اتالعان ەلدە التى جىلدان استام ۋاقىتتان بەرى جالعاسىپ جاتقان سوعىستىڭ ىقپالى سەزىلمەگەن ايماق جوق دەۋگە بولادى. ۇزاققا سوزىلعان قاقتىعىس تاياۋ شىعىستىڭ عانا ەمەس, بۇكىل الەمنىڭ باس اۋرۋىنا اينالدى. سول ءۇشىن دە الەمدىك قوعامداستىق بەيبىتشىلىكتىڭ ورناۋىنا كۇش-جىگەرىن جۇمساۋدا. سيريا ماسەلەسىنە قاتىسى بار سىرتقى ءجانە ىشكى كۇشتەردىڭ بارلىعى استانا پروتسەسىنىڭ جالعاسۋىنا ءمۇددەلى ەكەندىكتەرىن كورسەتتى. ءتورتىنشى راۋندقا تاراپتاردىڭ بارلىعىنىڭ كەلگەنى وسىنىڭ ءبىر كورىنىسى.
ارينە, قارۋلى وپپوزيتسيا توپتارىنىڭ كەلىسسوزدەردىڭ ءتورتىنشى راۋندىنا كەلۋىنە قول جەتكىزۋ وڭاي ەمەس. ياعني, مۇنى قازاقستاندىق ديپلوماتيانىڭ عانا ەمەس, بارلىق تاراپتاردىڭ ماڭىزدى جەتىستىگى دەپ باعالاعان ءجون.
ارينە, جاعداي ءالى دە كۇردەلى, ونى وسى راۋندتا شەشىپ تاستاۋ مۇمكىن ەمەس. دەگەنمەن, تاراپتاردىڭ بارلىعىنىڭ ءبىر ۇستەل باسىنان تابىلعانى, وسى فورماتقا بارلىعىنىڭ كەلىسكەنى پروتسەستىڭ الداعى ۋاقىتتا ىلگەرىلەۋىنە مىقتى نەگىز بولدى, ول بولاشاقتا احۋالدىڭ بەيبىت جاعدايدا شەشىلۋىنە الىپ كەلۋى مۇمكىن.
ءادىل كاۋكەنوۆ,
ساياساتتانۋشى
