«جەڭىس» جوباسى 2015 جىلدان جۇرگىزىلەدى. جوبانىڭ وپەراتورى «Samruk-Kazyna Trust» الەۋمەتتىك جوبالارىن دامىتۋ قورى. ەرىكتىلەر جاساقتارى كەلەسى قالالاردا جۇمىس ىستەيدى: استانا, الماتى, اقتاۋ, اتىراۋ, اقتوبە, جاڭاوزەن, قاراعاندى, كوكشەتاۋ, قوستاناي, قىزىلوردا, پاۆلودار, پەتروپاۆل, رۋدنىي, سەمەي, تاراز, تالدىقورعان, تەكەلى, تەمىرتاۋ, ورال, وسكەمەن, شىمكەنت, ەكىباستۇز.
2016 جىلدىڭ قورىتىندىسى بويىنشا جوبا شەڭبەرىندە قازاقستاندا تۇراتىن 2911 ارداگەرگە, سوما مولشەرى 291,1 ملن تەڭگەنى قۇرايتىن كومەك كورسەتىلدى. ەرىكتىلەر جاساقتارى جىل سايىن ۇوس ارداگەرلەرىنىڭ شارۋاشىلىعىنا جاردەم بەرەدى, ولارعا ءدارى-دارمەك, ازىق-ت ۇلىك, سونداي-اق ءبىرىنشى قاجەتتىلىك بويىنشا قولداۋ كورسەتەدى.
2017 جىلدان باستاپ ۇوس ارداگەرلەرى عانا ەمەس, ولارعا تەڭەستىرىلگەن تىل ەڭبەككەرلەرىنە دە كومەك كورسەتىلەتىن بولادى. جوبانىڭ «جەڭىستى جۇرەگىڭدە ساقتا!» ۇرانىنا سايكەس, ەرىكتىلەر رەيدتەرى بۇكىل ەل بويىنشا, ءتىپتى ۇستىمىزدەگى جىلدىڭ جەلتوقسان ايىنىڭ اياعىنا دەيىن جالعاسادى.
2016 جىلى «جەڭىس» جوباسى اياسىندا «قازپوشتا» اق تاراپىنان, سونداي-اق «دالالىق پوشتا» اكتسياسى ىسكە قوسىلىپ, ونىڭ شەڭبەرىندە ءاربىر «مەيىرىمدى جان» ارداگەرگە حات جازىپ, ارنايى قوراپشالار ارقىلى جىبەرگەن ەدى. اكتسيا ۇستىمىزدەگى جىلى دا جالعاساتىن بولادى.
بۇدان باسقا, جوبا اياسىندا «جولاۋشىلار تاسىمالى» اق 1-31 مامىر ارالىعىندا ۇوس ارداگەرلەرىنە ارنالعان كۋپە ۆاگوندارىندا ولاردىڭ تەگىن جول جۇرۋلەرىن قامتاماسىز ەتەدى.
«ەگەمەن-اقپارات»
