«تولەگەن مەن قىز جىبەكتىڭ كەزدەسۋى». قازاقتىڭ تۇڭعىش كاسىپقوي سۋرەتشىسى, ش.ءۋاليحانوۆ اتىنداعى مەملەكەتتىك سىيلىقتىڭ يەگەرى ءابىلحان قاستەەۆتىڭ ورال قالاسىندا ساقتالعان كارتيناسى وسىلاي دەپ اتالادى. كەسكىندەمە 40ح28سم كولەمدى قاعازعا تۋشپەن سالىنعان.
بۇل تۋىندى ورال مۋزەيىنە قالاي تاپ بولدى؟ مۋزەيدىڭ قور ساقتاۋشىسى مۇحتار وتەستىڭ ايتۋىنشا, سۋرەت ت.شەۆچەنكو اتىنداعى قازاق مەملەكەتتىك كوركەمسۋرەت گالەرەياسىنان ورال وبلىستىق تاريحي-ولكەتانۋ مۋزەيىنىڭ قورىنا 1961 جىلدىڭ قاڭتار ايىندا تاپسىرىلعان ەكەن. شاماسى اۆتوردىڭ ءوزى قىز جىبەكتىڭ ايداي بەينەسى ونىڭ تۋعان جەرىندە تۇرعانى ءجون دەسە كەرەك. كارتينادا ءۇش اقبوزدى قاتار جەككەن كۇيمەنىڭ سالتاناتى, جىبەكتىڭ «جالعىز اتتى جولاۋشىمەن سويلەسۋگە نامىستانىپ, تەك قارشىعانىڭ ۇگىتىنەن كەيىن عانا بەتىن ءبىر اشىپ, جارق ەتىپ كورىنىپ, امانداسىپ, قايتادان بەتىن جاۋىپ, پاۋەسكەنىڭ قاقپاعىن تۇيمەلەپ, جاتىپ قالارىنىڭ» الدىنداعى ءبىر ءسات سۋرەتتەلسە كەرەك.
ايتپاقشى, قازاقتىڭ تانىمال سۋرەتشىسىنىڭ تاعى دا ەكى تۋىندىسى ورال مۋزەيىندە ساقتاۋلى. «العاشقى قار» («پەرۆىي سنەگ») شىعارماسى 1945 جىلعى 26 قازاندا, ال «تاۋ ەتەگىندە» («ۋ پودنوجيا گور») تۋىندىسى 1951 جىلى قاعازعا اكۆارەلمەن سالىنعان ەكەن.
قازبەك قۇتتىمۇرات ۇلى,
«ەگەمەن قازاقستان»
ورال
