تاعى ءبىر باتىر قازاق تابىلدى

1942 جىلى كەڭەس وداعى باتىرى اتاعىنا ۇسىنىلعان تانكيست جۇماش راحمەتوۆ ەسىمى مەن ەرلىگى 69 جىلدان سوڭ ءمالىم بولىپ وتىر ...بۇل ءوزى كۇت­پە­گەن حابار بولدى. كەشە كەشكىسىن وب­لىس­تىق ارداگەرلەر كە­ڭە­سى توراعاسىنىڭ ورىنباسارى كلارا بەيىمبەتقىزى اي­مۇر­زينادان تىلشىلەر قوسىنىنا تەلەفون شالىندى. تۇت­قادان تولقىنىستى داۋسى انىق اڭعا­رىل­عان اپامىز تاڭدانارلىق ءارى ءسۇيىنىشتى جا­ڭالىقتى  «ەگەمەن قازاقستانعا» ءبىرىنشى جەتكىزىپ تۇرعاندىعىن ايتتى. ال ول ماسكەۋلىك جەرلەس­تەرى­مىزدىڭ «قازاق ەلى»  قوعامدىق ۇيىمىنان حا­بارلانىپتى. سوناۋ جىلدارداعى سۇراپىل سو­عىس­تان كەيىن قانشاما ۋاقىت وتسە دە بۇعان دەيىن بەلگىسىز بولىپ كەلگەن جاۋىنگەردىڭ ەسىمى مەن ەرلىگى توسىننان قايتا جاڭعىرۋى تاڭدانارلىقتاي دا ەدى. «ەشكىم دە ۇمىتىلعان جوق, ەشكىم دە ۇمىتىلمايدى» دەگەن ءسوزدىڭ اقيقاتتىعى سەزىلدى. بىزگە ازىرگە ءمالىم بولعانى باتىر تانكيستىڭ ەرلىك جولدارىن انىقتاپ, الدىمەن قازاقستانعا  تا­نىس­تىرۋشى  رەسەيدىڭ كالينين وبلىسىنداعى, ولەنين اۋداندىق   «ورەل» اسكەري-تاريحي ىزدەستىرۋ ورتالىعى», جەتەكشىسى دميتري جۋك ەكەن. ول حالقىمىزدىڭ قاھارمان ۇلى تۋرالى دەرەكتى اتالعان اۋدان مۇراجايىنان باستاپ رەسەي فەدەراتسياسى قورعانىس مينيسترلىگىنىڭ ورتالىق مۇراعاتى قۇجاتتارى ارقىلى ءبىراز جىل زەرتتەپتى. جۇماش راحمەتوۆ! بۇل كىسى كىم؟  ماسكەۋدەن ءتۇس­كەن مالىمەت بويىنشا 1919 جىلى قاراعاندى وبلى­سى­نىڭ قارساقپاي اۋدانىندا دۇنيەگە كەلگەن اسىل ازا­مات  1941 جىلى سىزران تانك ۋچيليششەسىن بىتىرىسىمەن بىردەن مايدانعا اتتانادى. اۋەلدە 1-ءشى گۆار­ديالىق تانك بريگاداسى 3-ءشى مەحانيكالاندىرىلعان كورپۋسىنىڭ 1-ءشى تانك باتالونىنداعى 2-ءشى روتا­سى­نا ۆزۆود كومانديرى بولىپ تاعايىندالعان جاس وفيتسەر شايقاستاردا جاۋىنگەرلەردى ۇرىسقا باتىل جۇمىلدىرۋداعى ۇيىمداستىرۋشىلىعىمەن دە, جەكە باتىرلىق ۇلگىسىمەن دە كوزگە تۇسەدى. از ۋاقىت­تا-اق اعا لەيتەنانت شەنىنە جوعارىلاتىلادى. ءبىر ءوزى جاۋدىڭ 11 تانكىسىن جويادى.    «وتان سوعىسى» جانە قىزىل جۇلدىز وردەندەرى كەۋدەسىندە جارقىراعان 23 جاسار جىگىت مايدانداعى ايگىلى ەسىمگە اينالادى. 1942 جىلدىڭ قىركۇيەك- قاراشا ايلارىندا گەنەرال كاتۋكوۆتىڭ قولباسشىلىعىنداعى تانك كور­پۋ­سىنىڭ قۇرامىندا كالينين مايدانىندا قارسى­لاس­تاردىڭ شەبىن جارىپ ءوتۋ ايقاسىنا قاتىسادى. وسى ۇرىستاردا ولەنين اۋدانىنداعى  نوۆايا بويارششينا دەرەۆنياسى تۇبىندە ەرلىكپەن قازا تابادى. سول شايقاستاعى اسقان ەرلىگى ءۇشىن كەڭەس وداعى باتىرى اتاعىنا ۇسىنىلادى. بىراق بۇل ماراپاتقا بەكىگەندىگى, نە بەرىلگەندىگى اتالمايدى. دميتري جۋك ەندى سونى انىقتاۋ ۇستىندە ەكەنىن ايتادى. جاڭادان تابىلعان دەرەك باتىر تانكيست جۇماش راحمەتوۆتىڭ تۋعان-تۋىسقاندارى ءۇشىن قۋا­نىشتى حابار دەپ ويلايمىز. ونىڭ جاقىن اعايىنى مۇساحان يسايىلوۆ وبلىستاعى بۇرىنعى «پۋت كوممۋنيزما» كولحوزىندا تۇرعان كورىنەدى. ودان تاراعان ۇرپاقتار بولسا, باتىر اتالارى تۋرالى مالىمەتتى گازەت رەداكتسياسىنان الۋعا بولادى. ايقىن نەسىپباي. قاراعاندى.