مەرەيتويعا رۋحاني تارتۋ

كەشە «قازاقستان» ورتالىق كونتسەرت زالىندا وتكەن شانحاي ىنتىماقتاستىق ۇيىمىنىڭ 10 جىلدىعىنا ارنالعان  مەرەكەلىك كونتسەرتكە ەل پرەزيدەنتى نۇرسۇلتان نازارباەۆ شىۇ-نىڭ سامميتىنە قاتىسۋشى مارتەبەلى مەيماندارمەن بىرگە كەلدى. قازاقستان ونەر شەبەرلەرىنىڭ مەرەكەلىك شاشۋىن رەسەي پرەزيدەنتى دميتري مەدۆەدەۆ, قحر توراعاسى حۋ تسزينتاو, وزبەكستان پرەزيدەنتى يسلام كاريموۆ, قىرعىزستان پرەزيدەنتى روزا وتۋنباەۆا, تاجىكستان پرەزيدەنتى ەمومالي راحمون, اۋعانستان پرەزيدەنتى حاميد كارزاي, پاكستان پرەزيدەنتى اسيف ءالي زارداري, تاعى باسقا مارتەبەلى قوناقتار تاماشالاپ, دەلەگاتسيا باسشىلارى اتىنان ونەرپازدارعا سەبەت تولى گۇل شوقتارى تارتۋ ەتىلدى. تاۋەلسىزدىك جىلدارىندا ەل­ور­دا ەڭسەسىن بيىكتەتكەن ءبىرتالاي مادەنيەت وشاقتارى قالانسا, سو­نىڭ ىشىندە الەمدىك تالعامعا ساي بوي تۇزەگەن «قازاقستان» ورتا­لىق كونتسەرت زالىندا بۇگىندە مىنە, قازاق ەلىن دامۋدىڭ داڭعىل جولىنا تۇسكەن مەملەكەت رەتىندە تانىپ, القالى جيىنعا كەلىپ جات­قان مارتەبەلى قوناقتارعا ونەردىڭ ءتۇرلى ورىمىنەن ونەگە كورسەتىلۋدە. ساحنادا قۇرمانعازى اتىنداعى قا­زاق مەملەكەتتىك اكادەميالىق حالىق اسپاپتارى وركەسترى (ديريجەرى جالعاسبەك بەگەندىكوۆ) اتاق­تى  «سارىارقا» كۇيىن قۇيقىل­جىت­قاندا, تىلسىمنىڭ تىنىسى اشىلعانداي. ەكراندا – قىران قۇسى قالىقتايدى. ەجەلدەن ەركىندىك اڭساعان قازاق دالاسىنىڭ ءتو­بەسىندە بەيبىتشىلىك قىرانى سامعاپ, بايتاق ەلدىڭ تىنىشتىق كۇزەتشىسىندەي شولادى. ارمەن قاراي شىۇ-نىڭ ون بەلەستەگى جىلناماسى پاراقتالىپ, مەملەكەت باسشىلارىنىڭ لەبىزدەرى جا­زىلعان كورىنىستەر ۇسىنىلدى. في­لم­نەن كەيىن ك.بايسەيىتوۆا اتىن­داعى ۇلتتىق وپەرا جانە بالەت تەا­ترىنىڭ بالەت ترۋپپاسى ن.ءتى­لەن­ديەۆتىڭ «اتا تولعاۋى» كۇيى نەگىزىندە ازىرلەگەن ءبيىن ورىن­دادى. وسى كەشتىڭ ءارىن اش­قان «سەرپەر» دوم­بىراشىلار ان­سامبلىنىڭ تانى­مال كۇيلەردەن ءۇزىندى كەلتىرگەن عا­جايىپ ءنومىرى تاڭداي قاقتىردى. سالتاناتتى كونتسەرتتىڭ شى­مىل­دىعىن حالقىمىزدىڭ قاسيەت­تى كۇي ونەرىمەن اشىپ, ءتول ءداس­تۇر­دى تورگە وزدىرۋدىڭ سەبەبى قا­زا­ق­تى وزگە جۇرتقا ەتەنە تانىس­تى­رۋ نيەتىنەن بولار دەپ بول­جاي­مىز. كسرو حالىق ءارتىسى الىبەك دىنىشەۆ ابايدىڭ «ايتتىم ءسا­لەم, قالامقاس» ءانىن شىرقاعاندا زال ءىشى سىلتىدەي تۇنىپ, ۇيىدى. شىۇ-عا مۇشە ەلدەردىڭ قۇر­مە­تىنە وزبەكتىڭ «ليازگى» ءبيىن «سالتانات» ءانسامبلى, قىرعىزدىڭ حا­لىق ءانى «جىلقىشىنى» قاراقات ءابىلدينا, تاجىكتىڭ حالىق ءانى «لالي باداحشوندى» سيتورا مەن پارۆيز نازاروۆتار, قىتايدىڭ حا­لىق ءانى «ۆو اي ني دجۋنگونى» گۇلزيرا بوكەيحان, ورىستىڭ حا­لىق اندەرىنەن ءپوپۋرريدى تالعات مۇساباەۆ, ولەگ تاتاميروۆ پەن سۇندەت بايعوجين ورىنداپ, شەبەرلىكتەرىن پاش ەتتى. كلاس­سيكا­لىق جانردان موتسارتتىڭ «Rondo Alla Turka» شىعارماسىن ورىن­داعان گۇلزيا ستامبەك, اسەل نۇر­كە­نوۆا, سادجانا مىرزاليەۆا, اسەل راقىمجان مەن ءازيزا بەي­سەنعۇلوۆا سىندى جاس پريما قوبىزشىلاردىڭ ونەرلەرى ءورشىل رۋحتا تانىلسا, ە.للويد-ۋەب­بەر­دىڭ «وپەرا ەلەسى» ميۋزيكلىنەن كورىنىستى ساحناعا الىپ شىققان قا­زاقستاننىڭ حالىق ءارتىسى نۇر­جامال ۇسەنباەۆا مەن مەدەت چو­تا­باەۆتىڭ جوعارى دەڭگەيدەگى ونە­رى ەشكىمدى بەي-جاي قالدىر­مادى. پ.ي. چايكوۆسكيدىڭ «اققۋ كولى» بالەتىنەن «اداجيونى» گاۋ­ھار ۋسينا مەن جاندوس ءاۋ­ب­اكى­روۆ مۇلتىكسىز جەتكىزسە, «دالا بۇلبۇلدارىن» ورىنداعان ءجا­مي­لا باسپاقوۆا, بيبىگۇل جانۇزاق پەن ءجاميلا جارقىمباەۆانىڭ داۋىستارى ءتۇرلى ماقاممەن قۇ­بى­لا ءورىلىپ, اسەرلى شىقتى. س.ەر­كىمبەكوۆتىڭ «اتامەكەن تاڭى» سيمفونيالىق شىعارماسىن ورىن­داعان جاس سكريپكاشىلار ونەرى­نەن ءمىن تاپپايسىز. «ەلىگاي» بالالار حورى ن.نازارباەۆ پەن ا.قورازباەۆتىڭ «ءۇش قوڭىر» ءانىن شىرقاعاندا, ءمولدىر بۇلاق­تاي تۇنىق داۋىستار سىڭعىرلادى. «قازاقستان» انىمەن شارىقتاعان مەرەكەلىك كونتسەرتتىڭ تاريحي شەجىرەسىندە ەل مەرەيىن وسىرەر ايشىقتى بەتتەر قالدى. قاراشاش توقسانباي.