ءىس-شاراعا پارلامەنت سەناتى مەن ءماجىلىسىنىڭ دەپۋتاتتارى, پرەزيدەنت اكىمشىلىگىنىڭ, كونستيتۋتسيالىق كەڭەستىڭ, جوعارعى سوتتىڭ, باس پروكۋراتۋرانىڭ جانە باسقا دا مەملەكەتتىك ورگاندارىنىڭ وكىلدەرى, سونداي-اق ديپلوماتيالىق كورپۋس پەن حالىقارالىق ۇيىمداردىڭ, عىلىمي جانە ازاماتتىق قوعامنىڭ وكىلدەرى قاتىستى.
تانىستىرىلىم بارىسىندا ادام قۇقىقتارى جونىندەگى ۋاكىل اسقار شاكىروۆ ازاماتتاردىڭ شاعىمدارى مەن وتىنىشتەرىن, مونيتورينگ قىزمەتىنىڭ ناتيجەلەرىن تالداۋ نەگىزىندە قۇراستىرىلعان, قازاقستانداعى ادام قۇقىقتارى مەن بوستاندىقتارىن ىسكە اسىرۋدىڭ بارىسى قامتىلعان شولۋ ۇسىندى. جالپى, 2016 جىلى ومبۋدسمەننىڭ قاراۋىنا ازاماتتار قۇقىعىنىڭ بۇزىلعانى جانە قىسىم جاسالعانى بويىنشا 1304 جازباشا جانە اۋىزشا ارىز-شاعىم كەلىپ ءتۇسىپتى.
ءىس-شاراعا قاتىسۋشىلار ەلىمىزدىڭ نەگىزگى زاڭىندا ومبۋدسمەن مارتەبەسىن نىعايتۋ اياسىندا ۇلتتىق قۇقىق قورعاۋ مەكەمەسىن جەتىلدىرۋ ماسەلەلەرىنە ەرەكشە نازار اۋداردى. سونداي-اق, ومبۋدسمەن ادام قۇقىقتارىن قورعاۋ جۇيەسى بويىنشا مەملەكەتتىك ورگاندارمەن, ۇكىمەتتىك ەمەس جانە حالىقارالىق ۇيىمدارمەن ءوزارا بايلانىستارعا باسىمدىق بەرىلەتىنىن اتاپ ءوتتى.
تانىستىرىلىم بارىسىندا قۇقىق قورعاۋ جونىندەگى ماسەلەلەرگە وراي بىرقاتار باعىتتار بويىنشا پىكىر الماسۋ بولدى. كەزدەسۋ قورىتىندىسىندا قاتىسۋشىلار 2016 جىلى قازاقستان ادام قۇقىقتارىن ىسكە اسىرۋ ءۇشىن قولدانىستاعى تەتىكتەردىڭ تۇراقتى دامۋىن قامتاماسىز ەتە الدى دەگەن پىكىرلەرىن ءبىلدىردى.
