دەنساۋلىق ساقتاۋ ءمينيسترى ەلجان ءبىرتانوۆ تانىستىرعان زاڭ جوباسى الەۋمەتتىك مەديتسينالىق ساقتاندىرۋ قورىنا جارنالار مەن اۋدارىمداردىڭ مولشەرىن قايتا قاراۋ, سونداي-اق, جارنا تولەۋشىلەردىڭ تىزبەسىن انىقتاۋ ماقساتىندا ازىرلەنگەن. وسىعان بايلانىستى اتالعان زاڭ جوباسىندا قازاقستان اۋماعىندا تۇراقتى تۇراتىن شەتەلدىكتەر مەن ازاماتتىعى جوق ادامدارعا تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جانە مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىندە ەل ازاماتتارىمەن بىردەي مەديتسينالىق كومەك الۋ قۇقىعىن ۇسىنۋعا قاتىستى نورما كوزدەلگەن. ال اۋدارىمدار مەن جارنالار تولەنبەگەن جاعدايدا, ءمامس جۇيەسىندەگى مەديتسينالىق كومەككە ازاماتتاردىڭ قۇقىعى بويىنشا نورما ناقتىلانادى.
«مىندەتتى الەۋمەتتىك مەديتسينالىق ساقتاندىرۋ جونىندەگى زاڭ جوباسى بويىنشا مولشەرلەمەلەردى جانە اۋدارىمدار مەن جارنالاردى ەسەپتەۋ نىساندارىن وزگەرتۋ, تولەۋشىلەردىڭ جاڭا ساناتتارىن, ولار ءۇشىن جارنالاردى مەملەكەت جۇزەگە اسىراتىن ادامداردىڭ ساناتتارىن ەنگىزۋ, الەۋمەتتىك مەديتسينالىق ساقتاندىرۋ قورىنىڭ جۇمىسىن ۇيىمداستىرۋ جانە مىندەتتى الەۋمەتتىك ساقتاندىرۋ مەن تەگىن مەديتسينالىق كومەكتىڭ كەپىلدىك بەرىلگەن كولەمى جۇيەسىندە ءدارى-دارمەكپەن قامتاماسىز ەتۋ ماسەلەلەرى تۇرعىسىندا تۇزەتۋلەر قاراستىرىلىپ وتىر», – دەدى مينيستر ە.ءبىرتانوۆ.
ەلدەگى ماكروەكونوميكالىق جاعدايعا بايلانىستى, جۇمىس بەرۋشىلەرگە تۇسەتىن جۇكتەمەنى تومەندەتۋ ماقساتىندا ولاردىڭ اۋدارىمدارىنىڭ دەڭگەيىن تومەندەتۋ مەن جەكە كاسىپكەر جارنالارىنىڭ مولشەرىن بەكىتۋ ۇسىنىستارى ەنگىزىلگەندىگىنە توقتالعان بايانداماشى بيىلدان باستاپ تولەنەتىن جارنا كولەمى مەن مەرزىمدەرىن اتاپ ءوتتى.
«مەملەكەتتىڭ قورعا تولەۋگە جاتاتىن مىندەتتى الەۋمەتتىك مەديتسينالىق ساقتاندىرۋ جارنالار مولشەرى 2018 جىلدىڭ 1 قاڭتارىنان 3,75 پايىز دەڭگەيىندە ۇسىنىلادى. جۇمىس بەرۋشىلەردىڭ ساقتاندىرۋ اۋدارىمدارى 2017 جىلعى 1 شىلدەدەن باستاپ 1 پايىز, ال 2018 جىلعى 1 قاڭتاردان 1,5 پايىز بولۋى ەسكەرىلگەن. ءوزىن ءوزى جۇمىسپەن قامتىعان حالىقتىڭ جارنالارى ەڭ تومەنگى ەكى جالاقىدان 5 پايىزدى قۇرايدى», – دەدى مينيستر.
ايتا كەتەيىك, مەديتسينالىق كومەكتىڭ قولجەتىمدىلىگىن قامتاماسىز ەتۋ ماقساتىندا جارنالارىن مەملەكەت تولەيتىن ادامدار ساناتىنا 4 جاڭاسىن قوسۋ ۇسىنىلادى. وسى ورايدا جۇمىس ىستەمەيتىن 18 جاسقا دەيىن مۇگەدەك بالاعا كۇتىمدى جۇزەگە اسىراتىن ازاماتتار, جۇمىس ىستەمەيتىن ورالماندار, قازاقستان اۋماعىندا تۇراقتى تۇراتىن شەتەلدىكتەر مەن ازاماتتىعى جوق ادامدار, ءۇش ايدىڭ ىشىندە ورتا تەحنيكالىق جانە كاسىپتىك ورتا بىلىمنەن كەيىنگى جوعارى ءبىلىم بەرۋ, سونداي-اق, جوعارى بىلىمنەن كەيىن ءبىلىم بەرۋ ۇيىمدارىندا وقۋىن اياقتاعان ادامدار قامتىلادى.
وتىرىستا دەپۋتاتتار «جول ءجۇرىسى تۋرالى» زاڭعا وزگەرىستەر ەنگىزۋ تۋرالى» زاڭ جوباسىن تالقىلادى. ماجىلىستەگى زاڭناما جانە سوت-قۇقىقتىق رەفورما كوميتەتىنىڭ مۇشەسى قانات مۋسين تانىستىرعان قۇجاتتا جولاۋشىلاردىڭ پوليتسيا قىزمەتكەرىنىڭ رۇقساتىنسىز كولىكتەن شىعۋىنا رۇقسات بەرەتىن وزگەرىس ەنگىزۋ كوزدەلەدى.
«كولىكتى توقتاتقاننان كەيىن پوليتسەيدىڭ مىندەتى زاڭ جۇزىندە بەكىتىلەدى: كولىككە بىردەن كەلىپ, ءوزىن تانىستىرىپ, قىزمەتتىك كۋالىگىن كورسەتىپ, توقتاتۋ سەبەبىن ءتۇسىندىرىپ, تەحنيكالىق قۇرال قولدانىلسا, ول تۋرالى مالىمەت بەرۋى ءتيىس. وسى ۋاقىتقا دەيىن بۇل مىندەتتەر ىشكى ىستەر ءمينيسترىنىڭ بۇيرىعىندا عانا بولعان ەدى جانە ول ءاردايىم ورىندالا بەرگەن جوق», – دەدى ق.مۋسين.
سونىمەن قاتار, كولىك توقتاتىلعان كەزدە جۇرگىزۋشىنىڭ پوليتسەيدىڭ ءىس-ارەكەتىن ۆيدەوعا ءتۇسىرۋ قۇقىعى زاڭ جۇزىندە بەكىتىلەدى جانە پوليتسەيدىڭ قىزمەتتىك وكىلەتتىلىگىن اسىرا پايدالانۋعا جول بەرەتىن نورمالاردى الىپ تاستاۋ ماقساتىندا ارنايى شارالار ءتىزىمى قابىلدانادى. سونداي-اق, تاعى ءبىر وزگەرىستىڭ ءبىرى – مەرزىمى وتكەن جۇرگىزۋشى كۋالىگىن اۋىستىرۋ كەزىندە مىندەتتى ءتۇردە ەمتيحاندى قايتا تاپسىرۋ ءمىندەتتەلمەيتىن بولدى. سول سياقتى, جولاۋشىلار تاسىمالىمەن ۇدايى اينالىسپايتىن كولىكتەرگە تۇنگى ۋاقىتتا جولاۋشىلار تاسىمالداۋعا سالىنعان تىيىم مەن كولىكتەرگە اەروگرافيالىق سۋرەتتەرگە سالىنعان تىيىم الىپ تاستالادى. باعدارشام الدىندا توقتاۋ كەرەك سىزىقتان اسىپ كەتكەنى ءۇشىن ايىپپۇل كولەمى 5 اەك-تەن 3 اەك-كە دەيىن تومەندەتىلەدى دەپ كۇتىلۋدە.
«بۇل جەردە ادىلەت مينيسترلىگى وزگە دە مۇددەلى مەملەكەتتىك ورگاندار مەن قاراپايىم ادامداردى قاتىستىرا وتىرىپ, «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دايىنداپ جاتىر. بۇل ارقىلى جول قوزعالىسى ەرەجەلەرىن بۇزۋعا سالىناتىن ءبىرقاتار ايىپپۇلدار مولشەرى تومەندەپ, ەسكەرتۋ سياقتى شارالاردىڭ قولدانىلۋ مۇمكىندىگى ارتادى. ال زاڭ جوباسى ماجىلىسكە بيىل جازدا قاراۋعا بەرىلەدى دەپ جوسپارلانۋدا», – دەدى دەپۋتات.
جالپى وتىرىس اياسىندا دەپۋتاتتار قارجى ءمينيسترى باقىت سۇلتانوۆتىڭ تانىستىرۋىمەن «2015 جىلعى 8 قىركۇيەكتەگى «تابيعي تەرىدەن جاسالعان كيىم زاتتارى, كيىمگە كەرەك-جاراقتار جانە وزگە دە بۇيىمدار» تاۋار پوزيتسياسى بويىنشا تاۋارلاردى باقىلاۋ (سايكەستەندىرۋ) بەلگىلەرىمەن تاڭبالاۋدى ەنگىزۋ ءجونىندەگى قاناتقاقتى جوبانى 2015-2016 جىلدارى ىسكە اسىرۋ تۋرالى كەلىسىمنىڭ قولدانىلۋ مەرزىمىن ۇزارتۋ جونىندەگى حاتتامانى راتيفيكاتسيالاۋ تۋرالى» زاڭ جوباسىن تالقىلادى. وعان قوسا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ولاردى قازاقستان رەسپۋبليكاسى كونستيتۋتسياسىنىڭ نورمالارىنا سايكەس كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن «ەۋرازيالىق ەكونوميكالىق وداققا مۇشە مەملەكەتتەر اراسىنداعى قىزمەتتىك جانە ازاماتتىق قارۋدى وتكىزۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىنا قورىتىندى ازىرلەۋ جونىندە قاۋلى قابىلداندى.
نۇرلىبەك دوسىباي,
«ەگەمەن قازاقستان»
