ۋساما بەن لادەننىڭ قاي جاعدايدا جانە قاشان ءولتىرىلسە دە نەمەسە ءوز ولىمىمەن ولسە دە ساياسي ارەناعا قايتىپ شىقپايتىنى بەلگىلى ءجايت. ءسويتىپ, اتالعان تەررورلىق ۇيىم جەتەكشىلىگى ءتۇبى مىسىرلىق سەيف ءال-ادەلگە ءوتتى.
بولاشاقتا ءال-ادەل باسشىلىقتى «ءال-كايداداعى» ەكىنشى ادام بولىپ ەسەپتەلىپ كەلگەن ايمان ءال-زاۆاحيريگە بەرۋى دە ىقتيمال. بۇعان دەيىن ءال-زاۆاحيري بەن لادەننىڭ تولىققاندى مۇراگەرى بولادى دەپ بولجانعان ەدى. ازىرشە, جوعارىدا ايتقانىمىزداي, جەتەكشىلىك ءال-ادەلدىڭ قولىنا كوشتى. جالپى, ول ورتالىق بارلاۋ باسقارماسى تىزىمىندەگى ەڭ ىزدەۋ سالىنعان تەررورشى قاتارىنا ەنەدى.
پاتشايىمنىڭ ساپارىنا قارسىلار قۋىلدى
بۇعان دەيىن حابارلانعانىنداي, بريتانيا پاتشايىمى ەليزاۆەتا ءىى-ءنىڭ ساپارمەن يرلانديادا جۇرگەنى بەلگىلى. جەرگىلىكتى پوليتسيا بۇرناعى كۇنى پاتشايىمنىڭ ەلگە ساپارىنا قارسىلار ۇيىمداستىرعان بىرنەشە مانيفەستاتسيانى قۋىپ تاراتتى.
ەليزاۆەتا ءىى-ءنىڭ ساپارىن يرلانديالىقتاردىڭ 80 پايىزى حوش كورسە, قالعان 20 پايىزى مۇلدەم نارازى. ال پاتشايىم بريتانيانىڭ بۇرىنعى وتارىن سوڭعى ءجۇز جىلدا العاش «كەلىپ قۋانتقان» مونارح بولىپ تابىلادى. دەگەنمەن, يرلانديانىڭ سولتۇستىگى ءالى دە بريتانيانىڭ قۇرامىندا.
فيلمگە قاتىسقانى ءۇشىن جازالاندى
تاشكەنتتە جەرگىلىكتى قۇقىق قورعاۋشى تاتيانا دوۆلاتوۆا جازالاندى. وعان رەسەي فيلمىنە قاتىسىپ, ورتالىق ازيادا تۇراتىن ورىستاردىڭ حال-جاعدايى تۋرالى اڭگىمەلەگەنى ءۇشىن ايىپ تاعىلىپ وتىر.
«رەسەيدەن تىسقارى» دەپ اتالاتىن فيلم 24 ءساۋىر كۇنى «رەسەي-1» تەلەارناسىنان كورسەتىلگەن بولاتىن. وندا, اتاپ ايتقاندا, ورىستاردىڭ بىرتىندەپ وزبەكستاننان جوعالىپ جاتقانى كولدەنەڭ تارتىلعان-تىن. اتالعان ءفيلمنىڭ كورسەتىلۋى وزبەكستان باسشىلىعى تاراپىنان ۇلكەن نارازىلىق تۋعىزدى. وندا شىندىق بۇرمالانىپ كورسەتىلگەن دەگەن ءۋاج العا توسىلادى.
زورلىق جاساماق بولدى دەپ ايىپتالدى
حالىقارالىق ۆاليۋتا قورىنىڭ باسقارۋشى ديرەكتورى دومينيك ستروسس- كانعا ايەل زورلاماق بولدى ءجانە زاڭسىز باس بوستاندىعىنان ايىردى دەگەن ايىپتار تاعىلدى. كۇدىكتىنىڭ ادۆوكاتى بەندجامين برافماننىڭ ءمالىمدەۋىنشە, كان ءوزىن كىنالىمىن دەپ تابۋدان باس تارتقان.
ستروسس-كان 14 مامىر كۇنى كەننەدي اتىنداعى نيۋ-يورك اۋەجايىنان پاريجگە ۇشىپ شىقپاق بولعان كەزىندە ۇستالعان ەدى. ونى ۇستاۋعا حۆق باسشىسى تۇرعان Sofitel قوناق ءۇيى قىزمەتشىسىنىڭ ارىزى نەگىز بولدى. اتى اتالمايتىن 32 جاستاعى ايەل ءنومىردى تارتىپكە كەلتىرۋ ءۇشىن كىرگەن كەزىندە وعان ستروسس-كان ارام ويمەن باس سالىپتى-مىس.
ارمياندار مەن ءازىربايجاندار توبەلەسى
ماسكەۋ وبلىسىنىڭ ليۋبەرتسى اۋدانىنداعى وكتيابر كەنتىندە ارمياندار مەن ءازىربايجاندار اراسىندا جاپپاي ءتوبەلەس ورىن السا, ەكى تۇيە سۇيكەنسە, ورتاسىندا شىبىن ولەدى دەگەندەي, توبەلەسكە قاتىسقان 1987 جىلى تۋعان داعىستان ازاماتى كوز جۇمعان. جەتى ادام قارۋ ءجانە پىشاق جاراسى سالدارىنان اۋرۋحاناعا تۇسكەن.
الدىن الا دەرەك بويىنشا, توبەلەسكە تاراپتاردىڭ ءبىر-بىرىنە دەگەن جەككورۋشىلىگى سەبەپ بولعان. سول 17 مامىر كۇنى كەشكىسىن ماسكەۋ تۇبىندەگى پودولسكىدە دە وزبەكستاننان كەلگەن گاستاربايتەرلەر اراسىندا توبەلەس ورىن العان. باسىنان جاراقات العان 23 جاستاعى وزبەك اۋرۋحانادا اجال تاۋىپتى. توبەلەس ءوزارا تالاستان تۋىنداسا كەرەك.
كونستيتۋتسياعا ارنالعان ەڭ بيىك ەسكەرتكىش
تۇركىمەنستان استاناسىندا 185 مەترلىك كونستيتۋتسيا مونۋمەنتى اشىلدى. اشىلۋ سالتاناتى 18 مامىردا اتاپ وتىلەتىن ەلدىڭ كونستيتۋتسياسى كۇنىنە جانە تۇركىمەن اقىنى ماقتۇمق ۇلىنىڭ تۋعان كۇنىنە ورايلاستىرىلدى.
بۇل مونۋمەنت, ءسويتىپ, اشعابادتاعى ەڭ بيىك ەسكەرتكىشكە اينالدى. بۇعان دەيىنگى ەڭ بيىك ەسكەرتكىش بيىكتىگى 91 مەترلىك تاۋەلسىزدىك مونۋمەنتى بولاتىن. كونستيتۋتسيا مونۋمەنتىن تۇرعىزۋ ءۇشىن 45 ميلليون ەۋرو جۇمسالسا, ونىمەن تۇرىكتىڭ Polimeks كومپانياسى اينالىسقان. كەشە, سونداي-اق تۇركىمەنستان استاناسىندا جاڭا پرەزيدەنتتىڭ ساراي كەشەنى پايدالانۋعا بەرىلدى. ونى سالۋعا 250 ميلليون ەۋرو شىعىندالىپتى.
***
قىسقا قايىرىپ ايتقاندا:
مىسىر سوتى ەلدىڭ بۇرىنعى پرەزيدەنتى حوسني مۇباراكتىڭ زايىبى سيۋزاننانى كەپىلدىك ارقىلى بوستاندىققا شىعارۋعا كەلىسىمىن بەردى. ول 13 مامىر كۇنى جەمقورلىققا سالىندى دەگەن كۇدىكپەن قاماۋعا الىنعان بولاتىن.
ماسكەۋ وبلىسىنا قاراستى ودينتسوۆ جانە سەرپۋحوۆ اۋداندارىنىڭ بۇرىنعى پروكۋرورلارى رومان نيششەمەنكو مەن ولەگ بازىليان تۇتقىندالدى. ولارعا دا «ويىن ءىسى» دەپ اتالعان قىلمىسقا قاتىستى ايىپ تاعىلىپ وتىر. بۇعان دەيىن وسى ءىس بويىنشا الەكساندر يگناتەنكو, دميتري ۋرۋموۆ, ەدۋارد كاپلۋن جانە ۆلاديمير گلەبوۆ قاماۋعا الىنعان ەدى.
ۋكراينانىڭ باتىسىنداعى بەرەگوۆو قالاسىنىڭ سوتى ەلدەن قۇپيا ءتۇردە ەكى ايلىق ەگىز نارەستەنى الىپ شىقپاقشى بولعان فرانتسيانىڭ قوس ازاماتىنا قاتىستى ۇكىم شىعاردى. 39 جاستاعى پاتريس لە روك پەن ونىڭ 66 جاستاعى اكەسى بەرنار لە روكتىڭ ماتەريالدارىمەن تانىسقان سۋديا جازانى جۇمسارتىپ, تۇرمەگە قاماۋدى ايىپپۇلمەن الماستىردى. ءسويتىپ, اكەلى-بالالى ۇرلىقشىلار 1750 دوللار ايىپپۇل تولەيتىن بولدى.
تاجىكستان جوعارعى سوتىنىڭ القاسى وتكەن جىلدىڭ تامىزىندا 25 تۇتقىننىڭ تۇرمەدەن قاشۋىنا جول بەرگەن تۇرمەنىڭ ءۇش قىزمەتكەرىنە قاتىستى جازانى جۇمسارتتى. 5 ساۋىردە شىعارىلعان ۇكىم بويىنشا سوتتالعان سايدۋللو بەرديەۆتىڭ جازاسى 8,5 جىلدان 6,5 جىلعا قىسقارسا, سۋحروب اكباروۆ پەن سايدالي سايدوۆ جازاسى 8,6 جانە 2 جىلدىڭ ورنىنا شارتتى مەرزىمگە اۋىستىرىلدى.
رەسەيدىڭ اناپا قالاسىنىڭ مەرى تاتيانا ەۆسيكوۆا ءاربىر دەمالىس كۇندەرى قالانى ۆەلوسيپەدپەن اينالىپ ارالاپ شىعۋ تۋرالى نيەتى بار ەكەنىن مالىمدەدى. سونداي-اق, ول وسىنداي «ۆەلوساياحاتتى» ءوزىنىڭ ورىنباسارلارىنا دا جاساۋدى تاپسىردى. مەردىڭ پىكىرىنشە, ۆەلوسيپەدپەن قالانىڭ اۆتوموبيل كىرە المايتىن ۇڭعىل-شۇڭعىلىن كورۋگە مۇمكىندىك بار.
ينتەرنەت ماتەريالدارى نەگىزىندە ازىرلەندى.
