قاميدوللا نۇرتاي ۇلى 1927 جىلى 15 جەلتوقساندا الەكسەەۆ اۋدانىنىڭ قۇرقۇدىق اۋىلىندا دۇنيەگە كەلدى. اكەسى نۇرتاي مەن اناسى ءاتي بەس جاسقا قاراعان شاعىندا قايتىس بولىپ, ول جاستاي جەتىم قالدى. ول سولتۇستىك قازاقستاننىڭ ستەپنياك قالاسىنداعى ورتا مەكتەپتە ءبىلىم الدى. 1944 جىلى ورتا مەكتەپتى جانە التى ايلىق مۇعالىمدەر كۋرسىن ويداعىداي ءتامامداپ, ستەپنياك اۋدانىنا قاراستى دانيلوۆكا كەنتىندەگى ورتا مەكتەپتە ماتەماتيكا ءپانىنىڭ ۇستازى بولىپ ەڭبەك جولىن باستادى.
1945-1949 جىلداردا اباي اتىنداعى پەداگوگيكالىق ينستيتۋتتىڭ تاريح فاكۋلتەتىن ۇزدىك ءبىتىرىپ, اقمولا پەداگوگيكالىق ۋچيليششەسىنە جولداما الدى. وسى وقۋ ورنىنا مۇعالىم رەتىندە جۇمىسقا قابىلدانعان قاميدوللا نۇرتاي ۇلى 1951 جىلى وسى ۋچيليششەنىڭ ديرەكتورى بولىپ تاعايىندالادى. ال 1959 جىلدان 1963 جىلعا دەيىن وقۋ-اعارتۋ, جوعارى مەكتەپ جانە عىلىمي مەكەمەلەر قىزمەتكەرلەرى كاسىپوداعىنىڭ اقمولا وبلىستىق كوميتەتىنىڭ توراعاسى بولىپ سايلانادى. بارلىق سانالى عۇمىرىن ەگەمەن ەلىمىزدىڭ ءبىلىم سالاسىن دامىتۋعا ارناعان قاميدوللا نۇرتاي ۇلى 1963 جىلى اقمولا قۇرىلىس تەحنيكۋمىنىڭ ديرەكتورلىعىنا جوعارىلاتىلادى. ون جىلدان استام ۋاقىت وسى ىرگەلى وقۋ ورنىنا باسشىلىق جاساعان ول 1975 جىلى قازاق تەمىر جولى, كەيىننەن تىڭ تەمىر جولى باسقارماسى وقۋ ءبولىمى باستىعىنىڭ ورىنباسارى قىزمەتىن اتقارىپ, 1988 جىلى قۇرمەتتى ەڭبەك دەمالىسىنا شىعادى. زەينەتكەرلىككە شىققانمەن ق.نۇرتاەۆ وسكەلەڭ ۇرپاققا ءتالىمدى تاربيە, سىندارلى ءبىلىم بەرۋ جولىنداعى ەڭبەگىن ودان ءارى جالعاستىردى. وسى سالادا ول 1997 جىلعا دەيىن جەمىستى ەڭبەك ەتتى.
جوعارى ازاماتتىقتىڭ ونەگەسىن تانىتقان قاميدوللا نۇرتاي ۇلى ومىرلىك زايىبى ءماريام ياحياقىزىمەن بىرگە ءتورت بالا تاربيەلەپ, ۇلىن ۇياعا, قىزىن قياعا قوندىردى. مارقۇم قاماكەڭ ءوزىنىڭ ۇزاق تا ونەگەلى عۇمىرىندا ۇلكەنگە قۇرمەت, كىشىگە ءىلتيپات كورسەتىپ, ەجەلگى اقمولا ءوڭىرىنىڭ ابزال اقساقالىنا اينالدى. ول ءوز ورتاسىنىڭ قادىرى مەن قۇرمەتىنە بولەنە ءبىلدى. سونىمەن بىرگە ونىڭ ەل ءۇشىن اتقارعان ەرەن ەڭبەكتەرى دە ەلەۋسىز قالعان جوق. ق.نۇرتاەۆ «قازاق كسر وقۋ ءىسىنىڭ ۇزدىگى», «كسرو ءبىلىم بەرۋ ءىسىنىڭ ۇزدىگى», «قۇرمەتتى تەمىرجولشى» قۇرمەتتى اتاقتارىنا يە بولىپ, «ەڭبەكتەگى ەرلىگى ءۇشىن» مەدالىمەن ماراپاتتالدى. ارداقتى ازامات, اياۋلى اكە, اسىل اتا, مارقۇم قاميدوللا نۇرتاەۆتىڭ جارقىن بەينەسى بالالارىنىڭ, نەمەرە-شوبەرەلەرىنىڭ, تۋعان-تۋىسقاندارىنىڭ جادىندا ءاردايىم ساقتالادى.
ەسكە الۋشىلار: بالالارى جانە قاماكەڭدى قادىرلەيتىن استانالىق زيالى قاۋىم
