جۋىقتا كورنەكتى كوسەمسوزشى جانە اۋدارماشى, وچەرك شەبەرى, قازاقستان جۋرناليستيكاسىندا وزىندىك ورنى بار تۇلعالى ازامات, «كازاحستانكايا پراۆدا» گازەتى» اق باسقارماسىنىڭ توراعاسى الەكساندر يۋرەۆيچ تاراكوۆ ەردىڭ جاسى 50-گە كەلدى. ول ءوزىنىڭ بۇل مەرەيلى شاعىن, ەڭ الدىمەن شىعارماشىلىق ەڭسەلى ەڭبەكپەن اتاپ وتكىسى كەلگەن سەكىلدى. وسىعان وراي, جۋرناليستىڭ «تاعدىردى تاڭبا سوزبەن تارازىلاۋ» («سۋدبۋ ۆىۆەريايا پەچاتنوي ستروكوي») دەگەن ورىس تىلىندەگى 30 باسپا تاباقتىق تاڭدامالى جيناعىنىڭ العاشقى دانالارى وقىرماندار قولىنا ءتيدى.
وسى كىتاپتىڭ تۇساۋكەسەرى وتكەن استاناداعى ۇلتتىق اكادەميالىق كىتاپحاناعا اۆتوردىڭ ارىپتەستەرى, اقىن-جازۋشىلار مەن ونىڭ شىعارماشىلىعىن كوپتەن بەرى بىلەتىن جاندار جينالدى. تۇساۋكەسەردى اشىپ, جۇرگىزگەن «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆ, ەڭ الدىمەن قوناقتاردى الەكساندر تاراكوۆتىڭ شىعارماشىلىعىمەن, ءومىر جولىمەن تانىستىرا كەلە ونىڭ تاماشا جۋرناليستەر وتباسىنان شىققاندىعىن اتاپ كورسەتتى. «ەگەر وتكەن كۇندەردى ەسكە الاتىن بولساق, اۆتوردىڭ اكەسى يۋري اندرەەۆيچ تاراكوۆ ءوز كەزىندە «كازپراۆدانىڭ» پارتيا تۇرمىسى ءبولىمىن باسقارعان كەزدە مەن دە «سوتسياليستىك قازاقستان» گازەتىندە سونداي قىزمەت اتقارعان ەدىم. بۇل وتباسىنان الەكساندردان باسقا, ونىڭ باۋىرلارى لەۆ پەن اندرەي دە وزدەرىنىڭ جۋرناليستىك قابىلەتتەرىنىڭ ارقاسىندا حالىققا تانىلدى», دەدى. سونىمەن قاتار, كىتاپتاعى ءبىرنەشە وچەركتەردى تالداپ, سوزدىك قولدانىس قىرلارىن اشىپ بەردى.
مۇنان كەيىن ءسوز كەزەگى وسى وقيعاعا قاتىسۋ ءۇشىن الماتىدان ارنايى كەلگەن جازۋشى ءسابيت دوسانوۆقا بەرىلدى. ول ءوز سوزىندە تاراكوۆتار وتباسىن كوپتەن بەرى بىلەتىندىگىن, جۋرناليست قالامىنا ءسۇيسىنىپ جۇرەتىندىگىن ايتا كەلە, اۆتوردى بۇگىنگى شىققان بيىگىمەن ءوز اتىنان جانە قازاقستان جازۋشىلار وداعىنىڭ اتىنان قۇتتىقتايتىندىعىن ايتىپ, وداق باسشىسى نۇرلان ءورازاليننىڭ ارنايى سالەمىن جەتكىزدى.
ءسوز كەزەگىن العان جازۋشى دۇكەنباي دوسجان امەريكا جۋرناليستەرى ءوز ەڭبەكتەرىن وقيعادان باستاسا, اعىلشىندار مىنەزدى سيپاتتاۋدان, ال قازاق جۋرناليستەرى ءومىرباياننان باستايتىندىعىن ايتا كەلە, الەكساندر تاراكوۆ قالامىنا وسىنىڭ ۇشەۋى دە ءتان ەكەندىگىن, مۇنى ول جازىپ وتىرعان تاقىرىبىنا بايلانىستى قولداناتىندىعىن جەتكىزدى. اۆتوردىڭ كىتاپتاعى «تىرنا عاسىرى» اتتى ەڭبەگىندە شىعىس حالىقتارىنىڭ, سونىڭ ىشىندە جاپون حالقىنىڭ مىنەزى بارىنشا ايقىن اشىلعاندىعىن ءسوز ەتىپ, مۇنىڭ ءوزىنىڭ «مۇحتار جولى» اتتى كىتابىن جازعان تۇستا م.اۋەزوۆتىڭ جاپونياعا جاساعان ساپارىن بەينەلەۋدە ەداۋىر ازىق بولعاندىعىن تىلگە تيەك ەتتى. ا.تاراكوۆتىڭ وسى كىتابىن «جۋرناليستەردىڭ ۇستەلىنەن ءتۇسپەيتىن كىتاپقا اينالۋعا لايىق دۇنيە» دەپ اتاپ كورسەتتى.
«تاعدىردى تاڭبا سوزبەن تارازىلاۋ» كىتابىنا العىسوز جازعان, ءارى مەرەيتوي يەسىن كوپتەن بىلەتىن بەلگىلى قالامگەر ۆلاديمير گۋندارەۆ ءوزىنىڭ جيناق تۋرالى وي-پىكىرلەرىن سول العىسوزدە جەتكىزگەندىگىن, قازىر ونى قايتالاپ جاتقىسى كەلمەيتىندىگىن ايتا كەلە «ادەتتە جازۋشى قالامىنان تۋىنداعان ويلاردىڭ سۋبەكتيۆتى سيپاتى بولاتىندىعىن, ول ءوز وقىرماندارىنا جەتىپ, ولاردىڭ قولداۋىنا يە بولعان كەزدە عانا بارىپ, وبەكتيۆتىلىككە اينالاتىندىعىن» مالىمدەدى. وسىعان وراي ءوزىنىڭ كوپ جىلدىق جازۋشىلىق, جۋرناليستىك ەڭبەكتەرىنىڭ باسىن قۇراعان بۇل كىتاپ ارقىلى الەكساندر تاراكوۆتىڭ ۇلكەن شەبەرلىككە جەتكەندىگىن باياندادى.
ساۋىتبەك ابدراحمانوۆ مۇنان كەيىن ءسوز كەزەگىن جۋرناليستەردىڭ تالاي بۋىنىن تاربيەلەپ كەلە جاتقان ۇستاز وقىتۋشى, جۋرناليستەر اكادەمياسىنىڭ باسشىسى ساعىمباي قوزىباەۆقا بەردى. ول ءوز ءسوزىندە وسىدان توعىز جىل بۇرىن جارىق كورگەن ا.تاراكوۆتىڭ «تەررا تەرراريۋم» كىتابىنا العىسوز جازعانىن ەسكە الىپ, سودان بەرگى ارالىقتا اۆتوردىڭ جۋرناليست, جازۋشى, قوعام قايراتكەرى رەتىندە ۇلكەن شىڭدالۋ مەكتەبىنەن ءوتىپ, قازىرگى كۇنى قازاقستانداعى ورىس جۋرناليستيكاسىنىڭ بەلگىلى تۇلعاسىنا اينالعاندىعىن, ونىڭ سۇيىكتى تاقىرىپتارىنىڭ ءبىرى اۋىل ءومىرى, اۋىل شارۋاشىلىعى سالاسى ەكەندىگىن ورتاعا سالدى. ءوزىنىڭ سۇيىكتى شاكىرتى تۋرالى تولعانا سويلەدى. قازاقستان ءباسپاسوزى تاريحىنىڭ بىلگىرى ساعىمباي قوزىباەۆ ءوز سوزىندە وسىدان 91 جىل بۇرىن العاشقى نومىرلەرى اراعا 13 كۇن سالىپ قاتار جارىق كورگەن «ەگەمەن قازاقستان» مەن «كازاحستانسكايا پراۆدا» گازەتتەرىنىڭ ەگىز قوزى سەكىلدى ءاردايىم بىرگە كەلە جاتقاندىقتارىن, بۇل جولعى تۇساۋكەسەر دە سونىڭ ءبىر دالەلدى كورىنىسى بولعاندىعىن ايتىپ ءوتتى. سونىمەن قاتار, الەكساندردىڭ اكەسى يۋري اندرەەۆيچتى قازاقستان جۋرناليستيكاسىن ۇيىمداستىرۋشىلاردىڭ ءبىرى رەتىندە كوپتەن بەرى بىلەتىندىگىن جەتكىزىپ, بۇل جولى ونىڭ بالاسى الەكساندر قازىرگى ءوزىنىڭ شىققان بيىگىمەن اكەسىنەن ات وزدىرعانداي اسەر قالدىرعاندىعىن جاسىرمادى.
كىتاپ تۇساۋكەسەرىن قورىتىندىلاعان ساۋىتبەك ابدراحمانوۆ جوعارىداعى ءسوزدى ءىلىپ اكەتىپ: «ەگەر اكەدەن بالا وزسا, وندا اكە دە, بالا دا باقىتتى», دەگەن ويىن جەتكىزدى.
الەكساندر تاراكوۆ جۋرناليستەرگە بەرگەن قىسقاشا سۇحباتىندا ءوزىنىڭ وسى ۋاقىتقا دەيىن جارىق كورگەن «ۆەك جۋراۆليا», «زاتمەنيە پود سولنتسەم», «تەررا تەرراريۋم», «پريتياجەنيە تسەلينى», «دو ي پوسلە ميللەنيۋما», «زارۋبكي يروكەزا», «و زەملە, زەمنوم ي زەملياكاح», «كورەيا: چۋدو بەز چۋدەس» دەگەن كىتاپتارىنداعى ۇزدىك شىعارمالارىنىڭ جانە وسى ۋاقىتقا دەيىن جارىق كورمەگەن ەڭبەكتەرىنىڭ باسىن قوسقان «سۋدبۋ ۆىۆەريايا پەچاتنوي ستروكوي» اتتى بۇل شىعارمالار جيناعى ءوزىنىڭ 50 جاسقا تولعانداعى وقىرماندارىنا بەرگەن ەسەبى ەكەندىگىن جەتكىزدى.
سۇڭعات ءالىپباي.
استانا.
