كەزدەسۋدەن كەيىن الۆارەس HBO تەلەارناسىنىڭ جۇرگىزۋشىسى ماكس كەللەرماننىڭ سۇراقتارىنا جاۋاپ بەرگەن بولاتىن. «كەلەسى قارسىلاسىڭ كىم؟» دەگەن سۇراققا «گولوۆكين! كەلەسى – سەنسىڭ!» دەدى. وسى ساتتە ارەناداعى ۇلكەن ەكراننان قازاقستاننىڭ تۋى جانە گەننادي گولوۆكين تۋرالى پرومو-روليكتەن ءۇزىندى كورسەتىلدى. ارتىنشا كامەرالار جەكپە-جەككە كورەرمەن رەتىندە كەلگەن گولوۆكيننىڭ ءوزىن كورسەتتى. ول ادەتتە رينگكە شاقىرىلعان بوكسشىلار جۇرەتىن جولمەن ءجۇرىپ, رينگكە كوتەرىلدى جانە ونداعى ادامدارمەن, سونىڭ ىشىندە الۆارەستىڭ وزىمەن جانە كوماندا مۇشەلەرىمەن امانداستى. سوسىن كەللەرمان ەكى بوكسشىدان سۇحبات الدى.
«كانەلونى قۇتتىقتايمىن! ول مىقتى بوكستاستى. بىراق ەندى جاڭا تاريح باستالادى» دەدى گولوۆكين. «سەنى جۇرت وسى ۋاقىتقا دەيىن گولوۆكيننەن قورقادى دەپ ايىپتاپ كەلدى. ەندى نە ايتاسىڭ؟» دەگەن سۇراققا الۆارەس «مەن ەشكىمنەن قورىقپايمىن» دەدى جانە قىركۇيەكتىڭ 16-سى گولوۆكينمەن جەكپە-جەككە دايىن ەكەنىن ايتتى. «سەن بۇعان دەيىن كەرەمەت بوكس جولىمەن ءجۇرىپ ءوتتىڭ. بىراق گولوۆكيندى جەڭسەڭ, ناعىز ۇلى بوكسشى بولاسىڭ» دەدى وعان جۇرگىزۋشى. ال گولوۆكين الۆارەستىڭ ءوز كارەراسىنداعى ەڭ مىقتى قارسىلاس بولاتىنىن ايتتى.
كىشى چاۆەسپەن 12 راۋندىق كەزدەسۋدە ساۋل الۆارەس تازا ۇتتى. تورەشىلەردىڭ ءبارى 120-108 ەسەبىمەن بارلىق راۋندى الۆارەسكە بەردى. مۇنى چاۆەستىڭ ءوزى دە مويىندادى. «ول جەكپە-جەك بويى مەنى ۇزدىكسىز سوققىلاۋمەن بولدى» دەدى ول.
