ۇلتتىق كىتاپحانا ۇجىمى كۇنى كەشە ناۋرىز مەيرامىن اتاپ ءوتتى. ارنايى ءىس-شاراعا ەلىمىزدىڭ زيالى قاۋىم وكىلدەرىمەن قاتار, كۋۆەيت ەلىنەن كەلگەن دەلەگاتسيا, International Women’s Group ۇيىمىنىڭ قادىرلى قوناقتارى, اراب ەلىنىڭ تابىستى ءارى ىسكەر ايەلدەرى قاتىستى. قادىرلى قوناقتار اراسىندا «SOS بالالار قالاشىعىمەن» مەموراندۋمعا قول قويۋ جانە قازاقستانمەن قارىم-قاتىناستى نىعايتۋدى ماقسات تۇتىپ كەلگەن Help4Love قايىرىمدىلىق قورىنىڭ پرەزيدەنتى, اراب ەلدەرىندە قايىرىمدىلىق جۇمىستارىمەن تانىمال بولعان كۋۆەيت تۋماسى, «ىزگى نيەت ەلشىسى» اتانعان دوكتور احماد ءال-ماسكاتي دە بولدى.
الىستان ات ارىتىپ كەلگەن كۋۆەيتتىك مەيماندار ن.داۋلەتوۆا اتىنداعى زالدا ارنايى ۇيىمداستىرىلعان كورمەدەن كىتاپحانا قورىندا ساقتاۋلى تۇرعان كونە قۇران كىتاپتاردى, اراب تىلىندەگى قولجازبا مۇرالاردى كورىپ, كىتاپحانا ۇجىمىنا ريزاشىلىقتارىن ءبىلدىرىپ, قازاق ەلىنە دەگەن رياسىز العىستارىن جەتكىزدى.
كۋۆەيتتەن كەلگەن دەلەگاتسيا كەڭەسشىسى نارجەس ءال-يۋسەفي تىلشىلەرگە بەرگەن سۇحباتىندا: «ءبىزدى قازاقستاندىقتار اسقان قوناقجايلىلىقپەن قارسى الدى. الماتى قالاسىنىڭ سۇلۋ تابيعاتىنا قاتتى قىزىقتىق. ۇلتتىق كىتاپحانادا ءوتىپ جاتقان ناۋرىز مەيرامىنان قازاق حالقىنىڭ سالت-داستۇرىمەن, ۇلتتىق تاعامدارىمەن تانىسىپ شىقتىق. الداعى ۋاقىتتا دا قازاقستان مادەنيەتىمەن, وركەنيەتىمەن جاقىن تانىسساق, قازاق ەلىنىڭ الەمگە تانىلۋىنا ءبىز دە ۇلەس قوسا جۇرسەك دەيمىز. سەبەبى, قازاقستان سياقتى وتە كوركەم, قوناقجاي ەلدى, ونىڭ سۇلۋ تابيعاتىن بۇكىل الەم ءبىلۋى, كورۋى ءتيىس دەپ ويلايمىن. كەلەشەكتە ايەل كاسىپكەرلەردىڭ قاۋىمداستىقتارىمەن ىنتىماقتاستىق ورناتۋعا تىرىسامىز. مامىر ايىندا كۋۆەيتتە وتەتىن حالىقارالىق ۇلتتىق كيىمدەر كورمەسىنەن قازاقستان دەلەگاتسياسىن دا كورگىمىز كەلەدى», دەدى.
جاستارى التىباقان تەۋىپ, ءان ايتىپ, بي بيلەپ, قىز ۇزاتۋ, بەتاشار, اقىندار ايتىسى سىندى ۇلتتىق سالت-ءداستۇرىمىزدى كورسەتە بىلگەن ۇلتتىق كىتاپحانا ۇجىمى شەتەلدىك قوناقتارعا ارناپ كيىز ۇيلەر تىگىپ, ناۋرىز-كوجەمەن قاتار, كوپتەگەن ۇلتتىق تاعام ءتۇرلەرىن دە ۇسىنۋدى ۇمىتپادى.
قازاقستاننىڭ حالىق جازۋشىسى, قوعام قايراتكەرى مۇحتار شاحانوۆ ءوز سوزىندە قىزىل يمپەريانىڭ ساياسي قۇربانىنا اينالعان مادەني مۇرامىز – ناۋرىز مەرەكەسىنىڭ 70 جىلدان كەيىن حالىقپەن قايتا قاۋىشۋىنا قاتىستى ءوز ەستەلىكتەرىمەن ءبولىستى.
شەتەلدىكتەرگە قازاق حالقىنىڭ مادەنيەتىن, سالت-ءداستۇرىن تانىستىرۋ ماقساتىندا ۇلتتىق كىتاپحانادا اتالىپ وتكەن ۇلىستىڭ ۇلى كۇنىندە مارات وماروۆ, ايجان نۇرماعامبەتوۆا, الما امانجولوۆا, شاحيزادا, بەرىكبول, ارداق يساتاەۆا, ايبەك مۇحامەتاليەۆ سياقتى ەسترادا جۇلدىزدارى ءان ايتسا, بالالار بي توپتارى ءوز ونەرلەرىن ورتاعا سالىپ, قوناقتاردىڭ ريزاشىلىعىنا بولەندى.
ميرا بايبەك,
«ەگەمەن قازاقستان»
الماتى
