حالىقارالىق تاجىريبەگە جاقىنداۋدى كوزدەيدى

پارلامەنت سەناتىندا قارجى جانە بيۋدجەت كوميتەتى دەپۋتاتتارىنىڭ قارجى مينيسترلىگى سالىق كوميتەتىنىڭ باسشىلىعىمەن كەزدەسۋىندە سالىقتىق اكىمشىلىكتەندىرۋدى ودان ءارى جەتىلدىرۋ ماسەلەلەرى تالقىلاندى, دەپ حابارلادى وسى پالاتانىڭ ءباسپاسوز قىزمەتى. پرەزيدەنت ن.نازارباەۆتىڭ سا­لىقتىق اكىمشىلىكتەندىرۋ سالا­سىن­داعى العا قويعان مىندەتتەرى اياسىندا تالقىعا سالىنعان ماسە­لەلەردىڭ ماڭىزدىلىعىن اتاپ وتە كەلىپ, قارجى جانە بيۋدجەت كو­مي­تەتىنىڭ توراعاسى قايرات يششانوۆ اكىمشىلىك كەدەرگىلەردى ازايتۋعا, سالىق راسىمدەرىن وڭايلاتۋعا, اي­قىن جانە ادىلەتتى سالىق سالۋدى ەنگىزۋگە نازار اۋداردى. «مۇنىڭ ءبارى, اقىر اياعىندا مەملەكەتتىڭ جالپى بيۋدجەت-ەكونوميكالىق سايا­ساتىن نىعايتۋعا, ونىڭ باسە­كەگە قابىلەتتىلىگىن ارتتىرۋعا ىق­پال ەتەدى», دەدى سەناتور. ق.يششانوۆتىڭ ايتۋىنشا, وسى سالاداعى زاڭنامانى جەتىلدىرۋ, قولدانىستاعى قۇقىققا مەزگىلىندە وزگەرىستەر ەنگىزۋ بيزنەس ورتا­لارىن دامىتۋ, سالىق مادەنيەتىن كوتەرۋ, سالىق ءتارتىبىن ساقتاۋ ءۇشىن قاجەتتى جاعداي جاساۋعا ءمۇم­كىندىك بەرەدى. كەزدەسۋدە قارجى مينيسترلىگى سالىق كوميتەتىنىڭ توراعاسى د.ەر­عوجين ءسوز سويلەدى. ول كەزدەسۋگە قاتىسۋشىلاردى جۇرگىزىلىپ جاتقان سالىق ساياساتى, بيىلعى ءبىرىنشى توقسانداعى مەملەكەتتىك بيۋدجەت كىرىستەرىنىڭ ورىندالۋ ناتيجەلەرى جانە 2010-2011 جىل­دارعى سالىقتىق اكىمشىلىك­تەن­دى­رۋدى جەتىلدىرۋ باعدارلاماسىن ىسكە اسىرۋ تۋرالى باياندادى. ەلىمىزدىڭ سالىقتىق اكىمشى­لىك­تەندىرۋدىڭ جاڭا ساپالىق دەڭ­گەيگە كوتەرىلگەنى تۋرالى اتاپ وتە كەلىپ, د.ەرعوجين قازاقستاننىڭ سالىق جۇيەسىن حالىقارالىق ءتا­جىريبەگە جاقىنداتۋدى كوزدەيتىن زاڭنامالارعا توقتالدى. قازىرگى كەزدە «قازاقستان رەس­پۋب­ليكاسىنىڭ كەيبىر زاڭنا­ما­لىق اكتىلەرىنە سالىق سالۋ ءما­سەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءماجىلىس قاراۋىنا ەنگىزىلدى. ول جوبامەن سالىق كودە­كسى­نىڭ بىرقاتار باپتارىنا ناقتى­لايتىن وزگەرىستەر ەنگىزىلەتىن بولادى. كەزدەسۋ بارىسىندا د.ەرعو­جين بيزنەسكە اكىمشىلىك اۋىرت­پا­لىقتى ازايتۋعا, جەر قويناۋىن پايدالانۋشىلاردىڭ سالىقتىق اكىمشىلىكتەندىرۋ مەن ارنايى ءتو­لەم­دەرىنە, كەدەن وداعى ايا­سىن­داعى سالىقتىق اكىمشىلىك­تەن­دى­رۋگە, سالىق قىزمەتىن جەتىلدىرۋگە, سالىق جۇيەسىن جاڭعىرتۋعا, جالپىعا بىردەي دەكلاراتسيالاۋعا قاتىستى دەپۋتاتتاردىڭ ساۋال­دا­رىنا جاۋاپ بەردى.