كەلەشەگىمىزدىڭ كەپىلى

نۇرسۇلتان ءابىش ۇلى نازارباەۆپەن زاۋىت تسەحىندا العاش كەزدەسكەن سول ءبىر تاريحي كۇنى مەن كەنتاۋ قالاسىنداعى ترانسفورماتور زاۋىتىندا ستۋدەنتتىك-وندىرىستىك تاجىريبەدەن ءوتىپ جۇرگەن ەدىم. بۇل ەل­باسىنىڭ 2005 جىلى وتكەن پرەزيدەنتتىك سايلاۋ­دىڭ سايلاۋالدى ناۋقانى بارىسىنداعى ساپارى بولاتىن. ارينە, بۇل كەزدەسۋدە كەۋدەمدە قۋانىش, جالپى جاڭا بە­لەستەرگە ورلەۋ سەزىمى قىلاڭ بەردى. زاۋىت جۇمىس­شىلارىنا جانە بىزگە, جاس ينجەنەرلەرگە ارناپ ءسوي­لەگەن سوزىندەگى: «وتانشىل بولۋ – دەمەك, قازاق­ستان­دى ءاردايىم جۇرەگىڭە جاقىن تۇتۋ», دەگەن تۇجىرىمى ەرەكشە ەسىمدە قالدى. تۇلا بويىمدى تەبىرەنتكەن سول ساتتەن بەرى ءومى­رىمدە كوپتەگەن وزگەرىستەر بولدى. جوعارى وقۋىمدى ءبىتىرىپ, ينجەنەر-ەنەرگەتيك بولدىم. وتباسىلى بولدىم, ۇلىم دۇنيەگە كەلدى. جوعارى وقۋ ورنىندا وقىپ جۇرگەن كەزدە ويلاستىرىپ, دايىنداعان ترانسفورماتور شىعاراتىن زاماناۋي زاۋىت سالۋ جونىندەگى جوبام, ارمانىم دەسەم دە بولار, ول دا جۇزەگە استى. ونىڭ ىرگەتاسى قىسقا مەرزىم ىشىندە قالانىپ, مىنە, بۇگىن ونىڭ كونۆەيەرىنەن قازاقستاندىق جوعارى قۋاتتى ترانسفورماتورلار جىبەرىلۋدە. ال 3 ساۋىردە وتكەن سايلاۋعا كەلسەم, نۇرسۇلتان ءابىش ۇلى سەنىمدى جەڭىسكە جەتتى. ءبىز مەملەكەتىمىزدىڭ ەرەكشەلىكتەرىنە لايىقتى ساياسي باعىتتى تاڭداعان, سەنىم مەن قۇرمەت بىلدىرگەن سايلاۋشىلار قاتارىندا بولعانىمىزدى ماقتان تۇتامىز. سايلاۋ ۋچاسكەلەرىنە جاستاردىڭ اعىلىپ كەلىپ جاتقانىنا ءوزىمىز دە كۋاگەر بولدىق. ءبىز ەلباسىمەن ەلىمىزدىڭ تۇراقتىلىعىن, ءومىر ءسۇرۋ دەڭگەيىنىڭ جاقسارۋىن, ەلىمىزدىڭ الەۋمەتتىك-ەكونوميكالىق جەتىستىكتەرىن بايلانىستىرامىز. قازاقستان وسى سايلاۋ بارىسىندا ءوزىنىڭ فەنومەنى نەدە ەكەندىگىن كورسەتتى. ول حالىقتىڭ پرەزيدەنتكە ءوزارا جانە تولىق سەنىم مەن قۇرمەتتىڭ نىق ورنىققانىندا. ەلىمىزدىڭ ءاربىر تۇرعىنىنىڭ ءوزىنىڭ ومىرىندە پرەزيدەنتتىڭ ءرولى مەن ورنى جونىندە دارا پىكىرى قالىپتاسقان. مەن ءۇشىن نۇرسۇلتان نازارباەۆ – ەكونوميكالىق جانە الەۋمەتتىك قايتا قۇرۋلاردى جۇزەگە اسىرعان, ادامنىڭ لايىقتى ءومىر سۇرۋىنە ىرگەتاس قالاعان اقىلدى ادام. ءبىز دەرەكسىز ساياسي نەمەسە ەكونوميكالىق قاعيدالارعا ەمەس, ناقتى ادامنىڭ ءومىر ءسۇرۋ دەڭگەيىن جاقسارتقان بيلىك ءۇشىن داۋىس بەردىك. قازاقستان – بايسالدى, قوناقجاي, ءدىني تۇرعىدا ءتوزىمدى, ەكونوميكالىق جانە الەۋمەتتىك تۇراقتىلىق ۇيىعان مەملەكەت. «قازاقستان» اتتى الىپ كەمەمىز وركەندى بولاشاققا سەنىمدى باعىتىنان اۋىتقىماسىن دەيمىز. ەركەبۇلان ىلياس ۇلى, «Alageum Electric» اق ەمب باس ديرەكتورىنىڭ ورىنباسارى. وڭتۇستىك قازاقستان وبلىسى.