سەسسيا تۇراقتى دامۋ ماقساتتارىنا جەتۋدەگى مەملەكەتتىك باسقارۋ رولىنە ارنالدى. سەسسيا بارىسىندا الەمنىڭ جەتەكشى ساراپشىلارى ينستيتۋتسيونالدى كوشباسشىلىقتى دامىتۋ جولدارى مەن ءتيىمدى باسقارۋ قاعيداتتارىن تالقىلادى. سونىمەن بىرگە تۇراقتى دامۋ ماقساتتارىن جۇزەگە اسىرۋ جانە جەرگىلىكتى بيلىك ورگاندارىنا قولداۋ كورسەتۋ ماسەلەلەرىن قاراستىردى.
ءاليحان بايمەنوۆ ءوز سوزىندە «تۇراقتى دامۋ ماقساتتارىن جۇزەگە اسىرۋ جولىندا ءتيىمدى مەملەكەتتىك باسقارۋ, ارىپتەستىك جانە ينكليۋزيۆتىك ۇعىمدارىنىڭ بىرىكتىرۋشى فاكتورلارى - قۇرمەت پەن تۇسىنىستىك. ەڭ الدىمەن, بۇل – ازاماتتاردىڭ قۇقىعى پەن ابىرويىن, مۇددەسى مەن مۇمكىندىكتەرىن قۇرمەتتەۋ ءارى ءتۇسىنۋ», - دەدى.
سەسسيا بارىسىندا تۇراقتى دامۋ ماقساتتارىنا جەتۋ ءۇشىن ءتيىمدى جۇمىس ىستەيتىن, جەتكىلىكتى قارجىلاي جانە ادامي رەسۋرستارعا يە مەملەكەتتىك مەكەمەلەر تۇرىندەگى ەلەۋلى الەۋەت قاجەت ەتىلەتىندىگى ايتىلدى. قاتىسۋشىلار تۇراقتى دامۋ ماقساتتارىن جۇزەگە اسىرۋدا مەمەكەتتىك مەكەمەلەردىڭ ايماقتىق جانە ايماقارالىق ارىپتەستىگىنىڭ ماڭىزدىلىعىن اتاپ ءوتتى.
ساراپشىلار كوميتەتى سەسسيا قورىتىندىسى بويىنشا مەملەكەتتەرگە تۇراقتى دامۋ ماقساتتارىنا جەتۋدە مەملەكەتتىك باسقارۋدى جاقسارتۋعا قاتىستى ءوز كەڭەستەرىن دايارلادى.
ساپار اۋقىمىندا ءاليحان بايمەنوۆ بۇۇ باس حاتشىسىنىڭ وڭتۇستىك-وڭتۇستىك ىنتىماقتاستىعى بويىنشا ۋاكىلى حورحە چەديەك جانە ەىدۇ مەملەكەتتىك باسقارۋ مەن اۋماقتىق دامۋ بويىنشا دەپارتامەنت ديرەكتورى رولف التەرمەن كەزدەستى. تاراپتار ىنتىماقتاستىقتى دامىتۋ جانە ورتاق باستامالاردى جۇزەگە اسىرۋ پەرسپەكتيۆالارىن تالقىلادى.
