بۇدان بۇرىن ازەربايجان مەن ارمەنيانىڭ مەملەكەت باسشىلارى ي.اليەۆ پەن س.سارگسيان رەسەي پرەزيدەنتى د.مەدۆەدەۆتىڭ قاتىسۋىمەن قازان قالاسىندا كەزدەسەتىن بولدى دەپ حابارلانعان ەدى. تاۋلى قاراباق كيكىلجىڭىن بەيبىت جولمەن رەتتەۋدىڭ نەگىزگى قاعيداتتارى تۋرالى كەلىسىم بولار دەپ ۇمىتتەنگەن سول كەزدەسۋ ناتيجەسىز اياقتالدى.
كەزدەسۋدەن شىققان سوڭ ەكى تاراپ تا بەيبىت كەلىسىمگە باسپادى دەپ قارسى جاقتى ايىپتادى. سونىڭ ىشىندە ازەربايجان پرەزيدەنتى ي.اليەۆ ءوز ەلىنىڭ اسكەري بيۋدجەتى بۇگىنگىدەن دە ارتتىرىلىپ, اۋماقتىق تۇتاستىعىن قالپىنا كەلتىرۋ باعىتىنداعى تالپىنىستار جالعاسا بەرەتىنىن مالىمدەدى. «ءبىزدىڭ اسكەري بيۋدجەتىمىز ارمەنيانىڭ وسى باعىتتاعى شىعىنىنان 10 ەسە كوپ, مەن ەلىمىزدىڭ اۋماقتىق تۇتاستىعى كەز كەلگەن جولمەن قالپىنا كەلەتىنىنە سەنىمدىمىن», دەدى ول.
پولكوۆنيك 25 جىلعا سوتتالدى
رەسەيدە اقش-قا مەملەكەتتىك قۇپيانى ساتتى دەپ ايىپتالعان پولكوۆنيك ا.پوتەەۆكە سوت بولىپ, ول سىرتتاي 25 جىلعا باس ەركىنەن ايىرىلدى. ساتقىننىڭ ءوزى ءاشكەرەلەنبەس بۇرىن, بىلتىر ماۋسىم ايىندا اقش-قا قاشىپ كەتكەن ەدى.
ا.پوتەەۆ رەسەي فەدەراتسياسى سىرتقى بارلاۋ قىزمەتىنىڭ امەريكالىق سەكتورىندا باسشى بولىپ ىستەگەن. دەمەك, ول رەسەيدىڭ اقش-قا شپيوندىق ارەكەتتەرىنىڭ ءبارىن دە جاقسى بىلەدى. رەسەيدىڭ اقش-تاعى كوپتەگەن شپيوندارى اشكەرە بولعان سوڭ ساتقىندى ىزدەۋ باستالعان. بىراق ونى تابۋ قيىندىققا تۇسپەدى. ويتكەنى ا.پوتەەۆ الدىمەن وتباسىن, سودان كەيىن ءوزى اقش-قا قونىس اۋدارعان. وسىنىڭ ءوزى-اق ساتقىننىڭ كىم ەكەنىن تانىتىپ بەرگەن.
اسكەري جاتتىعۋ ون كۇنگە سوزىلادى
يراندا ون كۇنگە سوزىلاتىن اسكەري جاتتىعۋ باستالدى. « ۇلى پايعامبار – 6» دەپ اتالعان بۇل جاتتىعۋدا يراننىڭ بارلىق اسكەري قۋاتى كورىنىپ, وندا جاقىن, ورتا جانە الىس قاشىقتىقتارعا جەتەتىن زىمىراندار سىناقتان وتكىزىلەدى. جاتتىعۋلارعا باسشىلىق ەتەتىن گەنەرال ا.حادجيزادەنىڭ ايتۋىنا قاراعاندا, بۇل «ايماقتاعى باسقا ەلدەرگە دەگەن يراننىڭ بەيبىتشىلىك جانە دوستىق سالەمى» بولماق.
مۇنداي جاتتىعۋلار يراندا بۇرىن دا بولعان. ول ايماقتاعى ەلدەردى عانا ەمەس, باتىس ەلدەرىن دە قاۋىپتەندىرگەن. ويتكەنى, ولار يراننىڭ يادرولىق قارۋى بولۋى مۇمكىن دەگەن كۇدىكتەن ارىلماي وتىر. تەھراننىڭ قارۋىنىڭ قاھارىنان قاتتى قورقاتىن ەل – يزرايل. ولار ماحمۇد احمادينەجادتىڭ «بۇل ەلدى الەمدىك كارتادان ءوشىرىپ تاستاۋ كەرەك» دەگەن ۇندەۋىن ۇمىتا الماي كەلەدى.
ساياسي پارتيالار ساۋساعىن بۇگىپ وتىر
گرۋزيادا سايلاۋعا تۇسەتىن ساياسي پارتيالار بەس پايىزدىق «تابالدىرىقتان» وتەتىن بولسا, وزدەرىنىڭ شىعىندارىن جابۋ ءۇشىن 600 مىڭ دوللاردان الاتىن بولىپتى. بۇل تۋرالى ۇكىمەتتىڭ جاڭادان ازىرلەنگەن زاڭ جوباسىندا ايتىلعان.
سونىمەن بىرگە, جاڭا زاڭ جوباسىندا پارلامەنت دەپۋتاتتارىنىڭ سانىن 150-دەن 190-عا دەيىن ارتتىرۋ كوزدەلگەن. ونىڭ 83-ءى ماجوريتارلىق جۇيەمەن, ال 107-ءسى ءبىر مانداتتىق وكرۋگتەردەن سايلانادى. ال وپپوزيتسيا دەپۋتاتتاردىڭ ۇشتەن ەكىسى پروپورتسيونالدى جۇيەمەن سايلانعانىن قالاۋدا. قالاي دەسە دە, جاڭا زاڭ جوباسى بۇرىنعىعا قاراعاندا, دەموكراتيالىق باعىتتا كوپ ىلگەرىلەۋدى كورسەتىپ وتىر دەدى وپپوزيتسيالىق پارتيا باسشىلارىنىڭ ءبىرى.
ساۋداگەرلەر ەرەۋىلگە شىقتى
وزبەكستاننىڭ سامارقاند قالاسىندا ەسكى بازارلاردىڭ ءبىرىن جابۋعا بايلانىستى ساۋداگەرلەر پوليتسيامەن قاقتىعىسىپ قالدى. جەرگىلىكتى بيلىكتىڭ ونىڭ ورنىنا اشقان جاڭا بازارى بۇرىنعىدان جەتى شاقىرىم الىس مەكەندە. ونىڭ ۇستىنە ساۋدا ورنىن جالداۋ دا ۇلعايتىلعان.
ەندى ساۋداگەرلەر 3ح2 مەتر بولاتىن ساۋدا اۋماعى ءۇشىن ەداۋىر قارجى تولەمەك. بۇل وزبەك ساۋداگەرلەرىنىڭ قالتاسى كوتەرە المايتىن قاراجات. سوندىقتان ساتۋشىلار بۇرىنعى ورىننان كەتپەي, ساۋدالارىن جالعاستىرا بەرگەن. ولاردى قۋعا كەلگەن پوليتسيا سول جەردە قاتتى قارسىلىققا ۇشىراعان. ءىس ناسىرعا شاۋىپ, ونداعان ساۋداگەر قاماۋعا الىندى. بىراق قارسىلىق كەلەسى كۇنى دە قايتالاندى. ازىرگە ماسەلەنىڭ شەشىلۋ شەگى كورىنبەيدى.
وپپوزيتسيانىڭ قولتىعىنا سۋ بۇركۋشى كىم؟
بەلارۋس تەلەديدارى دا پرەزيدەنت ا.لۋكاشەنكودان قالماي, سىني سوزدەردى سۋداي اعىلتاتىن بولدى. جەكسەنبى كۇنى مەملەكەتتىك تەلەديداردىڭ جۇرگىزۋشىسى برەست قامالىندا بولعان ۇلى وتان سوعىسىنىڭ 70 جىلدىعىنا ارنالعان شارالارعا رەسەي پرەزيدەنتى د.مەدۆەدەۆتىڭ كەلمەگەنىن قاتتى سىنادى.
ال بەلارۋس پرەزيدەنتى ا.لۋكاشەنكونىڭ ءدال وسى كۇنگە ماسكەۋگە شاقىرىلعانىن «اقىماقشىلىق» جانە «كولگىرسۋلىك» دەپ قاتتى كەتكەن. رەسەيدىڭ «ءبىرىنشى ارناسى» دا وسى كۇنى برەستەگى شارالاردى ەمەس, مينسكىدەگى وپپوزيتسيانىڭ قارسىلىق اكتسياسىن ءتۇسىرۋدى دۇرىس دەپ تاپقان. بەلارۋس ارناسىنىڭ ءتىلشىسى وسى دەرەكتەردى ايتا كەلىپ, ماسكەۋدىڭ بەلورۋسسياداعى وپپوزيتسيانى قولتىقتان دەمەپ وتىرعانىن ايتىپ سالدى.
قىسقا قايىرىپ ايتقاندا:
* فرانتسيا پرەزيدەنتى ن.ساركوزي گرەكيانى بانكروتتىقتان قۇتقارۋدىڭ جاڭا جولىن ۇسىندى. فرانتسۋز بانكتەرى پرەزيدەنتتىڭ قارىزداردى 30 جىل بويى وتەيتىن وبليگاتسيامەن اۋىستىرۋ تۋرالى يدەياسىن قازىردىڭ وزىندە قولداپ وتىر.
* بانگلادەشتە 2009 جىلى كوتەرىلىس جاساعان اسكەريلەرگە سوت بولدى. ايىپتىلار ورىندىعىندا وتىرعان 666 ادامنىڭ توعىزى اقتالىپ, 657-ءسىنىڭ ارقايسىسىنا 7 جىلعا دەيىن مەرزىم كەسىلدى.
* اريزونا شتاتىندا التى ادامدى اتىپ ءولتىرىپ, كونگرەسسمەندى جارالاعان 22 جاسار لي لوفنەر جۇيكە اۋرۋلارىنان ەرىكسىز ەمدەلەتىن اۋرۋحاناعا جىبەرىلدى.
* يتاليانىڭ تۋرين قالاسىنىڭ ماڭىندا سول مەكەندە تۇراتىن تۇرعىندار سۋزاعا تارتىلعان تەمىر جول تەلىمىن سالۋعا قارسى ەرەۋىلگە شىعىپ, پوليتسيامەن قاقتىعىسىپ قالدى. ەرەۋىلگە كەم دەگەندە 2 مىڭداي ادام قاتىسقان.
* اقش-تىڭ پەنسيلۆانيا شتاتىندا بالالاردى دەمالىس لاگەرىنە اپارا جاتقان اۆتوبۋس جەڭىل كولىككە سوقتىعىسىپ, اپات ورىن الدى. اۆتوبۋستاعى بالالار اۋرۋحاناعا جەتكىزىلگەن. جول-كولىك وقيعاسىنا قارسى جولعا شىعىپ كەتكەن جەڭىل ماشينەنىڭ جۇرگىزۋشىسى كىنالى دەپ تابىلدى.
ينتەرنەت ماتەريالدارى نەگىزىندە ازىرلەندى.
