قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ قۇرامى جاس ماماندارمەن تولىقتى. الماتىدا ۇقك اكادەمياسىنىڭ ون ءۇشىنشى ءبىتىرۋشى تۇلەكتەرى ديپلوم الىپ, اسكەري لەيتەنانت شەنىنە يە بولدى.
بيىل اكادەميانى 81 تۇلەك ءتامامداپ, ولاردىڭ 14-ءى وقۋ ورنىن ۇزدىك ديپلوممەن ءبىتىردى. وسى سالتاناتتى جيىنعا ۇقك ءتوراعاسى نۇرتاي ابىقاەۆ, ۇلتتىق قاۋىپسىزدىك ورگاندارى مەن ۇلى وتان سوعىسى ارداگەرلەرى قاتىسىپ, ۇلكەن ءومىردىڭ ارناسىنا تۇسكەن جاس ماماندارعا اق جول تىلەدى.
– ۇقك اكادەمياسىن تابىستى اياقتاۋلارىڭىزبەن شىن جۇرەكتەن قۇتتىقتايمىن. تاۋەلسىزدىگىمىزدىڭ 20 جىلدىعىنا وفيتسەر اتانىپ مەملەكەت قاۋىپسىزدىگىن قامتاماسىز ەتۋ قىزمەتىنە جولداما الۋ تۇلەكتەرىمىزگە ايرىقشا ماڭىز بەرۋدە. مەملەكەت باسشىسى ارنايى قىزمەت جانە قۇقىق قورعاۋ ورگاندارى قىزمەتىن جەتىلدىرۋدە, مەملەكەتتىك شەكارانى كۇزەتۋدە, ەلىمىزدىڭ قورعانىس قابىلەتىن ارتتىرۋ ماسەلەسىنە ۇنەمى ەرەكشە نازار اۋدارىپ كەلەدى. سوندىقتان دا ەلباسى سىزدەردىڭ وسىندا العان بىلىمدەرىڭىزدى وتان قورعاۋ جولىندا لايىقتى جۇزەگە اسىرۋلارى ءۇشىن بارلىق جاعدايدى جاساپ كەلەدى. وسىعان وراي ءبۇگىن ۇقك ورگاندارى جاڭا زامان تالابىنا ساي بىلىكتى دە ءبىلىمدى جاس كادرلارمەن تولىقتى دەپ سەنەمىن, – دەدى ۇقك توراعاسى ن.ابىقاەۆ.
وقۋ وزاتتارىنا ديپلوم مەن ارنايى ءتوسبەلگىنى ءتوراعانىڭ ءوزى تاپسىردى. ۇلتتىق قاۋىپسىزدىك ماماندارىنا جاقسى ءارى جاۋاپتى قىزمەت ەتۋ ازدىق ەتەتىنىن, ءاربىر وقيعانى ساراپتاپ, سىني كوزبەن باعالاپ, شۇعىل شەشىم قابىلداپ, سىرتقى جانە ىشكى قاۋىپتەردىڭ الدىن-الۋ قاجەتتىگىن باسا ەسكەرتكەن ن.ابىقاەۆ, بۇل ءۇشىن كوميتەت قىزمەتكەرلەرىنە جەتكىلىكتى وكىلەتتىلىكتىڭ بەرىلگەندىگىن تىلگە تيەك ەتتى.
سونداي-اق, رەسپۋبليكا ۇلتتىق قاۋىپسىزدىك كوميتەتىنە قاراستى شەكارا اكادەمياسىن دا 300 تۇلەك ءبىتىرىپ شىققاندىعىن حابارلاعىمىز كەلەدى. ۇقك-گە قاراستى ەڭ بايىرعى ءارى ءبىلىم بازاسى باي وسى وقۋ ورنى تالاي بىلىكتى مامان, العىر ۇلاندى مەملەكەت قىزمەتىنە قوسىپ كەلەدى. جاس وفيتسەرلەرگە اكادەميا ديپلومدارىن تابىس ەتىپ تۇرىپ ۇقك توراعاسى ن.ابىقاەۆ:
– بيىل تاۋەلسىزدىگىمىزگە 20 جىل! ۇلتتىق قاۋىپسىزدىك كوميتەتىنىڭ شەكارا قىزمەتى وسى 20 جىلدا مەملەكەتتىك شەكارامىزدى قىراعىلىقپەن قورعاپ, ەل تىنىشتىعىن جوعارى دەڭگەيدە قامتاماسىز ەتە ءبىلدى. بولاشاقتا دا قازاقستاندىق پاتريوتيزممەن رۋحتانعان, تەرەڭ ءبىلىمدى, كاسىبي وفيتسەرلەرىمىز جاۋاپتى قىزمەتتى لايىقتى جالعاستىرادى دەگەن سەنىمدەمىن. بۇگىن ەلىمىزدىڭ بايىرعى اسكەري وقۋ ورىندارىنىڭ ءبىرى – ۇلتتىق قاۋىپسىزدىك كوميتەتىنىڭ شەكارا اكادەمياسى كەزەكتى تۇلەكتەرىن ۇيادان ۇشىرعالى وتىر. ءسىزدەردى وسى سالتاناتتى كۇنمەن شىن جۇرەگىمنەن قۇتتىقتايمىن! – دەپ جاس مامانداردىڭ بولاشاققا دەگەن قادامىنا جىگەر قوسىپ, مەملەكەتتىك ماڭىزدى مىندەتتى ابىرويمەن اتقارۋعا سەنىم ارتتى.
ۇقك باسشىسى جاس تۇلەكتەرگە «وتان ساقشىسى» دەگەن ابىرويلى اتتى ارقاشان جوعارى ۇستاۋدى, مەملەكەت شەبىنىڭ مىزعىماستىعى مەن ەل تىنىشتىعىن قامتاماسىز ەتۋ جولىنداعى قاسيەتتى مىندەتكە ادال بولىپ, ساپالى اتقارۋدى تاپسىرا وتىرىپ, جاس مامانداردى تاۋەلسىزدىگىمىزدىڭ تۇعىرىن نىعايتا تۇسۋگە شاقىردى. شارا اكادەميا تۇلەكتەرىنىڭ سالتاناتتى شەرۋى مەن اتا-انالاردىڭ اتالمىش وقۋ ورنىنا قابىلدانعان جاس ءتۇلەكتەردى قۇتتىقتاۋىنا جالعاستى.
قانات ەسكەندىر, الماتى.
