە تۇسكەنىن حابارلاعان. بىراق بۇل اقپاراتتى ەگيپەتتىڭ دەنساۋلىق ساقتاۋ مينيسترلىگى تەرىسكە شىعارىپ وتىر. ال قازىرگى ۋاقىتتا مۋباراك ەمدەلىپ جاتقان شارم-ەش-شەيح اۋرۋحاناسىنىڭ باس دارىگەرى بولسا ناۋقاستىڭ جاعدايى بىرقالىپتى دەپ مالىمدەگەن. ايتا كەتۋ كەرەك, ۇستىمىزدەگى جىلعى 3 تامىزدا مۋباراك پەن ونىڭ ەكى ۇلى سوت الدىندا جاۋاپ بەرۋگە ءتيىس. ولارعا ۇستىمىزدەگى جىلدىڭ قاڭتار ايىندا بولعان قارسىلىق اكتسياسى كەزىندە ەرەۋىلشىلەرگە قارسى قاتاڭ شارالار قولداندى دەگەن ايىپ تاعىلىپ وتىر.
قىتاي نارازىلىق ءبىلدىردى
پرەزيدەنت باراك وبامانىڭ بۋدداشىلار كوسەمى دالاي لاما ءحىV-پەن كەزدەسۋىنە بايلانىستى قىتاي اقش-قا نارازىلىق ءبىلدىردى.
«امەريكا جاعى قىتايدىڭ ەلەۋلى نارازىلىق پەن ۇسىنىس بىلدىرگەنىنە قاراماستان بىربەتكەيلىك تانىتىپ, اق ۇيدە باراك وباما مەن دالاي لامانىڭ كەزدەسۋىن ۇيىمداستىردى. ول قحر-دىڭ ىشكى ىسىنە دورەكى تۇردە ارالاسۋ بولىپ تابىلدى. ول قىتاي حالقىنىڭ سەزىمىن قورلاپ, قىتايدىڭ تۇبەگەيلى مۇددەلەرىنە, قىتاي-امەريكا قارىم-قاتىناستارىنا ەلەۋلى نۇقسان كەلتىردى», دەپ اتاپ كورسەتىلگەن قحر-دىڭ سىرتقى ىستەر مينيسترلىگىنىڭ ءمالىمدەمەسىندە. قىتاي سىرتقى ساياسات ۆەدومستۆوسىنىڭ مالىمەتتەرى بويىنشا, قحر سىرتقى ىستەر ءمينيسترىنىڭ ورىنباسارى تسۋي تيانكاي جەكسەنبى كۇنى تاڭەرتەڭ اقش-تىڭ قىتاي ءىسى جونىندەگى ۋاقىتشا سەنىمدى وكىلىمەن كەزدەسكەن. دالاي لاما اقش-قا بۋددالىق ءىس-شارالارعا قاتىسۋ ءۇشىن كەلگەن بولاتىن.
رۋمىنيادا پويىز تونالدى
رۋمىنيا وكىمەتى پويىز ۆاگونىنان ءىرى كولەمدە اسكەري زىمىرانداردىڭ بولشەكتەرىنىڭ ۇرلانعاندىعى جونىندەگى دەرەكتى مويىندادى.
دەگەنمەن, شەنەۋنىكتەر ۇرلانعان, وسىعان دەيىن حابارلانعانداي, وقتۇمسىقتار ەمەس, «گراد» دۇركىندەتە اتۋ زىمىراندىق جۇيەسىنە ارنالعان جارعىشتار عانا ەكەنىن حابارلاعان. وقيعا پويىز دجۋردجۋ ۋەزىنىڭ ستانەشت ستانساسىنا كەلگەن ساتتە ورىن العان. قارۋ-جاراقتىڭ ۇرلانۋىنا بايلانىستى رۋمىنيانىڭ اسكەري پروكۋراتۋراسى تەرگەۋ ءىسىن باستادى. زاڭ ساقشىلارى پويىز قۇرامىن ون جاندارمنان تۇراتىن بولىمشەنىڭ كۇزەتكەنىن انىقتاعان. سوعان قاراماستان, بەلگىسىز بىرەۋلەر ۆاگوننىڭ ەسىگىن بۇزىپ, ءجاشىكتەردى الىپ كەتكەن. تەرگەۋشىلەر بۇل مەتالل سىنىقتارىن ۇرلاۋمەن اينالىساتىن سىعانداردىڭ ارەكەتى دەگەن ۇيعارىم جاساپ وتىر.
جاڭا قولباسشى كەلدى
18 شىلدە كۇنى دۇيسەنبىدە اقش پەن ناتو كونتينگەنتىنىڭ قولباسشىسى گەنەرال دەۆيد پەترەۋس ءوز وكىلەتتىگىن رەسمي تۇردە گەنەرال دجون اللەنگە تاپسىردى.
ساراپشىلاردىڭ پايىمداۋىنشا, اللەننىڭ ناتو كونتينگەنتىنە قولباسشىلىقتى قابىلداپ الۋى يسلام رەسپۋبليكاسىندا, اتاپ ايتقاندا, پاندجشير جانە باميان پروۆينتسيالارىنداعى قاۋىپسىزدىككە قاتىستى احۋالدىڭ ۋشىعۋىمەن تۇسپا-تۇس كەلىپ وتىر. ناتو اسكەرلەرىنىڭ بۇرىنعى قولباسشىسىنىڭ تەرروريزمگە قارسى كۇرەستە ارميا ايتارلىقتاي تابىستارعا جەتتى دەپ مالىمدەگەنىنە قاراماستان, ەلدە تاياۋدا بولعان وقيعالار ونىڭ ءسوزىنىڭ راس ەكەندىگىنە كۇمان تۋدىرىپ وتىر. سەبەبى, شىلدە ايىندا اۋعانستان پرەزيدەنتى حاميد كارزايدىڭ ءىنىسى ءوز كۇزەتشىسىنىڭ قولىنان قازا تاپسا, جەكسەنبى كۇنى پرەزيدەنتتىڭ كەڭەسشىسى دجان موحاممەد حان مەن پارلامەنت دەپۋتاتى اتىپ ءولتىرىلدى. ال اۋعانستانداعى امەريكالىق اسكەرلەر سانىن 30 مىڭ ادامعا كوبەيتۋگە ۇلەس قوسقان دەۆيد پەترەۋس بولسا, ەلىنە ورالىسىمەن ورتالىق بارلاۋ باسقارماسىنىڭ تىزگىنىن قولىنا الماق.
قۇتقارۋ جۇمىستارى جالعاسۋدا
جەر استىندا قالىپ قويعان ەكى شاحتەردى ىزدەستىرۋدى جەدەلدەتۋ ءۇشىن قۇتقارۋشىلار «ۆوركۋتاۋگول» ااق-تىڭ «سەۆەرنايا» شاحتاسىنىڭ ۇيىندىلەرىن اينالىپ ءوتىپ العا قاراي جىلجۋ جونىندە شەشىم قابىلداعان.
قازىرگى ۋاقىتتا ىزدەۋ-قۇتقارۋ جۇمىستارىنا توتەنشە جاعدايلار مينيسترلىگىنىڭ ارقايسىسى بەس ادامنان تۇراتىن ەكى بىردەي ءبولىمشەسى تارتىلىپ وتىر. بەلگىلى بولعان مالىمەتتەر بويىنشا, قۇتقارۋشىلارعا توتەنشە جاعداي ورىن العان شاحتانىڭ كەنشىلەرى دە كومەكتەسۋدە. ماماندار شامامەن العاندا 50 مەتر بولاتىن ءۇيىندىنى وتكەن كورىنەدى, دەگەنمەن ءالى دە 15 مەتر العا جىلجۋ كەرەك. جەر استىندا قالعان شاحتەرلەر ءالى ءتىرى دەگەن ءۇمىت تە جوق ەمەس. ايتا كەتۋ كەرەك, 16 شىلدە كۇنى «سەۆەرنايا» شاحتاسىندا 740 مەتر تەرەڭدىكتە جىنىس قاباتى قۇلاپ, 76 كەنشى دابىل بويىنشا شۇعىل تۇردە جوعارىعا شىعارىلعان بولاتىن. بۇگىنگى كۇنى جەر استىندا قالىپ قويعان شاحتەرلەردى ىزدەستىرۋ جالعاسۋدا.
ينتەرنەت ماتەريالدارى نەگىزىندە ازىرلەندى.
