ەكىجاقتى كەزدەسۋلەر وتكىزدى

مەملەكەت باسشىسى نۇرسۇلتان نازارباەۆ شەت ەل ينۆەس­تور­لارى كەڭەسىنىڭ 24-ءشى پلەنارلىق وتىرىسىنىڭ اياسىندا ءبىر­قاتار ەكىجاقتى كەزدەسۋلەر وتكىزدى, دەپ حابارلادى قا­زاق­ستان رەسپۋبليكاسى پرەزيدەنتىنىڭ ءباسپاسوز قىزمەتى. پرەزيدەنت ەۋروپا قايتا قۇرۋ جانە دامۋ بانكىنىڭ (ەقدب) پرەزيدەنتى ت.ميروۆتى قابىلدادى. تاراپتار ەكىجاقتى ىنتى­ماق­تاستىق ماسەلەسىن, سونداي-اق ەقدب-ءنىڭ استانادا وتەتىن وتى­رىسىنىڭ كۇن ءتارتىبىن تالقى­لادى. * * * مەملەكەت باسشىسى «ەني» كورپوراتسياسىنىڭ باس اتقارۋشى ديرەكتورى پاولو سكارونيمەن كەز­دەسۋ وتكىزدى. كەزدەسۋ بارى­سىن­دا ينۆەستيتسيالىق ىنتىماق­تاس­تىق جانە كومپانيانىڭ قازاق­ستانداعى جوبالاردى ىسكە اسى­رۋىن قاتىستى بىرقاتار ماسەلەلەر تال­قىلاندى. – پرەزيدەنت مىرزامەن كەزدەسۋ كەزىندە ءبىز «قاشاعاندى» قوسا العاندا, وتە جاقسى پروگرەسس باي­قالاتىن بارلىق جوبالار بوي­ىن­شا پىكىر الماستىق. بۇل جوبا بوي­ىنشا العاشقى مۇناي شامامەن 2012 جىلعى جەلتوقساندا, نەمەسە ەكى-ءۇش ايدان كەيىن الىنادى دەپ كۇتىلۋدە. ءبىز سونداي-اق «قاراشى­عا­ناق» جوباسىن تالقىلادىق. ءبىز­دىڭ كومپانيا جوباعا العاشقى كەز­دەن قاتىستى. ول وتە جاقسى دامۋدا. گاز وڭدەۋدى ۇلعايتۋ ءۇشىن كەن ورىندارىنا ودان ءارى زەرتتەمەلەر جۇرگىزۋ كۇتىلۋدە. ءبىز «ەني» مەن قمگ اراسىنداعى ىن­تىماقتاستىق تۋرالى كەلىسىمنىڭ قازىرگى مارتەبەسىن تالقىلادىق. كەلىسىمدە مۇناي وڭدەۋ, گاز وڭدەۋ, سونداي-اق كاسپي تەڭىزىندەگى قۇرىلىس جوبالارى ءتارىزدى بىرنەشە باعىت قاراستىرىلادى. پرەزيدەنت ءبىزدى بارلىق باعىت بويىنشا قولدادى. ءوز تاراپىمنان مەن نۇر­سۇلتان نازارباەۆتى ءبىزدىڭ ىنتىماقتاستىعىمىزدىڭ ودان ءارى دامۋىنا مۇمكىندىك بەرەتىن پرە­زيدەنتتىك سايلاۋداعى تابىس­تى جەڭىسىمەن قۇتتىقتادىم. كە­ڭەس­تىڭ بۇگىنگى پلەنارلىق وتى­رىسىندا ءبىز قازاقستاندى يندۋستريالان­دىرۋ جانە جاڭعىرتۋ تاقىرىبىن تالقىلادىق. سوڭعى جىلدارى ءۇل­كەن جۇمىستار اتقارىلدى, الايدا الدا ءالى دە كوپ ىستەر بار. ءبارى دە قازاقستاننىڭ دۇرىس جولدا كەلە جات­قانىن تۇسىنەدى جانە ەل بوي­ىن­شا وتە ۇلكەن پروگرەسس بايقا­لۋ­دا. بۇگىنگى كەڭەسكە قاتىسقان بارل­ىق ارىپتەستەر قازاقستاندى يندۋستريالاندىرۋ جانە جاڭعىر­تۋعا قاتىسۋعا وزدەرىنىڭ ءازىر ەكەندىكتەرىن جانە ءوز ۇلەستەرىن قوسۋعا دايىن ەكەندىكتەرىن قۋاتتادى, – دەدى پ.سكاروني جۋرناليستەرگە ارنالعان بريفينگ بارىسىندا. * * * نۇرسۇلتان نازارباەۆ «تەلياسونەرا» كومپانياسىنىڭ پرەزيدەنتى جانە باس اتقارۋشى ديرەك­تو­رى لارس نيبەرگپەن كەزدەستى. كەز­دەسۋ كەزىندە ەكىجاقتى ىنتى­ماق­تاستىق ماسەلەلەرى تالقىلاندى. – ءبىز ۇيالى بايلانىستىڭ ور­نىن تولتىرۋ جانە مالىمەتتەر بەرۋ جىلدامدىعىن ودان ءارى ارت­تىرۋ ماسەلەلەرىن تالقىلادىق. ءبىز قازاقستاندا 10 جىلدان استام ۋاقىت جۇمىس ىستەيمىز جانە جاق­سى ناتيجەلەرگە جەتتىك. ءبىز وسىن­دا قالىپتاسقان بيزنەس ورتاداعى سەنىمدىلىكتى شىن مانىندە باستان وتكەردىك. قازاقستاندا ينۆەستي­تسيا­لىق باعدارلامانى جال­عاس­تىرۋ ءۇشىن بىزدە كوپتەگەن پەرسپەكتيۆالار بار دەپ بىلەمىن, – دەدى ل.نيبەرگ جۋرناليستەرگە ارنالعان بريفينگ كەزىندە. * * * مەملەكەت باسشىسى «مەترو كەش ەند كەرري» كومپانياسىنىڭ باسقارما توراعاسى فرانتس ميۋللەردى قابىلدادى. تاراپتار ەكى­جاق­تى ىنتىماقتاستىقتىڭ جاي-كۇيى مەن پەرسپەكتيۆالارىن تالقىلادى. – مەترو گرۋپپ قازاقستاندا 2009 جىلدان بەرى جۇمىس ىستەيدى. ءبىز ەلدە 5 قويما-دۇكەن تۇرعىز­دىق. بۇگىن ءبىز ولاردى ۇلعايتۋ ءجو­نىندەگى جوسپارىمىزدى, سون­داي-اق قازاقستاندىق جۇمىسپەن قامتۋ بويىنشا شەتەلدىك ينۆەستور رەتىندەگى مۇمكىندىكتەرىمىزدى تالقىلادىق. ەلدىڭ دامۋى ءۇشىن يندۋستريالاندىرۋ جونىندەگى پرە­زيدەنتتىڭ باستاماسى وتە ما­ڭىزدى ەكەنى ءشۇباسىز. قازاقستان ءۇشىن جەرگىلىكتى دەڭگەيدە عانا ەمەس, حالىقارالىق دەڭگەيدە دە ەلدىڭ ايتارلىقتاي باسەكەگە قابىلەتتى­لى­گى ماڭىزدى بولۋى ءتيىس. سونداي-اق, يندۋستريالاندىرۋ بارلىق ۇدە­رىستەردى قوسا العاندا, ينفرا­قۇ­رىلىمدى, بىلىكتى جۇمىس كۇشىن جاقسارتۋعا قاتىستى بولماق, – دەدى ف.ميۋللەر جۋرناليستەرگە ار­نال­عان بريفينگتە. * * * پرەزيدەنت «رەسەي سبەربانكى» ااق-تىڭ باسقارما توراعاسى گەرمان گرەفپەن كەزدەسۋ وتكىزدى. كەزدەسۋ بارىسىندا ينۆەستيتسيالىق ىنتىماقتاستىق ماسەلەسى, سون­داي-اق شەتەلدىك ينۆەستورلار كەڭە­سىنىڭ پلەنارلىق وتىرىسى كە­زىندە قوزعالعان ماسەلەلەر تال­قىلاندى.