ەرسەيىت ەكى جاسقا تولعاندا عانا اۋرۋى بىلىنگەن. باسقالاردىڭ مۇنداي بالالارى تومپاڭداپ, كۇننەن كۇنگە سالماق قوسىپ, اتا-اناسىنىڭ كوز قۋانىشى بولىپ جۇرسە, ەرسەيىت ەت الا الماي قويعان. كەي-كەيدە اكە-شەشەسىنىڭ ۇرەيىن ۇشىرىپ كوگەرىپ تالىپ قالادى. قاعازداي اپپاق. مامىقتاي جەڭىل. سويتسە, جۇرەگىنىڭ اقاۋى بار ەكەن. العاشقىدا اتا-اناسى شەت ەلدە, ياعني يزرايلدە ەمدەتۋ ماسەلەسىن ويلاستىرىپتى. سۇراستىرىپ كورسە, ورتاشا وپەراتسيا 50-70 مىڭ دوللار شاماسىندا ەكەن. ونداي قارجى جاس وتباسىدا قايدان بولسىن. الماتىنى جاعالايدى. جۇرەگى اۋىراتىن تەك بۇلاردىڭ عانا بالاسى ەمەس بولىپ شىقتى. كەزەككە تۇراسىز دەيدى. ونىسى ەڭ جاقىن بولعاندا 2013 جىلى, بولماسا 2014 جىلى كەلەدى.
باستارى سالبىراپ شىمكەنتكە قايتقان. جەتى جاسقا كەلگەن ەرسەيىتتىڭ دالاعا شىققىسى كەلەدى. بالالارمەن فۋتبول ويناعىسى كەلەدى. ءسال جۇگىرسە القىنىپ, جۇرەگى اۋزىنا تىعىلىپ, قالجىراپ قالادى. “اجە” دەپ اناسىنىڭ شەشەسىن قۇشاقتاپ جىلاعاندا كەيۋانانىڭ جانارى جاسقا مالشىناتىن. “ق ۇلىنىم-اي, قاشان سەن قاتارىڭا قوسىلىپ, شاۋىپ كەتەر ەكەنسىڭ” دەيتىن اجەسى كۇبىرلەي كۇيىنىپ.
ەرسەيىت راسىندا جازىلىپ كەتتى. قاپ-قاپ دوللاردى قاجەت ەتەتىن يزرايلعا بارعان جوق.
“كەزەك كۇت” دەگەن الماتىعا دا جولى تۇسپەگەن. جەتى جىل مازالاعان دەرتتىڭ داۋاسىن شىمكەنتتىڭ دارىگەرلەرى-اق تاپتى. جۇرەك قان-تامىرىنداعى تەسىكتى وپەراتسيا جولىمەن بىتەدى.
بالالار كارديوحيرۋرگيالىق ءبولىمشەسىنىڭ اشىلۋىنا بارعانىمىزدا ەرسەيىت شىققالى جاتىر ەكەن. اجەسى كۇندەي جاينايدى. اۋزىن اشسا ايتار ءسوزى راحمەت. دارىگەرلەردىڭ قىزمەتىندە ءمىن جوق. ەرسەيىت باياعىداي ەمەس, جەڭىل دەمالادى. كوڭىلدى.
“ەشكىمگە ءبىر تيىن تولەمەدىك. ءتىپتى ساناتوريادا جاتقاندايمىز. وسىنداي جاعدايدى تۋدىرعان مەملەكەتىمىزدىڭ باسشىلارىنا, پرەزيدەنتىمىزگە راحمەت” دەيدى زاعيرا پىرىمقۇلقىزى. سول كۇنى كوپ پالاتالاردى ارالادىق. جۇرەككە وپەراتسيا جاسالعان بالالاردىڭ كىشكەنتايى 2,5 جاستا ەكەن. جۇرەك اۋرۋى تۇرلىشە عوي. سونىڭ كوپ تاراعان ءتۇرى –تامىر جارىعى. اتقاقتاپ تۇرعان قان تەسىكتەن سىرتقا اعادى دا بالانىڭ تىنىسى تارىلىپ, ءالجۋاز قالىپقا تۇسەدى.
وبلىستىق دەنساۋلىق ساقتاۋ باسقارماسىنىڭ باستىعى, قۇرعاق سوزدەن ناقتى ءىستى جاقسى كورەتىن, سوندىقتان دا قىزمەتتەستەرىنە, سىرتقى جۇرتقا سۋىق كورىنەتىن جۇماعالي يسمايلوۆ جۋرناليستەردىڭ سۇراقتارىنا جاۋاپ بەردى.
ەڭ قيىنى ءۇش جىل بۇرىن وسىنداي دەرتى بار بالالاردىڭ جەتپىس پايىزى اجال قۇرىعىنا ءىلىنىپ كەلىپتى. ءوڭتۇستىككە كەلگەن ساپارىندا ەلباسى جاقىن جىلداردا تۇزەۋگە ءتيىس ءتورت ماسەلەنى قويعاندا جۇرەك-قان تامىرلارى اۋرۋلارى مەن بالا ءولىمىن ازايتۋدى تاپسىرعان. مەملەكەتتەن ايتۋلى كومەك بولاتىندىعىن ەسكەرتكەن.
ەلباسى ەڭ ۇلكەن بايلىعى حالقى بولىپ تابىلاتىن وڭتۇستىكتىڭ مەديتسيناسىنا قىرۋار قارجى بولگىزدى. تمد-دا بالاماسى جوق ورتالىقتار بوي كوتەردى. شەتەلدەگى ەڭ وزىق تەحنولوگيالار الىندى. وعان وبلىس دارىگەرلەرىنىڭ شەبەرلىگى ۇندەستى.
بۇگىنگى تاڭدا ورتالىقتىڭ كارديوحيرۋرگيالىق بولىمشەسى زاماناۋي جوعارى تەحنولوگيالىق قۇرالدارمەن جاراقتاندىرىلعان. 2 انگيوگراف جۇمىس ىستەيدى. وپەراتسيالىق بلوك لامينارلىق اعىن جۇيەسىمەن جانە «تازا بولمەلەر كەشەنى» جۇيەسىمەن قامتاماسىز ەتىلگەن. الىس جانە جاقىن شەت ەلدەردىڭ جەتەكشى كارديوحيرۋرگيالىق ورتالىقتارىنان ماماندار تارتىلىپ ماستەر-كلاستار ۇيىمداستىرىلدى.
كارديوحيرۋرگيا بولىمشەسى جۇمىس ىستەگەن ۋاقىتتان بەرى اشىق جۇرەككە 511 وپەراتسيا جاسالدى. ونىڭ ىشىندە 395-ءى اورتو-كورونارلىق شۋنتتاۋ وپەراتسياسى, 79 ەرەسەك ادامعا جۇرەكتىڭ تۋا بىتكەن جانە جۇرە پايدا بولعان كەمىستىگىن تۇزەتۋ وپەراتسيالارى جاسالدى.
ستاتيستيكالىق مالىمەتتەر بويىنشا, وڭتۇستىك قازاقستان وبلىسىندا 2010 جىلى 2009 جىلمەن سالىستىرعاندا, اۋرۋشاڭدىق 19,1%-عا, جۇرەك-قان تامىرى اۋرۋلارىنان بولاتىن ءولىم-ءجىتىم 20,8%-عا, ونىڭ ىشىندە جۇرەكتىڭ يشەميالىق اۋرۋلارىنان بولاتىن ءولىم-ءجىتىم 38,9%-عا تومەندەدى.
بۇگىنگى تاڭدا وبلىستا دامۋدىڭ تۋا بىتكەن, ونىڭ ىشىندە بالالارداعى ءجۇرەكتىڭ تۋا بىتكەن كەمىستىگىن ەمدەۋ وزەكتى ماسەلە بولىپ وتىر. 2011 جىلعى 1 قاڭتارعا دەيىنگى جاعداي بويىنشا «جۇرەكتىڭ تۋا بىتكەن كەمىستىگى» دياگنوزىمەن 15 جاسقا دەيىنگى 2802 بالا ديسپانسەرلىك ەسەپتە تۇرادى. ونىڭ ىشىندە 1 جاسقا دەيىنگى بالالار – 415.
شىمكەنت قالاسىنداعى وبلىستىق كارديولوگيا ورتالىعىنىڭ بازاسىندا 2010 جىلى وبلىستا العاش رەت پولشادان كەلگەن مامانداردىڭ قاتىسۋىمەن 25 بالاعا جۇرەكتىڭ تۋا بىتكەن كەمىستىگىن تۇزەتۋ وپەراتسيالارى جاسالدى.
2011 جىلى وبلىس دەڭگەيىندە بالالارعا اشىق جۇرەككە 100 وپەراتسيا جانە 100-150 ەندوۆاسكۋليارلىق حيرۋرگيالىق شارا قولدانىلدى.
بالالار كارديوحيرۋرگياسىن دامىتۋ ءۇشىن وبلىس اكىمدىگى بالالار كارديوحيرۋرگيالىق بولىمشەسىن جابدىقتاۋعا 130224,0 مىڭ تەڭگە, سونداي-اق بالالار كارديوحيرۋرگيالىق جانە رەانيماتسيالىق توسەك-ورىندارعا قىزمەت كورسەتۋ ءۇشىن قوسىمشا شتاتتاردى ۇستاۋعا قاراجات ءبولدى.
وبلىستا بالالار جانە جاڭا تۋعان بالالار حيرۋرگياسىن, ونىڭ ىشىندە اسقازان-ىشەك جولدارىنىڭ حيرۋرگياسىن, نەيروحيرۋرگيانى, كارديوحيرۋرگيانى دامىتۋ بويىنشا كەشەندى شارالار قابىلدانىپ جاتىر. بۇل بالالار ءولىمى مەن مۇگەدەكتىگىن ودان ءارى تومەندەتۋگە مۇمكىندىك بەرەدى.
استانا مەن الماتىعا جالتاقتاماي, ءوز بەتىمەن جول ىزدەگەن جۇماعالي قازىباي ۇلى وبلىس اكىمى اسقار مىرزاحمەتوۆپەن كەڭەسە وتىرىپ, كەشەندى باعدارلامالار ءتۇزدى. ايماقتاردىڭ دا كوپ جاعدايدا كوشباسشى بولاتىنداي جاعدايى بارلىعىن ۇقتىردى. مەديتسينا سالاسىنان حالىقارالىق ستاندارتتارعا ءوتىپ كەتكەن مەملەكەتتەرمەن ىسكەرلىك بايلانىسقا ءتۇسىپ, اتاقتى دارىگەرلەردى تارتتى. سولاردىڭ تاجىريبەسى, وقىتۋى نەگىزىندە ءوز كادرلارىنىڭ بىلىكتىلىگىن كوتەردى. بالالار كارديوحيرۋرگياسىندا العاشقى 25 وپەراتسيا پولشا ءدارىگەرلەرىنىڭ كومەگىمەن جاسالسا, سوڭعى 17 وپەراتسيانى وبلىستىڭ ءوز كارديوحيرۋرگتارى جاساعان.
جاس ماماندار جەتىلدى. جاڭا بۋىن قالىپتاستى. جۇرەگى اۋىراتىن جۇرت الىسقا شاپقىلامايتىن بولدى. شەت ەلدە قىرۋار قارجىعا جاسالاتىن وتا ءوز جەرىندە, ءۇيىنىڭ ىرگەسىندە تەگىن جاسالىپ جاتىر.
كەشەگى دەرتتى جاننىڭ, بۇگىن اۋرۋىنان قۇلان-تازا ايىققان اعايىننىڭ ءجۇزىنەن وسىنى ۇقتىق.
باقتيار تايجان.
شىمكەنت.
