الماتىدا العاشقى انيماتسيالىق فيلمدەر فەستيۆالى باستالدى
بۇل كۇندە مىنا دوڭگەلەك الەمنىڭ تۇرعىندارى مۋلتفيلمدەر جاساۋ ىسىنە ءجۇردىم-باردىم قارامايدى. تەك كورشى قىتاي ەلى انيماتسيالىق تۋىندىلار تۇسىرۋگە جىلىنا 700 ميلليون دوللار بولۋگە شەشىم شىعارسا, رەسەي مەملەكەتى كاسسالىق تابىستان تۇسەتىن پايدانىڭ 20 پايىزىن مۋلتيپليكاتسيادان تاۋىپ وتىر. مۇنان بىلايعى جەردە ءبىزدىڭ ەلىمىز دە مولتەك فيلمدەر ءتۇسىرۋ ىسىنە ءمان بەرمەك. بۇل تۋرالى I قازاقستاندىق «ەر ءتوستىك» انيماتسيالىق فيلمدەر فەستيۆالىنىڭ اشىلۋ سالتاناتىندا ش.ايمانوۆ اتىنداعى «قازاقفيلم» اق پرەزيدەنتى ەرمەك امانشاەۆ ءمالىمدەدى.
وقيعاعا ورايلاس وتكەن ءباسپاسوز ءماسليحاتىندا ەرمەك امانشاەۆ:
– كەڭەس وكىمەتى تۇسىندا ەلىمىزدە جىلىنا 4 مۋلتفيلم ءتۇسىرىلىپ وتىرسا, ەل تاۋەلسىزدىگىن العان 1991 جىلدان 2001 جىلعا دەيىن ەشقانداي انيماتسيالىق فيلمدەر تۇسىرىلمەگەن. «انيماتسيالىق فيلمدەردى ءتۇسىرۋ 2001 جىلدان باستاپ قولعا الىنا باستادى دەسەم بولادى. قازىر ءبىز جىلىنا 4-5 مولتەك فيلمدەردى شىعارۋدامىز. وتكەن جىلى 7-8 قىسقا مەتراجدى مۋلتفيلمدەردى شىعارىپ, وندىرىسكە «ەر توستىك» پەن «سامرۇق قۇس» اتتى ەكى تولىقمەتراجدى مۋلتفيلمدەردى جىبەردىك. بالاعا وي سالاتىن, تالىمدىك-تاربيەلىك مۋلتفيلمدەردى جاساۋدا ءبىز سانىمەن قاتار, ساپاسىنا دا ۇلكەن ءمان بەرەمىز, دەدى.
ۇلتتىق كينوستۋديا جەتەكشىسىنىڭ ايتۋىنشا, انيماتسيا سالاسىنىڭ جوعارى دەڭگەيدە دامۋى ءۇشىن 1-2 جىل ەمەس, تالاي جىلدار كەرەك. جانە مۋلفيلمدەر جاساۋ مەن بالاشا ويلاۋ, ءبۇلدىرشىندەر تالعامىنان شىعۋ قيىننىڭ قيىنى ەكەنىن كينەماتوگرافيا سالاسى اليمساقتان بىلەدى.
– بۇگىندە ءبىزدى كينوتەاترلاردىڭ كوبەيىپ جاتقاندىعى قۋانتادى. 2009 جىلى ەلىمىزدە 77 كينوتەاتر عانا بولسا, 2010 جىلى ونىڭ سانى 196-عا جەتتى. ال, بيلەت ساتىلىمى بۇگىندە 20 ميلليونعا جەتىپ وتىر. كينو تۋىندىلار مەن انيماتسيالىق فيلمدەردى جاساۋ ءۇشىن بىزدە بارلىق جاعداي جاسالعان, ماماندار, تەحنيكالار بار, قارجى دا جەتكىلىكتى, دەگەنمەن ونىمدەرىمىز باسەكەگە قابىلەتتى بولۋى ءۇشىن مەملەكەتتىڭ دە قولداۋى قاجەت,–دەدى ەرمەك امانشاەۆ.
ونىڭ ايتۋىنشا, قازىرگى ۋاقىتتا قازاقستاندا 10-عا تارتا كينوستۋديالار جۇمىس جاسايدى. وعان قوسا امانشاەۆ الداعى كۇندەرى انيماتسيا سالاسىندا باعىن سىناپ كورگىسى كەلەتىن جاس رەجيسسەرلەرگە 5 گرانت بولىنەتىندىگىن ايتتى. بۇل قاراجات دەبيۋتانتتارعا تىرناقالدى تۋىندىلارىن جاساۋعا ايتارلىقتاي سەپتەسەتىن بولادى.
تۇڭعىش رەت وتكىزىلىپ وتىرعان فەستيۆالگە «قازاقفيلم» كينوستۋدياسىنىڭ وكىلدەرىمەن قاتار, شىمكەنت, كوكشەتاۋ, استانا, الماتى جانە تاعى دا باسقا قالالاردان كەلگەن انيماتورلار, رەجيسسەرلەر, سۋرەتشىلەر, انيماتسيالىق كينو بىرلەستىكتەرىنىڭ وكىلدەرى, مولتەك فيلمدەردى جاسايتىن جەكەمەنشىك كينوستۋديالاردىڭ باسشىلارى قاتىسۋدا.
فەستيۆالدى ۇيىمداستىرۋعا ۇيىتقى بولىپ وتىرعان شاكەن ايمانوۆ اتىنداعى «قازاقفيلم» اق پرەزيدەنتى ەرمەك امانشاەۆ جۋرناليستەرگە بەرگەن سۇحباتىندا انيماتسيالىق تۋىندىلار ءتۇسىرۋ قارقىندى دامي باستاعانىن ايتا كەلە: – «فەستيۆالدى وتكىزۋدەگى نەگىزگى ماقساتىمىز – قازاقستانداعى انيماتسيالىق مۋلتفيلمدەر اياسىندا قوردالانىپ قالعان ماسەلەلەردى تالقىلاۋ, قاراۋ, شەشۋ بولىپ تابىلادى», دەدى.
ەندىگى جەردە ءۇش كۇنگە ۇلاساتىن فەستيۆال اياسىندا «سينەما تاۋەرس» كينوتەاترى مەن «قازاقفيلم» كينوستۋدياسىندا قازاقستاندىق انيماتسيالىق فيلمدەردىڭ كورسەتىلىمى, انيماتسيا سالاسىنداعى تانىمال مامانداردىڭ شەبەرلىك دارىستەرى, كىشكەنتاي بۇلدىرشىندەر ءۇشىن قالالىق قۋىرشاق تەاترىنىڭ قويىلىمدارى, سونىمەن قاتار, «قازاق انيماتسياسىنىڭ دامۋى مەن بولاشاعى» دەگەن تاقىرىپتا ءدوڭگەلەك ۇستەل وتىرىستارى وتپەك. دوڭگەلەك ۇستەلدە انيماتسيالىق فيلمدەردىڭ بولاشاعى مەن ءبۇگىنگى جاعدايى تالقىلاناتىن بولادى.
ال «قازاقفيلم» كينوستۋدياسىنىڭ انيماتسيالىق كينو بىرلەستىگىنىڭ جەتەكشىسى جاكەن دانەنوۆتىڭ ايتۋىنشا, «ەر ءتوستىك» مولتەك ءفيلمى كينوستۋديانىڭ سەرپىندى جوباسى بولىپ تابىلادى.
– بۇل تۇڭعىش رەت قولعا الىنىپ وتىرعان تولىقمەتراجدى مۋلتفيلم. تۋىندى 60 مينۋتتان تۇرادى. ونىمەن 10-15 شاقتى انيماتورلار جۇمىس ىستەۋدە. ءمۋلتفيلمدى وسىدان ەكى جىل بۇرىن قولعا الدىق, ەندى العاشقى تولىقمەتراجدى مۋلتفيلمدى جىلدىڭ اياعىنا دەيىن ءبىتىرۋدى جوسپارلاپ وتىرمىز. فيلم بارلىق تالاپتارعا ساي, زاماناۋي ۇلگىدە, سوڭعى تەحنولوگيالارمەن جاسالۋدا», – دەدى ول.
ايناش ەسالي, الماتى.
